bawloos utet maalta qara
28
1 helpaan innu andotin huss qarin paine por hin innu ullin pain utunnat maalta kidamishshu koddaaddin ufunaann.
2 orr utunnat se qara kallaanniyyonno dikkumaan nam shamusinniyy innu koden;
essete oot roopat roop,
it dammaannishshu maalla apitt qassiyyen illo innu qeeddaden.
3 helpaan bawloos hapuqa orqudi qap apitt se ili naqiyyo,
puushat shakk apitt it hossiyy maalla,
hesohatt illo harkayy qanitt sendedderin.
4 orr utunnat maalta helpaan puushat hark bawloos pata sendedderishshu iyyaa akkene,
"nam hin shaakketass nam,
nam ikayy!
kota pakatet kela hepassad male amm Mooha horata kela passatta illo kiyyatin kinnaatta hefottemu" he olli kikkiden.
5 bawloos lamm puushat sett apitt ili hissis all kash illo amm akkanat iyy hetayemu.
6 iyyaanno,
"dakintayy ettatina shoke ulaxasha sunkina toyina" kidaann lushannin.
hekoddu male helpaan lek iyyaa lushen akkanat qappatta diittaayy akkene,
qaapaaddu oohen illo,
"hin Mooha koddina koddinan" kiden.
7 por se innu ulla kinnu kapa ul pupiliyoos se utunnat se peashinniyot kiyy;
nam sedenno manayyep innu hemb lashsh halpatt paana dikkin innu serkiyy.
8 essete appa pupiliyoos firjaanne baaq dakint doohinniyun qapam ulli pead;
bawloos illo kapop luum Mooha idinkam harkayy qari qap iyy diniyy.
9 helpaan hin kodden kanna baaqampayya pil iyyaa utunnat se qara kiyyanno deyen illo dinaden.
10 orr settenno dayy lekenn innu deyen,
ikkaan innu serkiyen;
helpaan innu konkan antona sohanne iyaan innu fadusinniyy dahenn konkaall innu fexen.
antona bawloos maaltaashsh roomep
11 innu leha halpatt utunnat malta qari kaysinn kanna konka heka sapara iskintiriya se hak kashanat tarpinu ulli olad,
kaasana suutanna hin "moohaadda tahiyya" kidamiyy iqara qapu qallessin qaain.
12 innu saparaan siraakus kidamiyya painne lashsh halpattin ulli kayisinn.
13 ukannakulless pakatet qarin tarpin sapara rekiyumin painn.
ullassenno lashsh shakkaah tarpinn illo oot haayyot por se lashsh yaamishsho miskitt qari haayaw maalla lashsh lakkiyyaate sapara putiyolosep ann.
14 ullanno kafaaynun akkinn illo iyyaa ikkimin tappaa iyyaa kapi olanninu innu dinkamaden.
ukanna lamm roomepin ann.
15 kafaaynu hin roome kiyy helpaan iyyaa ootaaynu dakayene hak kapiyya afiyosetesenne por se,
"por peot halpatt" kidamiyyotess innu qeeddatta deyen;
helpaan bawloos iyyaa akke Mooha aypisad illo ikokkiyy.
bawloos huss roomete
16 helpaan innu roome paine wottaattar bawloos lushinu iyy daassam illo ikkim hawi kallaanninu kodam.
17 lashsh halpatt kanna bawloos sinkiyya ayhuta iyyaan roome kallaanniyy hembusiyy illo helpaan iyyaa orqudi qapamene,
"kafoot,
dapat antu siipaynonne halitt appadaannu qari kod amm apure hekishshmu;
hekoddu male yerusaalemess henhidam illo orr roometi tarpisam daassam.
18 orr roometenno an kaassaden illo iyaan horat toxt an qari quurusinnina oot iyyaa an qari akka diiyyen maalla all an hayya qaapaden.
19 helpaan lamm orr ayhuta all hayyamaawu shiittene antu koddinu dapaannin Daam roomaa kapop dehaatta kaassad male,
amm siipaawu kasasaassemu.
20 ammann antu inn hembusiyy inn akkaassenne sedenno inni lelaass kida.
antu ari sansalan hidam,
irraxatet se israaeleti daassant minann kida."
21 iyyaanno,
"woraqata yihutaashsh ootaayt tsaafam innu qarin paiyy shoke orr arep dey ilanno nam ootaayt iyaan nayq innu lel shoke ishaam amm hekiyyamu.
22 amaantet sed att kanni annishshu por heikk ila orrat ikkim shiittiyyu henxufn;
semmaalla hin att qaapatt dakayan fadin."
hekiden iyyi mitaattiyen.
23 illo hoora qapaden kanna orr lek kodden manayyep iyy kapop deyen.
iyyat illo etikel hir hak uldatat oot daamum Mooha iyyaa lelan ufunaytiyy.
ikkim amaaninani halitt muusenne matsaafadda himampayya iyyaa akkisan oot Yesus iyyaa kolliyy.
24 karatiddu lel se iyyat lel heamaanen;
shakkan lamm amm heamaanenemu.
25 helpaan iyyaa mashshaddossenno ollissena diiyyene bawloos lel shokkooh lel kanna orrakapa reehaden.
iyyat sedep kid ishaam,
"lel hin laaffot miilot isaayaas himampayt kapin appaadaanni lelt shaakket kida;
26 lel settenno hin iyy,
'siip sed kapop aanii illo
dakaya dakayikkishshan male amm immashsh qaapannikishshanemu;
akkaassenno akkikkishshan,
male amm illisannikkishshanemu iyyaa kidii;
27 mutsura siip sed iij kodden;
laappooddonno hedahhen
indoddonno heqimbiyyen;
sedep kodda diiyyan kid,
indoddun akkaayen,
laappooddun dakayaayen,
mutsuroddonnenno qall qaapannaayen,
illo an kapop mitaataayen,
ananno iyyaa dininnaay.'
28 "semmaalla hitaym heka dinila Mooha siip ayhuta kodda diiyi hitamaayy ufunaada;
iyyaa owo kidinan qeeddanninan."
hekid.
29 ["bawloos sed ishaam kanna orr ayhuta ikkaan orishiittaann ulla sohaden aanen."]b