orr ayhuta bawloos kasasen
24
1 lashsh hen kanna suuka suukamma hanaaniyat qimaayaanne nam ootaaddu ellinu tsartsalus kidamiyyu olle qisaariyaap aan;
iyyaa illo bawloos peashisampayt huss qari kasasen.
2 helpaan bawloos hembam deye tsartsalus sedep kid iyy kasasa hir.
"hed se serkisam filikis,
hed minannin andot lekit akkann;
peashilaat hin dikkannenno kallat siipaaynu ahanaatt.
3 hed se serkisam filikis,
erkamaatt hin dikk innu por heikketenne helpa min qeeddanninkinnu aypila kaanenn kida.
4 hekoddu male ikkim antu hedin olisininess ikkim dikkumaattin paana hummaxan an qara dakayintosin hed dinkamannin.
5 nam hin baaq nayq innu kodd;
orr ayhuta hin husslah qara kiyy dahenn oriqari sohashinnin;
orr nasireetessenno sinkitt kodd innu akkin.
6 iyyat man miilotatenno oshumusisa ekkannin innu qafn;
[qum halittaynotessenno qari woka hinnaan.
7 hekoddu male sinkitt orr tor lusiyos dey illo irrotin innu qara passiyy.
8 orr se iyy deehiyonno ikkim hed kapop deyinan acac;]
a kaassiy se innu iyy qari dehanninkinnono shaakket koddaayy att mashshayt iyy kaassattan ishaaka fottihint."
9 orr ayhutaatenno,
"ishaamaannu hiniyya" kiden olle senen.
bawloos filiks turass ishaama iqara oorisa ishaam
10 filikis huss peashisampayt ikkim bawloos ishaaminos harkin akkyy illo iyyat sedep kid,
"par lekess att peashisampayt siip sed koddaayt antu henxup;
semmaalla deeh sed masmasuntannin iqara hed turi lelannina;
11 Mooha shoomatta yerusaalemep antu aaneeshsh lashsh hundann lakk qareell ikkim kinnaatta diittess att mashshayti ishaaka fottihint.
12 man miilotate shoke man dinkam ayhutaate shoke saparaalle antu nam olle shiittamanniyyo shoke siip oriqari sohashinniyyo amm an heakkenemu.
13 se iyyaa ammann anin kasasiyaness maanyet an qari dehasa amm fottinanemu.
14 hekoddu male sedin hed lela fadin;
se halittane matsaafadda himampayya qari tsaafam dahennin amaan;
paana se iyyaa eerpa kidiyanin Mooha appaadaannu serkinnin.
15 qum se iyyaa irrayyiyanetep ananno ikkim Moohot tsillampayyaanne juppampayya toxt ila sohashinninu irrayyinkiyy.
16 semmaalla ikkimin moohaanne nam turi qaap miil qafnaanninossin lashmin sootin.
17 antu yerusaaleme sohad par lek kaysiyy kanna kodashshet qarqaarsa siipaawu daattaassenne daayy moohaatennin dey.
18 iyyaanno helpaan antu man miilot talla tampet miilawa kaysiyy sed erkanniyyo an akken;
amm siip lekenno an olle hekiyyamu;
oriqari sohattaanno amm hekiyaamu.
19 hekoddu male orr ayhuta iyyaan issiyaashsh dey shakkan ulla kiyy;
et akkan iyyaa anan kasasiyyan qafnaadane hed turi ishaamenii.
20 shoke nayqunt iyyaa helpaan antu arfayta turop dehaade an qari akken et kinnaatto orr se arep dehaad ishaamenii.
21 se antu,
otanishaddu ili ell nassaawu erri qeedd,
'toxt ila sohatta kiyy kidaawu minnannin aw horat dehaad' kid ishaam pateeshsh iyaan antu kod amm hekiyyanemu."
22 filikis lamm oot iyyat paana pold iqimi upu maalla,
"et sinkitt orr tor lusiiyoos deyon deehaayyin wokina."
hekid iyyaa hayyad.
23 sinkitt tseet se bawloos lushiyyossenno,
"lushayt iqqimisan hasayy anta dawura diiy illo heliyi lushii;
moyishadooyyanno et akkan iyy fadusinniyin iddeyiyyane dawra diiyii."
he ikkid acac.
bawloos filikisenne tirusiila turop dehaad
24 lashsh qoj kanna filikis haypaashayy se tirusiila kidamishshu ayhutishet koddit olle dey;
bawloos hembusiyy illo iyaan iyyat oot Yesus kristoos amaanaat ishaamiyyonno dakay.
25 iyyat lamm oot tsillumatenne illushattaanne horat se deyishshotenno ishaama qara kiyyo filikis hehuur illo,
"ammann aanii,
etin helpa sen akkadon hed mina hitina."
kid iyy mitaattiyy.
26 helpaanette lamm filikis bawloos allfurisass koddashet qara qeedatta fad illo sed minann helpa lek iyy hembusinnin olle ishaamin kida.
27 par lakk kanna lamm borqiyoosb fistsoos por filikis ili huss peashshisa haayam;
filikis illo orr ayhuta masmasusisa fadan bawloos hidan ili all diiy.