22
1 "kafaawonne appada,
ishaamaan ammann antu iqqara oorisa inni dehanniyu an qara dakayaa!"
2 helpaan iyyat kap ipret ishaamiyyu iyyaa dakayen kanna se tur qareell all rui kiden.
bawloosenno ukkanna sedep kid;
3 "antu ayhutishsh kiliqiyaalle tsersesi dalad;
antu kamm lamm lukket kollisampayt hekat kamaliyaal kelass are sapara yerusaalem qalless kida;
antu iyy halitt appadaatenno qimiyy koll,
qum se aww inn oot Moohaat doohishanep doohiyyu makess.
4 diiddaanne iskatt hin paana sedin anniyy qapan man hidanatep tarpisa daattan hak toxtat kann arinniyyu kida.
5 sedess lamm suuka suukammaatenno qimaayya arfaytaatenno dahenn anass maanyet;
iyyaa kapan hitaym kafaaddu qeedd illo kristaana se tamaasqo kiyyu hida are yerusaalemep indeya horsisa antaalle kiyy makess.
bawloos ikkim ashshann Yesus kristoos amaan torr
(erka. 9,1-19; 26,12-18)
6 "helpaan antu tamaasqop anniyyo kallap antu ulla paxa dehaade uiliaash attumat hahisa hahinnishshu moontalleett an kapaash akkaad.
7 helpaanette ananno hensunk illo nass,
'saaol!
saaol!
maanaass an miidin?
' kidiyyu dakay.
8 ananno 'polda!
att ayno?
' hen ikkid.
iyyat illo 'antu Yesus nasreetishsh iyy att rakkusinnishshu.
' ani kid.
9 orr se an olle kiyyu lamm attumat sett akken male iyaan iyyat an olle ishaam amm hedakayenemu.
10 antu illo,
'polda!
maana koda an fadusinnin?
' ikkid.
poldat lamm,
'sohadu tamaasiqop aanii,
iyaan att erkannintu dahenn ullass hedi lelinan.
' he ani kid.
11 haahila attumat sett minann amm lak akka henfottemu;
orr se an olle kiyyonno harkawu min qapen tamasqop anin aanen.
12 "ulla nam shokku hanaaniya kidamiyyu orr ayhuta hin tamaasqo kiyy dahenn iyyi maanyet kodden,
iyy qum halitt qari Mooha huuriyyu kiyy.
13 iyyanno an kapop deyy an kapi ell illo,
'saaol kafitte!
indaatt lak akkenii!
' ani kid;
antu esseteeh lak tooy illo iyy akk.
14 iyyat illo,
'mooha appadaannu ikkim hasaayy ufunaannintu tsillampayt se akkintu illo nassayyenno dakayintoss turaqatta hed pahisad.
15 iyyat maalla sedep kod,
se att akkitenne dakaytenn nam heikk turass ikkim maanyet iyyi koddintoss kida.
16 ammann maana luushannin?
sohadu,
mahhaayy hembii illo ahalisamii jupposhayt illanno jiqamii' ani kid.
17 "helpaan antu lamm yerusaalemep mitaat man miilot talla dinkam qara kiyyo raaetin akk.
18 poldannon raaetin akk iyyat illo,
'maanyetumaayt se att ootaawu dehannishshu oot iyyaa qeeddatta diinniyaan maalla,
shakar kid yerusaaleme all sohadu!
' ani kid.
19 ananno,
'poldaawo!
antu iyy orr se hed amaaniyyu man dinkam ayhuta talla qapa tolaann man hidanatep kalinniyyu koddaawu iyyaa heupan.
20 istsifaanos hin maanyeshayt kodd ikawusamiyyo ananno iyyaa kapan kiyy iyyaa olle sen illo uuwawa orr se iyy ikanniyy luushin' henkid.
21 poldat lamm,
'siip ayhuta kodda diiy por seka kiyyu kapopin hed hitina,
sohadu illo aanii!
' ani kid."
bawloos nam roomaa koddaayy ufunaytiyy
22 hak bawloos hin ishaamiyyoss siipat dakassattalle kiyy;
sekannakuless,
"huss qara all patu!
nam sedep kiyyu amm kiyyatin kiyatta iyy fadusinniyyamu!"
hekiden ullupen.
23 ullupitannenno uuwawooddu ippatta allkashin huss moontalleel purrahin.
24 helpaan sinkitt orr tor,
sed akkekuless ikkim bawloosin por se wotaattarat ulla kallaanniyyanepa anninaness acac;
hin iyyaa maalla iyy qari ullupen ufunaattaass,
ikkim litsootin kaypaminu kaassawusaminoss acac.
25 iyyaa sheepin hiden kaypa dikkisanniyyane bawloos sinkitt tseet se iyy kapi elless kide,
"nam rooma qari horat quurama male kaypot halittin inni hedaassamemu?"
26 sinkitt tseet helpaan iyyat sed dakayekuless sinkitt orr tor se kaan kapop aan illo,
"nam hin nam roomaate!
hin att erkasa hinnaatt qara illushadu!"
ikkid.
27 semmaalla sinkitt settenno bawloos kapop dehaad illo,
"intu ani lele;
att nam roomaatemu?"
ikkid;
iyyat illo,
"heyye."
kid.
28 sinkitt settenno,
"kafum sed antu kodashshet lekitennin piddad."
hekid;
bawloos lamm,
"antu lamm nam roomaa kodda,
innindalad."
he ikkid.
29 semmaalla orr iyy kaassatta dikkisad esseteeh iyy kapa reehaden;
sinkitt settenno lamm nam roomaa hidusisaayy ufunaadekul hehuur.
bawloos arfayt turop dehaad
30 parreshadde sinkitt hin orr ayhuta maana maalla ikkim iyy kasasiyyan ufunaattaas fad illo kaadayya suukamma man miilotatenne arfayt ayhuta ikkim orqudop qapaminani acac;
bawloosenno all furiyy iyyaa turop dehayy.