23
1 bawloosenno arfayt illisad tooy illo,
"kafoot,
hak awet antu Mooha turi kallaad qaap dikkann kida."
ikkid.
2 suuka suukamma hin kodd hanaaniyanno ikkim bawloos kap paalinaness orr se kapi elli acac.
3 essete bawloos hanaaniyass,
"hed se hanaan onk atin roopama pahu!
Moohot hedenno dawna!
se halittin daasant qarass ikkim deehaawu horat quurintos laitt male,
halitt male an dawaxa acacimu?"
ikkid.
4 orr se iyy kapa kiyy lamm bawloosess,
"suuka suukamma Moohaat otimu?"
he ikkiden.
5 bawloos illo,
"kafoot!
suuka suukamma koddaayy amm henxufnaademu;
maana maalla,
tsaafa kaadayt siipayt qari iyaan nayq lela diiy.
' kidiyy tsaafam."
he iyyaa kid.
6 bawloos orr hin ulla kiyyu pakat faraset pakat satuqet koddaaddu ufunaad illo,
"kafoot antu farasishsh,
imm farasetat;
toare!
ammann antu maalla horat dehaad,
irraxatet se orr raawi toxt ila sohatta qapan amaana minann kida."
hekid nassayy erri qeedd otant arfayt ili lell.
7 helpaan bawloos sed lele otant farasetatenne satuqet tallass jiiaytot sohad illo arfaytat lakki olli paaqq.
8 maanaasse,
satuqet,
"toxt ila sohattot amm hekiyyamu;
hitaymiyya moohaatenno amm hekiyyanemu;
laaffotanno amm hekishshamu."
hekidin,
lamm faraset,
"hin dahenn hekiyyan."
hekidin amaanin.
9 essete pawurusa kaan hiram;
faraset ila kollisampayya halitt karatiddu errass ellen illo,
"innu nam sed qarass iyaan nayq amm henxakkinemu;
laaffot Moohaat shoke hitaymiyya Moohaat iyyi lel koddinan,
innu maanan ufna?"
kidaann shiitten.
10 sinkitt hin jiiaytot lekiyyo,
orr hin bawloos miidinan kidaan huur illo,
"lekkada illo bawloos otant siip ila passiyaa indeyaa!
por kallaashaynotep inxaanaa!"
kidan wottaattar acac.
11 awusete awadd poldat bawloos kapass ell illo,
"haayy,
huura diiyii,
qum att yerusaaleme maanyeshawu kodditep lamm roomessenno maanyeshawu kodda hed fadusinnin."
ikkid.
sulat bawloos ikasa sulant
12 helpaan lashsh parte orr ayhuta hesuladen illo,
"bawloos ikasa male amm dama daminhinnamu;
amm haqanno ukinhinnamu."
kiden kakaden.
13 orr sulat sed ila kiyyonno nam hund afur qareell kiyyan.
14 iyyaa kaadayya suukammaatenne qimaaya kapop aanen illo sedep kiden,
"bawloos ikasa male amm dama kapin kodinhinnamu henkidin kakann;
15 semmaalla inn arfayta olle sena illo afa akkan inn bawloos qara iqimi kaassannintan kiyyanep pahanaytisan ikkim bawloosin inni deyinani sinkitt orr tor kaassadaa;
innonno iyyat inn kapin paisa turann ikasaass hendikkisann" kiden.
16 lamm oot ashim bawloos sulashaddu dakay maalla por orr tor ulli kallaanniyyanep aan illo bawloos lel.
17 bawloosenno sinkiyya orr tor ila ishshokku hembi illo,
"oot meet hin akkan iyyat sinkitt kaani lelinu qapu maalla iyy kapop inxaanii" ikkid.
18 sinkitt settenno meet settenn sinkitt orr tor se kaan kapop aan illo,
"oot meet hin akkan iyyat hedi lelinu qapu maalla bawloos hin hidam an hemb illo ikkimin hed kapop inxaanninu an dinkamad."
ikkid.
19 sinkitt orr tor lamm hark meet settet qap dind qara all inkidd illo,
"maana ani llelinnt?"
kid iyyeeh hawi kaassad.
20 meet hin illo sedep kid,
"orr ayhuta afa ishaama bawloos iqqimi tooynanep kinnaatan ikkim arfayta dehannintu hed kaassattass senen.
21 hekoddu male owwo iyyaa kida diiyii;
orr iyy ikasa male amm dama kapin kodinhinnamu;
haqanno amm ukinhinnamu kidan kakad nam hund afur qareell kiyy iyy ikasa turi qaasad;
ammann iyyaa lushanniyyan,
iyaan att iyyaa mitatinnintooh kida."
ikkid.
22 sinkitt settenno,
"ishaamayn att an llelt nam pili lela diiyii!"
hekid illo meet se hayyad.
bawloos peashisampayt se filikis kidamiyyu turop dehad
23 sekanna sinkitt settenno sinkiyya orr tor ila nam lakk hemb illo,
"awadd saatet halpatt qara orr qisaariyaap anninu wottaattar tseet lakkenne orr fart hund tappanne orr tor qapanniyyu nam tseet lakk dikkiyyaa;
24 bawloosessenno fart dikkiyyaa illo filikis peashisampayt kapop andotin inxaanaa."
iyyaa kid.
25 woraqata qarassenno sedep kid tsaaf,
26 "an qalaawitoosb lusiyoos kapa,
hed filikis se serkisam peashisamipaytass,
andot hedi kodditu!
27 orr ayhuta nam sed ikasaass qapen makess,
lamm oot antu nam rooma koddaayy ufunaad maalla wotaattar ollenn aan illo inhat.
28 maana minann ikkim iyyaa iyy qapen ufunaattaassenno fad arfaytaaddu turop dehayy.
29 iyyaa maalla iyy kasasiyyanenno halittaaddu maalla koddaayin ufunaad;
hekoddu male iyaan iyyat maalla hidaminu shoke toyinu amm hekiyyanemu.
30 sulat nam sed ikasa sulant antu dakaye esseteehin hed kapop hit;
orr se iyy kasasiyyonno deeh iyyaa iyy olle qapan ikkim hedi ishaamanninanessin iyyaa lel."
31 semmaalla wottaattar hin acaca se kaysisaass bawloos awaddat pati qeedden sapara antibatsriisetin inpaen.
32 parreshadde orr fart ikkim bawloos olle anninan koden illo shakkan qareeshsh por orr tor ulli kallaaniyyanep mitaaten.
33 helpaan orr fart qisaariyya paiyene woraqata sett peashisampayt hussati dayyen illo bawloos iyy turop dehayyen.
34 helpaan peashisampayt woraqata se waarusiyy kanna,
"att nam haft hekantete?"
hekid bawloos kaassad;
helpaan iyyat nam haft kiliqiyya koddaayy ufunaade,
35 "helpa orr hin hed kasasiyy deyanen deehayt dakayinna."
he ikid.
ikkim man herootis heka daamati lushaminu acac.