bawloos yerusaalemep aan
21
1 innu iyyaa kapa reehan kanna konkaallessin qaain utunnat se pakatet ila kishshu qos kidamishop pahin ann.
paarreshadde utunnat se rut kidamishun painn,
ukanna saparaan baatsira kidamiyap ann.
2 ullanno konka huss finqetep anniyyun akkann qall qaain antona mina haayin.
3 innu utunnat qobiroos akkine dind pihitot qarassinn all diinn sooriyaap ann;
oot ulli mehadda lekkashisot fadusinniyyu maalla por konka ulli ellashisa tsiroosetepin ann.
4 ulla solletin fadin akkin illo iyyaa olle lashsh tapp olann.
iyyaanno laaffot miilotann,
"yerusaalemep anta diiyii."
kiden bawloosi lelen.
5 helpaan innu iyyaa kapi olanninkinnu kaysaaden innu antona sohanne,
dahenn haypanawoddonne meddodu olle kodden saparaanetteeshsh pakatet kapop innu olle aanen;
innu illo pakatet kapassenno kilpiyyann Mooha ollin dinkamann.
6 iyyaa innu hayyaden innu konka qallep fayanninikinno manaddop mitaaten.
7 innu illo tsiroose sohann sapara betsilemayise painn;
ullanno kaf qara nakaytot kaasann illo lashsh shakk ulli olann.
8 paareshadde ulla sohann illo sapara qisaariyatep ann;
ullanno man filibos se lel masmasunt leliyyu erkamampayyaan tapp ila nam shokko koddetepin kall illo iyyaa olle olann.
9 filibos talma afur iyyaan aatuma diiy him himiyy qap.
10 helpaan innu lashsh lekit ulli olanne himampayt akaapoos kidamiyyu yihutaatt dey.
11 himampayt settenno innu kapop dehaad illo salapaata bawloos qeedd harkoyyanne lukooyy hid illo,
"laaffot miilot orr ayhuta hin yerusaaleme kiyy appa salapaata sed sedep hidinan,
siip ayhuta kodda diiy tarpinninan hekidin."
kid.
12 helpaan innu sed dakayne innonne orr se ulla kiyyu ikkim bawloos yerusaalemep inxanninessin dinkamin.
13 bawloos lamm,
"maanaass sedep pooyan mutsuraaw dappusinnin?
antu oot mahh pold heka Yesus maalla yerusaalem hidamaaha kodda male toyaasenno hendikkisad."
hekid iyyaa mitaattiyy.
14 helpaan iyyat korsaaynu qeeddatta diiyye,
"sedeeshsh has pold koddu."
henkidin all diinn.
15 innu lashsh qoji ulli ollann kanna mehaddoonnun dikkisann illo yerusaalemep ann.
16 soollet qisaariya kishshu ilanno shakkan innu olle deyen;
iyyaanno ikkimin man minaason haysanninnos innu tur qeedden;
minaason qobiroosishsh hirayma qara Mooha amaan kida.
bawloos yayqoop kapop aan
17 helpaan innu yerusaaleme paine kafaannu masmasuntan innu qeeddaden.
18 paareshadde bawloos innu olle yayqoop kapop aan;
qimaaya maapar kristaanaatenno dahenn ulla kiyan kida.
19 bawloos iyyaa dahenn qara andot kaassad kanna,
erkamaan Moohot otant siip orr ayhuta kodda diiy ili iyyann erkayy dahenn shokkushokko iyyaa torr.
20 helpaan iyyaa sed dakayene dahenn pold aypisaden;
bawloosessenno,
"kafitte,
orr ayhuta ila iyyaan lek kumadan dihamiy ikkim amaanen illo dahin halitt muus lushatta qari qimiyan maxashanumiyan att heufut.
21 se orr ayhuta hin siip ayhuta kodda diiy ila kallaaniyass,
'meddaann karasa diiyyaa shoke tampet kaysisa diiyyaa' kidaann ikkim halitt muus qepinninan kollinnin kidamishshu hed qari ishaamamishshu hedakayen.
22 ammann maana koda hedikk?
arep deyaayt amm dakaya diinninamu.
23 semmaalla iyaan innu hedi lelinkinnu kodii;
otanshaynu ila orr silatet qapu nam afur kiyy.
24 iyyaan iolle aanii illo iyyaa olle immiiliyii;
ikkim mashshaddu haatanninan,
kodashshet daayy se man miilotatt daassamishshonno ootaaddu dayyii;
et sedep kodito,
hin hed qari ishaamam dahenn aypot koddinan illo hedenno mashshaytess halitt kaysisampayt koddaayt namat dahenn ufunaannina.
25 siip husslah ila hin amaaness lamm,
acac 'damaan suutanna dehaatta minin ooshshum dama diiyyaa;
diikanno dama diiyyaa;
horet issiipitt toxt dama diiyyaa;
arpalum ketta seekaadaa;
' kidiyyonno hentsaafin iyyaa hitin."
26 sekanna bawloos orr settenn aan illo iyyaa olle immiiliyy;
lashsh iyyaa uqqari immiilinninan awame ikkim koddintonne oot nam shokku shokkotess daayy se iyyat daanniyonno awwame ikkim kaysaanninu ufunusisaass man miilot altop kal.
bawloos man miilotates qapam
27 lashsh tappiyota kaysaatta dehaade orr ayhuta iyyaan huss issiyaate dey,
bawloos man miilotat akken illo siip qari sohashshiyen qapen.
28 "israaelet,
innu qarqaaraa!
nam hin siipaynonne halittaynonne man miilot sedenno shiittan iyy por heikkete siip se kiyyu dahenn kollinniyyu,
sedeeh kodda male siip ayhuta kodda diiy man miilot altopa kalisan por sed miili oshumusiyy!"
hekiden ullupen.
29 iyyaa maalla sedep kiden,
oot iyyaa sed tureesh tsirofiimos se nam efeson kodd iyy olle saparaalle akken illo afa bawloos iyyin man miilot altop aanep ikkinnaad maalla kida.
30 saparaan qallenno siipat dahenn orrqarioor illo orrat por heikketteeshsh tunen;
shokkohumin bawloos qapen man miilot talla allsohashshiyen illo esseteeh karfada harrat man miilot allduhamen.
31 orr settenno helpaan iyyaa bawloos ikasa fadene,
fesheqaann "sapara yerusaalem dahenn orqariooren" kidiyy sinkitt orr tor heka roomaa kapin paiyen.
32 semmaalla iyyat wottaattaradaanne sinkiyya orr tseetat iolle qapad feelantan aan orr se kapa paiyy.
orr settenno sinkitt tseet settettenne wottaattaradaayy akken illo bawloos tola ellashshiyyen.
33 kaadayt settenno hepai bawloos qap illo ikkim sansala lakkin hidaminu acac;
se kanna ikkim iyyat aynu koddenne maana kodaayy ufunaatta fad illo kaassad.
34 siip se ilanno pakatiddu akkan shokku kidiyyane,
paka shokku lamm hepila kidin;
sinkitt settenno ullupitta siip minan hekann ikkim shaakket kodd oot iyyat ufunaata fotta diiy maalla,
ikkim bawloosin por se orr tor ulla kallaanniyyanep anninani wottaattaradda acac.
35 helpaan bawloos por se orkann orkanna lekkashshet qapo pae,
siipat dahenn miir kaanin sohad illo iyy miida hinnaaden maalla,
wottaattar bawloos haiyy inxaan.
36 siipat lamm,
"heikawusamu!"
hekidin ullupin kannaashsh qalaytin.
bawloos ishaama iqara oorisat ishaam
37 helpaan wottaattarada por kallashaddote iyyin paxa dehaadene bawloos sinkitt settess,
"akkan shokkooh hed lela fottinhinamu?"
he ikid.
sinkitt hin illo,
"kap kirikket heufutamu?
38 att kiptsishsh helpa deha jiiayta sohashiyy nam ikayy nam kuma afurin murallep patad inhinemu?"
heikkid.
39 bawloos illo,
"antu ayhutishsh kiliqiya qalle saparaan ufunashame tsersesessin dalad;
tonhedess siip sed ishaamonu?"
heikkid.
40 ikkim siip ishaaminu helpaan it iyy daassante bawloos por se orkanna lekkashshet qapu qarass ell illo ikkim siipat rui kidinu harkan iyyaa akkiyy;
helpaan siipanno rui kide kapaddu heka ipretatenn sedep kid ishaama hir.