arpalum otant kiristaana ila kiyyu
5
1 otanshayn ila nyauur nam deesanniyyu kiyyaattaayy ishaamamin;
nyauur settep kiyyu amm orr Mooha ufnaatta diiy kapa naf hekiyyamu.
settenno nam aat appayy olle peanniyyu kiyy hekidamin.
2 illo iyaan nam deesanniyy otanshayin qalle kinnatete foojimu?
sed minann dappisa inn fadusinnishshomu?
nam sed otanshayn ila all ariyaa.
3 etin inn kapa kinnaatta diiyyu nafe qaapann inn ollenn kiyy.
afan inn olle kiyyopin nam se hin erkayy qari horat quur.
4 helpaan inn mahh pold heka yesusin orqudi qapantane ananno qaapawonn inn ollenn kiyy,
irrot poldaaynu hekat yesusenno otanshayn ila kishsh,
5 ikkim soha nam sed patinan,
nafseshiyy aww poldat horat quura deyiyyo dinannintoss nam sedep kiyyu seetsani tarpisa daatta fadusinnin.
6 foojaann amm hedikkamu;
jarayt qoj pukeessa dahenn ikkim harusinniyyu inxuftanemu?
7 semmaalla qum se inn ammann jarayt male kishshanep,
pukeessa awshiyya koddan jarayt pahayt allpatiyyaa.
laah faasikaaynu kristoos heqalame.
8 semmaalla,
serkilayn jarayt pahayt se uruurumanne nayquntin innaakodin kodda male laaqqot jarayt daftin qaap dikkannenne shaakketin serkinnaa.
9 arpalayya olle kinnaatta diiyyaa henkid sed tureeshsh inni tsaaf.
10 sedep kidaawu,
arpalayya are husslah,
shoke orr se kodashsheti hanhamiyy shoke ponqampayya shoke hin tsootsa shoomanniyy kafuma diiyya amm kidaawomu:
et sedep koddito husslah qalle all sohannaaten kida.
11 hekoddu male antu inn tsaafiyyu iyyaan kristaana ikodiyy illo arpalumiyy shoke kodashsheti hanhamiyy shoke hin tsootsa shoomanniyy shoke mahh nam qara patinniyy shoke hin taaronniyy shoke ponqampayya olle kinaatta diiyaan inni kidin.
hinep kiyy olle damot naf dama diiyyaa.