bawloos sapara roometep aan
27
1 helpaan it ikkimin tsaaliyaap konkan anninnu sumatisante bawloosenne orr pil iyyaan hidam sinikitt tseet se yuliyoos kidamiyyu hala awkestsoos ila kiyyu harki haayen.
2 paarreshadde lamm konka atiramitsiyoon se por konka ulli ellashshisa se issiyaalle kiyyatep anniyyu qallepin kall anta hirr;
arisitsirokos meqtoonishsh se teseloonqe kallaadenno innu olle kiyy.
3 parreshadde sapara sitoonatepin fottin;
yuliyoos iyaan dikk bawloosi erkasaass qaapad illo ikkim moyshadooyy kapop anninu iyyaa qarqaarsa iyyi kodinan hayy.
4 innu ulla sohanne oot haayyot innu minaashsh haayawiyyu maalla utet qobiroos pati tawusattaannin antonaannu mina haayin.
5 helpaan innu pakatet se huss kiliqiyaatenne huss binfiliyya kapa kishshu tarpin kanna huss luqiya qalle saparaan mura kidamiyannin painn.
6 ulla sinkit tseet,
konka sapara iskintiriyya iyy huss tsaaliyaatep anniyyu akk illo ikkimin uqqalli qaainu kod.
7 lashsh lekit rakkot kaantennin lakku antan sapara qentos kapin pain;
haayya settenno ittureesh anta innu dawur illo innu huss salimoona kapin tarpin utet qeritses se haq ila kishshu pati tawusattann ann.
8 raant raantallin antan por se sapara lasiyya kapa kiyyu,
"por konka ellashshisa dikk" kidamiyyun irrootin painn.
9 helpaan lek antonan rawisaaynonne lashsh dama kapa duupattaa tarpa minann oot pakatet qara antot innayq kodd maalla,
bawloos orr settess sedep kid iyyaa kokkiyy,
10 "orraaynu!
sed kanneeshsh antonaannu iyaan rakkotanne miidamot uqqalle kiyyan koddaaddu ani akkaannin;
konkaanne mehaddaaha kodda male kiyyat nam qarassenno patetanne miidama painnina."
11 sinkitt tseetatenno lamm korsa bawloos kapeeshsh sinkitt konkaatenne appa konka kap dakayin.
12 por konka ulli ellashisa sett helpa kashanate ulli ella oot iyyat sena diinniyyu maalla orr lek,
"por konka ulli ellashisa se utunnat qeritsesetess por se dinid lashsh peishshoss miskittanne pihitotass otantalle kiyyu saparaan finqi kidamiyan painninn illo helpa kashan sed ulli tarpinnina" hekiden qaap dehayyen.
kotaan pakatet qara sohad
13 haayya hoshil dind lashsh yaamishshu miskitt qari kiyyooshsh deyiyyu iyyaa akkene afa qum se iyyaa qaapaden qari koddep iyyaa kinnaad iyyaa illo melihiqetb qeedden antona sohaden;
por se iyyaa ulli haysadene sohaden illo qertses raantan tarpen.
14 helpaan qoji kanna lamm,
kota irrampayaan "awuraqisc" kidamiyy utunnat se qaraatt pakatet qallep iyyaa qari dey.
15 oot konkotin haayya se fotta diittan tuquuramiyyu innonno haayya se pusha diinn maalla,
ruxun kidin illo haayya settennin tuquuraman ann.
16 utunnat qeeta kidamishshu pati tawusattan antan irrootin konka se tinnaxa qapa fottin.
17 orr konka settetenno konka se tinnax tishen erreel qeedden kanna,
konka se kaan patass wotoran maren.
konkotin por shaahatt se surites kidamiyoteesh sunka tura huuran,
shara se pinkamenno all furiyyen illo haayyan tuquuraman aanen.
18 oot kotaan innu qari qiman aanen maalla paareshadde mehaddaan konka se qalli feam shokku shokko pakatet se ilop all naqa hiren.
19 lashsh halpattiyaatenno mehadda konka settet harkooddun qeedden all naqen.
20 lashsh lekitess oot lashshanno koddo iskaanno akkaatta diiyyenenne haayyaanno innu qari qiman aan maalla sedeeshsh amm passatta fottinhinnamu henkidin irraxatet all quurr.
21 orr settenno dama dama male lashsh lekit oladen;
semmaalla bawloos otantaddu ilas elli illo,
"orraaynu!
hin antu inni lel dakaytan qertsese sohatta diittan kid,
amm rakkot hin dahenn inn qari painnaatemu.
22 ammannenno konkaaha alpatina male inn ila amm nam shokkooh naf qari patet painnintamu;
semmaalla huura diiyyaa!
henkidin inn korsin.
23 hal awaadd hitaymishsh Mooha se antu hekaayy kodd ishoomanniyot an kapi ell
24 illo,
'bawloose!
huura diiyii!
Daam rooma turi ella hed fadusinnin!
toare,
orr se hed olle anniyyonno dahenn Moohot hed maalla kidina toxt kela passinnina' he kid ani lel.
25 semmaalla meeddu orr,
huura diiyyaa!
amm akkannat inn tayinamu!
Moohot hin iyyat ani lel dahenn ikkim kaysinninoss amaaninkiy.
26 hekoddu male haayya hin utunnat shakk raantop innun annina ulli innu naqina.
hekkid.
27 awaddat hundann arfiyaate helpaan innu otant pakatet atiriyad qalle haayyan rakkattan anninkinno awadd joppe orr konka se qara erkanniyyu afa huss qarin paxa dehaadenep iyyaa kinnaad.
28 helpaan iyyaa wotora pakatetin ekkasa happiyyane didim pakatet sett metret hund afur qareell kinnaad;
iyyaa jawuhay ellen ekkayyene lamm metret hund halpatt kodd.
29 konkaannu dakallan shomama tura huuren illo konka se kanneeshsh melihiqet afur pakatet se ilaat lekkiyen;
sekanakules ikkim lashsh iyyaa parintu dinkamatta hiren.
30 orr konka se qara erkanniyyonno all feelatta hinnaaden illo afa melihiqawa konka se tureesh happiyanep kinnaytisan konka se tinnax konka se kaan qalle kiyyu pakatet se qarop happen.
31 essete bawloos sinkitt tseetatenne wottaattarass,
"orr hin et konka sed qari haysatta laisa diiyyane inn amm passatta fottihintanemu" iyyaa kid.
32 essete wottaattarat wotoraan konka hin tinnax inhiddam quuren illo ikkim haq qari hatintu all hayyen.
33 lashsh qeehatte dahenn ikkim dama daminaness bawloos iyyaa dinkam illo,
"akkan kapin koda male hak awwet baaqurin lashsh hundann afur kaysitten.
34 semmaalla ikkim dama damintanessin inni lelin;
hin lamm kokkunt inni daanninta;
iyaan inn miidin amm hekiyyanemu."
ikkid.
35 sedepanno kid illo laaqqot qeedd,
iyyaa turi Mooha aypila dehayy illo moss dama hir.
36 essetekul iyy dahenn ikokkiyyen illo damen.
37 konka se qalle nam tseet lakenne hund tappann leh kiyy.
38 iyyaa dahenn damen faaken kanna kaappa se feam pakatet qallep all naqen illo konka se hoshilusiyyen.
konkotin heqep
39 helpaan lashsh parite por se iyyaa ullin paen amm heufunaadenemu;
hekoddu male miint pakatet se shaahat qaftu akken;
et fottanto konka se annusisa illo haalep all tuquura qaapaden.
40 melihiqawwaanno all furiyyen pakatet qalleet all hayyen;
wotoraan qoyr konkan annusisa inhiddamenenno all furiyyen;
shara se tinnax miint konka sett mina kiyyonno errop haayya qapen illo raant pakatet sett qarop sohashshisa anta hiren.
41 hekoddu male oot konkotin shaahat pakatet ili ulli tuulamin shoomam illo ulli qapam seseya diinniyyu,
lamm patalleeshsh tuquuranishsh kota qari leken maalla qeqqepa hir.
42 wottaattarat orr se hidam ila ikkim nam shokkooh naf intaakin inpassanniness all rawusa qaapaden.
43 oot sinkitt tseet lamm ikkim bawloos passanninu fad maalla qaapaaddu amm heqeeddademu.
sed kapeeshsh orr taakana fottiyyu ikkim konkalleett pakatetallep torinan illo pakatet se qalle sohanninaness acac.
44 ikkim orr hat lamm tsawuladaanne qora konka se qeqqepetin sohanninaness acac;
paana sedenn iyyaa dahenn tarrpa fotten.