bawloos Daam rooma qarop tarpaass kaassad
25
1 fistsoos huss peashilaayyatep kall illo lashsh halpatt kanna qisaariyaashsh yerusaalemep aan.
2 ullassenno kaadayya suukammaatenne orr ayhuta ila orr kakkaan bawloos qarass kaassiy dehayen.
3 oot iyyaa paanaalle bawloos turi suussa ikasa faden maalla,
ikkim fistsoos iyyaa hesinu illo yerusaalemep iyy deyusinninoss dinkamaden.
4 fistsoos lamm,
"bawloos qisaariyya man hidanate kiyy;
ananno ammann shakarin kidina ullop annina;
5 hayyoshayynenno an olle qisaariyaap aanenii;
nayqunt bawloos erkayy et kinnaatto ulli iyy kasasenii."
iyyaa kid.
6 fistsoosenno lashsh lakkushet shoke hundap kishshu iyyaa kapi tarpiyy kanna qisaariyaap aan illo helpaan iyyat qisaariya pae paarreshadde horat quura laiyy illo ikkim bawloos iyyii dehaanninani acac.
7 iyyat dehaade orr ayhuta iyyaan yerusaalmeett dey patamantaren illo ishaama qiqim maanyet dap qari dehayyen.
8 bawloos illo,
"dapat antu haltt ayhuta qarassenno koddu man miilot shoke Daam rooma qari kod amm hekishshamu" kid iqara ooriyy.
9 fistsoos lamm ayhuta masmasusisa fad illo bawloosi kide,
"yerusaalemep anta ishaama hin an turi deehatta fadikishshamu?"
10 bawloos illo sedep kid immitaattiyy,
"toare antu sheedda Daam rooma hin ishaamaawu turop dehaatta tooyama fadusinniyyan turassin ell;
qum se att mashshayt uftu qarass qarkalma antu ayhuta qari erkayy amm apure hekiyyanemu.
11 etin qarkalma kodo shoke qarkalma toxtin an qari deyina kodu koddo amm toxt kela passadonu kidinkiyyamu;
hekoddu male et kaassiyaaddu aypot koddo nam an tarpisa iyyaa daatta fottinu amm hekiyyamu;
antu Daam rooma qarop tarpaass henkaassad."
ikkid.
12 essete fistsoos korsampayyoyy olle ishaam illo,
"att Daam rooma qarop deehaatta kaassatte,
Daam roomaa turop annint."
ikkid.
bawloos akribanne pariniq turop dehaad
13 lashsh qoji kanna akirib daamanne pariniq fistsoosess,
"paka andotin deit" kidaass qisaariyaap deyen.
14 oot iyyaa lashsh lekit ull oladen maalla fistsoos sedep kid oot bawloos akiribi lel,
"nam shokku filikis hid ari diiyy kiyy;
15 helpaan antu yerusaaleme kiyyo kaadayya suukammaatenne qimaayya orr ayhuta ikkimin horat qari quurinu an kaassaden illo oot nam sed ani dehayyen.
16 antu lamm,
'se kasasamiyyonne hin iyy kasasiyy orrkapop dehasa illo nam hin kasasam iyaan iyyat inkasasam iqara oorisa male se kasasam tarpisa daattot amm tampet roomaatemu' henkid iyyaa mitaattiyy.
17 semmaalla orr hin kasasiyy helpaan iyyaa orqud qapamen arep deyene olatta malen paarreshadde horat quura laiyy illo ikkim bawloos dehanninani acac.
18 helpaan orr hin iyy kasasiyy ishaama iyy kapeell ellene amm qum se antu nayqunt erkayy kid qaapadep akkan iyy kaassusinniyy iyy qari hedehayyenemu.
19 hekoddu male oot amaanteshaddotenne oot nam se toy Yesus kidamiyyu lamm bawloos,
"kiyyatann kiyy" kidiyyot orishiittin.
20 oot antu ishaamayn tooya rakkad maalla,
bawloosess,
'yerusaalemep anta ulli iyyaa olle orideeha fadikishshamu?
' henkid.
21 hekoddu male oot iyyat ikkim Daam rooma turi itooyamintu kaassad maalla,
hak antu ullop iyy hitinnos ikkim man hidan talli olanninossin acac.
22 akiribanno fistsoosess,
"ananno nam hin ishaamiyyo dakayan fadin" he ikkid.
fistsoos illo,
"paarre dakayint" ikkid.
23 semmaalla paarreshadde akiribanne parniq uuwaat daamumaaddot uuwaden illo serka kaanin saallunta kaadayya orr toratenne saparaalle orr kakkaanetin deyen por horat quuraatep kalen;
filikis illo bawloos hemubusiyy.
24 fistsoosenno,
"akirib daama!
inn hin are kiyyanno dahenn!
nam hin,
orr ayhuta dahenn,
'sedeeshsh amm kiyyatin kinnaatta iyy fadusinniyyamu' kidan ullupiyyan ikkimin yerusaalemessenno aresenno horat qari quurinu an kaassaden hin iyy.
25 antu lamm qarkalma toxt qarin iyyin paina amm qari henxakkemu;
oot iyyat ikkimin Daam roomaa qarop iyy tarpinninu kaassad maallan ullop iyy hita quur.
26 hekoddu male iyaan antu ootaayy poldaawu tsaafinu amm henqapamu;
semmaalla etin iyy kaassadu kanna iyaan antu tsaafinun akkannina kidaannin inni turopanne karakutt,
akirib daama,
hed turop dehayy.
27 nam hidam et iqara tarpinniyane se iyyat inkasasamiyu lela diittot eepumap ani kinnaannin."