hitaym bawloos
orr roometes
kaalt
hitaym bawloos orr roomet tsaafam, helpaan bawloos maapar kristaana se sapara romma qalle kiyyu hawatta qaapaade, ikkim turan dikkisanninan iyy lushinan qaapusisaass kida. qaapayyenno maapar kristaana se roome kiyyu olle helpa qoj erkayu kanna ispeenep anta ikkim iyy qarqaarinaness kida; hin iyyat oot amaantet kristaanumat ishaaketenne kollila kristaanum hin kristaanat kiyyataddu ili erkama qara nakanninan orkanni tsaaf; hitaym bawloos innaakot koddiyyu akkaanniyyu hitaym sed ila kida.
helpaan bawloos kristaana hin room qalle kiyyas paanussa dehayy illo ikkim Mooha iyyaa dinkaminu irraxatet iyyaa dayy kanna otant qaap hitaymaayy, lel se (1,17): "lel masmasunt sed, Moohot nam tsillampayt kodiyu hiraymaasha hak muutaytaatess amaantetan koddaadd lelin." kidiyyu kida.
sekanna bawloos qaap sed qall paldasaan tsaaf; orr ayhutaatenno koddu siip pilanno dahenn oot iyyaa juppot piddamen maalla, Mooha olle araarama iyyaa fadusinnin; namat Mooha olle araarama fottinu Yesus kristoos amaanaan kida; shokkohum awshitt se orrat Mooha olle qafnnaanniyan, qunddaadd kiyyat awshittet koddaadd bawloos paana paldan ufnaytinnin. nam amaan Mooha olle andot qafnaannin; laaffot moohaten irrot juppotatenne hekata toxt kela passannin; bawloos haysot henesh hiran hak haysot lakushetates qaap heka irrot laffot Mooha se halitt Moohaatenne kiyyat kristaana ila erkanniyyu, maana ikkim kodd ufunaytinnin; ukkannan qapin bawloos kaassiya se, "qaap Moohot hotta namat qapu qalles ayhutaanne siip pil ashshann ollin kinnaatta fottinan?" kidiyos mitaattila daannin.
lamm qum bawloos qaraoor ufunaytiyepa, orr ayhuta Yesus qeeddatta diitaaddu, qaap Moohaat; hin kodden, daayy dinila se Moohot Yesus kristoos kapan akkiyy qallep ikkim hotta nam dahenn kalinu kodaass kida. hekoddu male helpa orr ayhuta Yesus uqqall qeeddanninan ikkim deynan bawloos amaaniyy. muutayta qara bawloos kiyyat kristaana ikkim ashshann kinnaatta fadusinnishu, karakutta shokkohum se kristaanat ollin qapanen hoxsuntin kallaatta ikkim iyyaa fadusinniyyu ufunaytinnin; oot Mooha erkasaatenne, kaaduma kristaanat hussaddossenne mashshmashshaddu olli qapanenne, oot kaassiyaddaan qaap minan sohanniyat orkanna orkanna ufunaytinnin.
hin matsaafa sed qalle kiyy
kaalt qunda matsaafa sedet 1,1-17
dinattot meet namat fadusisaayy 1,18�3,20
paana dinila Mooha 3,21�4,25
kiyyat awshittet kristoosin akkaannishshu 5,1�8,39
israaelet qaap Mooha ila 9,1�11,36
kinnat kristaanum 12,1�15,13
paanussaanne kaysila 15,14�16,27.