orr hitaym heka kristoos
4
1 settep lamm namat dahenn erkamampayya kirstoosenne iyyaan heka Mooha hin dekam hark haayamenep innu dihu.
2 et sedep koddo,
orr op hark haayaden iyyaan amaanam kodda iyyaa fadusinnin.
3 hekoddu male et innannenno shoke nam pilannenno horat an qari quuramishsho amm antu rakkot henqapamu.
shaakketass amm antu horat iqari quurinhinamu.
4 amm antu akkanat ani dakaysamaanniyyamu;
hekoddu male amm sedenn tsillampayt koddinhinnamu;
iyy horat an qari quurinu pold kida.
5 semmaalla helpaan paxa poldat horat deya turann nam qari horat quura diiyyaa.
iyyat deyo hin poorinnat ili dekam attumat ilop sohashshinnina.
qaap mutsura namatenno akkinnina.
essete namat dahenn Mooha kapa aypilaan ifadusinniyy qeeddannina.
6 kafoot,
inn maallan kid abiloosenne mashshawu paahnat kod dehayy;
antu sedep kod,
lel se,
"se tsaafam qar tarpa diiyii" kidiyyu ikkim innu kapa kollintaness kida.
semmaalla nam shokku ishokku qara tawunisan fooja diiyyaa.
7 maanaan att orr pil qara tawt?
iyaan att qeeddatta diitt hekoott kodd maaniyyaa kiyy?
et qeeddatt koddo,
maanaass afa qeeddatta diittep foojin?
8 ammann iyaan inn fadusinniyy heakkatten!
amman heshorokunten!
innu kettanno reehatten illo daamunten!
shaakketass daamunten kid,
innonnon inn olle daamumaan illo daamum hekaann idikk koddaay.
9 Moohot innu orr hitaymaayy qum orr se toxt qari quurantetep,
afa orr heikk kann innu oorusiyyep ani kinnaannin.
semmaalla husslahatessenno hitaymiyyaassenno orrassenno iyyaan op intaanawiyyannin koddin.
10 innu kristoos maalla eepayya;
inn lamm kristoosenn iyyaan qallixishaakiyy kida;
innu tashampayya,
inn lamm iyyaan qiqqim kida;
inn orr serkisam,
innu lamm orr tuffasham.
11 hak ammannetessenno tuffinkinn,
deepoonninkinn,
patpattin kinn,
tolaminkinn,
por kallaata dapaann ayyeinkinn,
12 harkaynun erkawusataannin tashshin;
et innu otiyyane qorinkinn,
et innu ilkoanniyyane duupanninkinn,
13 et mahh innu qara patinniyyane dippatumannin immitaattinnin;
hak ammannetess seert husslahatenne shoqqa op allushuqiyyanepin tooyamin.
14 meddaawu iyyaan antu hoxsaanniyyop inn korsa qaapattannin sed inni tsaafin male amm inn deesasaassemu.
15 kristoosenn et amfaattot lekit qafnaattan nafenno amm appada lek heqqaftanemu.
antu lamm lel masmasunt heka Yesus kristoos inni lelaawonn appaaynin kodd.
16 semmaalla ikkim an pahnaannintanessin inn dinkamannin.
17 sed minannin tsimotoos se amaanam poldin meetaawu kodd antu hoxsaanniyyun inni hit;
iyyat qum se antu por heikkete maapar kristaana dahenn kollinniyyop paana kiyyat awshittet se antu Yesus kristoos amaanan akkad inn qaapusinnina.
18 lamm inn ila orr shakkan afan inn tooya deya diinninop qaapattaann foojin innaakooden.
19 hekoddu male et has pold koddo shakarrin kidina inn kapop deyina;
foojampayya hin ishaamooddooh kodda male irroshaddonno ufunaattan fadin.
20 maana maalla,
daamum Mooha irrot Moohaat male amm ishaamaamu.
21 hekann hiintan?
halitt jiixilatennin inn kapop deyinamu shoke hoxsuntanne dippatumanne?