ishaamaan bawloos akirib turi ishaam
26
1 akirib bawloosess,
"iyaan att qaftu ishaama fottihint."
hekid;
bawloos illo harkayy erreel qapa illo sedep kid ishaam.
2 "akirib daama!
hin orr ayhuta anin kasasiyyan hed turi iqqara lelattaass allinmasmasin.
3 karakutt att tampetanne shiitta orr ayhuta dahenn heufut;
semmaalla duupattan ikkim an qara dakayintossin hed dinkamannin.
4 "meumawo hiran ashshann ikkim antu kallaad orr ayhuta dahenn heupan;
hiraym qara hiran kiyyashawu se antu otant siipaawu ilassenne yerusaaleme kallaadenno heupan.
5 lamm et maanyet ani kodda hoxsaadan kid,
amaanteshaynu qalle orr se tampet qari qimiyyu ila antu farasishsh shokku koddan kallaattaawu hiraym qara hiren heupan.
6 ammann lamm antu horat dehaad ari ell oot antu irraxatet se Moohot appaadaannu dayy amaaniyyu maalla kida.
7 irraxatet hin kaysaannishsho akkaass maytaannu hundan lakk lashsh min Mooha shoomattan lushannin makess;
daamallo!
antu maalla orr ayhutaatin kasasam irraxatet sed minann kida.
8 Moohot iyy orr raaw toxt ila sohashshinnyyu koddaay inn maanaass amaana diinnin?
9 "ananno mashshawoss mahh Yesus heka nasreetishsh paana antu fottin shiitta an fadusinnin henkid qaapad makess.
10 lamm iyaan antu yerusaalem qalli kodenno hin iyaa;
hayyotum antu kaadayya suukamma qara qeeddadennin orr Mooha ila iyaan lek man hidanatep kalusiyy;
illo helpaan op iyyaa rawinniyanne orr se rawinniyyu ollenn sen.
11 helpaan leke manna dinkam ayhuta talla horsiyy;
ikkim pold qari lel otitta lelinani ikkoom;
ikkaan qari miirottaan saparadda huss pil nafepanno antan iyyaa kann ariyy.
oohama bawloos
(erka. 9,1-19; 22,6-16)
12 "antu sed maalla kaadayya suukamma qara hayyotum qeeddad illo tamaasqop anniyyo,
13 daamallo!
helpaan antu paanaalle kiyyo kallap attumat,
attumat lashsh qara tawutun akk;
attumat settenno ananne orr se an olle anniyyu kapeesh moontalleett otawut.
14 innu dahetaynun hussalli sunkine kap ipretaatenn nass,
'saol!
saol!
maanaass an rakkusinnin?
et silf madanishsh qareesh annishsho ikkaanessi miidamint.
' kidiyyun dakay.
15 ananno,
'polda!
att ayno?
' henkid;
poldat illo,
'antu Yesus se att rakkusinnishshu.
16 ammann sohadu,
erroop ell;
paana antu ammann hedi inxakkaadenne ittureesh hedi inxakkinninonn ikkim erhaytaawonne maanyet an koddintu hed maakumusisaassin hedi akkaad.
17 antu siipaaytenne siip se ayhuta kodda diiy,
antu iyyaa kapop hed hitiyyu kelan hed passinnina.
18 ikkim indaaddu iyyaa qahinnintu illo poorinnat ilaashsh attumat ilop sohashinnintu,
por peashshila seetsanateeshsh por moohaatep mitaattinnintossin hed kodina;
iyyaanno an amaana minann jupposhaddu allhattot akkanninan;
siip se miil olle tayma qootanninan.
' ani kid.
19 "semmaalla akirib daama!
raaet se moontalleett ani akkaat amm hittisa henfottemu.
20 hekoddu male turaqattaass orr tamaasqo kallaanniyyoss,
ukanna lamm iyyaan yerusaalemenne huss yihuta qalle kiyy daheness,
settep lamm siip pilannob ikkim juppot qara mitaatan por moohaatep deyinaness erkamaan juppot qara mitaataaddu akkinniyy ikkim erkanninanessenno henkolliyy.
21 sed minann,
antu man miilotate kiyyo orr ayhuta an qapen illo an ikasa ekkayyen makess.
22 hak awwetess qarqaarsa Mooha amm hendapemu;
sed minannin nam kaanessenno nam tinnaxassenno lelan ari ell;
se muusenne himampayya sedep koddinan kiden turaqatta lelen ishaama pateeshsh amm hepil antu ishaam hekiyyanemu.
23 iyyaanno,
'kristoos rakkot qeeddannina illo toxt ila sohataannenno qart koddina,
attumat dina siipayyessenne siip pili daannina' hekiden ishaamen."
24 helpaan bawloos ishaama hin iqqara mitaattinniyyo fistsoos,
"bawloose!
ammann shokkohass yaart;
lekusa kollinnat yaarass hed mitaattiyyen!"
hekid nass err qeedd ishaam.
25 bawloos lamm sedep kid mitaattiyy,
"hed se serkisam fistsoosello,
shaakketannne iyaan pahin ishaamin male amm yaarinkiyyamu.
26 oot daamat sed upu maalla,
ananno patpahisa iyy turi ishaama fottinhina.
ishaama hin iyaan iyy tura dekama diiy koddaaddu henxup.
iyyaan deketi erkawsam amm hekiyyanemu.
27 akirib daama,
himampayya amaanikkishshpa?
ikkim amaanishshu henxup."
28 akiribanno bawloosess,
"helpa qoj ilaseeh kristaana an koda hiintamu?"
he ikid.
29 bawloos illo,
"helpa qoji koddonno helpa lekessenno hedeeh kodda male nam aww ishaamaawu dakayy dahenn hidama sed pateeshsh ikkim qumaawop koddinosin Mooha dinkamin!"
ikkid.
30 sekanna daamanne peashisampaytanno pariniqenno siip se iyy olle ull qaaenno dahenn sohaden.
31 iyyaa ulla sohaden anniyyane,
"nam hin iyaan toxtass shoke hidan iyy kaysinniyy amm hexerkayyemu" he olli kikkiden.
32 akiribanno fistsoosess,
"Daam roomaa qarop tarpa kaassatta diiy kid,
nam hin allhayyamaay" hekid.