orralliqoota maapar kristaana qorontoos
3
1 kafoot,
antu inn kollinniyyo,
iyyaan has sohaatin mimmitaatiyyanne meddaan sanu kristoosin qima diiyyep male,
amm qum iyyaan laaffot Mooha qapatepamu.
2 oot inn sanu damaan qim dama fotta diinnishshan maallan aanna inn ukkiyy;
3 oot inn sanu sohan mimmitaatishshan maalla,
hak ammaneetess damaan qim dama amm hefottitenemu.
inn orrshiittishshan ollimaashanumishshan iyyaan sohan mimmitaatiyy koddaayinpa?
inn kallaannishshan nam heikketepa?
4 nam shokku,
"antu heka bawloos" shokku lamm,
"antu heka abiloos" kidiyyo,
heka husslahateeh koddaaynipa?
5 kat abiloos maana?
bawloosenno maana?
iyyaa erkamamppayya inn harkaaddu qalli Mooha amaanten;
mashshmashshaddu se poldat erkassa iyyaa day qari erkanniyy kida.
6 antu hendih,
abiloos haq ukkiyy;
iyy kammiyy lamm Mooha kida.
7 semmaalla,
Mooha se kaaninniyyu male,
se dihenno koddu se haq ukkiyyenno amm akkan uqqalle heqapanemu.
8 se dihenno se haq ukkiyyenno iyyaa shakkanooh;
hekoddu male shokku shokkotaddo qum erkamooddotess heriyaddu akkanninan.
9 maana maalla,
innu erhama Mooha iyyaan ollin erkanniy;
inn lamm ul Moohaatenne man Moohaat.
10 daayy Moohot dikkumooyyin an dayyennin man dihampayt qalpet qapop sheeht lahi haay;
nam pilanno sheeht se antu haay qarass dihina;
hekoddu male nam man se dihiyyu mashshamashshayy ikkim ashshann qari dihiyyu itturtooyatta iyy fadusinnin.
11 sheeht se haayant pateeshsh aynonno sheeht pil haayass amm fottinamu;
sheeht settenno Yesus kristoos kida.
12 sheeht sed qarass lamm nam worqetann shoke pirreetann shoke daka tsorin shoke qoyrann shoke ayhittann shoke irkin dihiyyu et kinnaado,
13 erkamaay ikkim ashshann kiyyan akaaninan;
maana maalla,
lashsh hin attuwatallep indeyint.
ott it apittin akkaannintu maalla apitt hinet erkama nam heiket ekkannina.
14 erkamaan man dihampayt sheeht sett qari erkayy et apittin ekkawsaman illo nayqaatta male qimane soorit hinet heriy erkamooyyat qeeddannina.
15 nam erkamaayy doohen heriy dapaann miidamina;
iyyat mashshayyess lamm qum apitt ila passattaatep dinannina.
16 inn man miilot heka Mooha koddaaynenne laaffot Mooha inn ila kallaattaadd inxuftanemu?
17 nam man miilot heka Mooha allpulpul,
Moohot all iyy pulpulina;
man miilot heka Mooha immiil,
man settenno inn kida.
18 aynonno iissi paasa diiyyu;
inn ila aynonno are husslah qara iyy qallixishshaaka qapop kinnaanniyyu qallixishshaaka shaakk se Mooha kapa kodd qafnattaass eepayti all ikodu.
19 maana maalla,
qallixishshaaka heka husslah sed Mooha turass eepum kida;
sedenno,
qum it,
"Moohot qallixishaakampayya ururumaaddon qapina" kidant tsaafantep kida.
20 settep lamm,
"poldat qaap qallixishshakampayya aypot koddaayy up."
hekidant tsaafant.
21 semmaalla oot heikk hekaann kodden maalla,
aynonno namin fooja diiyyu.
22 bawloos koddu abiloosenno kefanno husslahatenno kiyyatanno toxtanno hin ammann kiyyanno hin deyinanno,
dahenn hekaann;
23 inn lamm heka kristoos;
kirstoosenno heka Moohaat.