antona bawloos meqtooniyaanne kirikep
20
1 orqarioorot ell kanna bawloos soollet hemubusiyy kors illo andotin laxa kid meqtooniyaatep aan.
2 iyyat huss settin tarpiyo lel lekin iyyaa kors kanna huss kirikete paiyy.
3 ullassenno leha halpattass olad.
helpaan iyyat soriiyaap konkan anta qaapade,
orr ayhuta iyy qari sulattaaddu oot iyyat ufunad maalla,
meqtooniyaan tarpa mitaataass kutad.
4 orr iyy olle aanenno peeriyish se sopatsiros kidamiyyu imm birihusenne orr teseloonq ilanno aristsirokosenne sikonitos,
kayiyos se huss tarpete deyyyenne,
tsimootosenne orr huss issiya tikiqosenne tsirofimosenno kiyyan.
5 iyyaanno innu tureeshsh tarpen illo sapara tsiroataat innu lushen.
6 innu lamm serkila laaqqot kannan sapara filibisiyoseten konkan sohann illo lashsh heniyaate tsiroata iyy kapin pain illo lashsh tapp ulli olann.
bawloos muutaytaass tsiroataap aan
7 lashsh hirayta tappaatea laaqqot ollin moossab dama innu orqud qapanne,
bawloos oot iyyat parreshadde anta qaapad maalla orr se orqud qapam olle ishaamin;
ishaamaayyanno hak otant awwaddatat derayy.
8 faatt se innu uqqalli orqud qapan tallanno por leke issipot kiyy.
9 kolkolt shokku ewutsekis kidamiyyu lamm maskotet qarass laiyy;
oot bawloos ishaamayyall derayy maalla,
kolkolt hin tomawiy;
peot intawt illo iyyat elle erra faatt halppattiya qareett pei;
helpaan orrat iyy qeeddiyane hetoy iyyaa akken.
10 hekoddu male bawloos helekkad kolkolt se kapaxat kidd iketti qap illo,
"hekiyya naha diiyyaa!"
kid.
11 bawloos faatt se qallep mitaati illo orr Mooha amaaniyyu olle laaqqot moossad illo iyyaa olle dam;
hak lashsh parintosenno orr se olle ishaamattan olad illo aan.
12 orr settenno kolkolt se dinadenn manayyep aanen illo ikaanessenno kokkunt akkaden.
bawloos tsiroataashsh miilitsep aan
13 innu bawloos qeeddattassin tureesh konkan sapara asonetep ann;
innu maalla sedep kodin,
oot bawloos hak asonet lukkan anta qaapad illo "konkan anta" innu acac maalla kida.
14 helpaan innu ason orraxakkine ikkapopin qeeddin konkan miitsilenep ollin anta sohann.
15 paarreshadde ullan sohan utunnat kiyyoss kapin pain;
parshaneshadde lamm utunnat samosen tarpin lamasheshadde saparaan miilits kidamiya pain.
16 bawloos issiya helpa rawisa tura kid illo efesonin tarpa anta fad;
iyyat maalla sedep kod,
et fotto,
serkila lashsh hund heniyaate yerusaaleme kinnaatta oot iyyat qaapad maalla kida.
ishamaan bawloos qimaayya efeson kapa reehanniyo ishaam
17 bawloos miilitseshsh efesonep nam hit illo qimaayya maapar kristaana hembusiyy.
18 helpaan iyyaa iyy kapop deyene asset iyyaa kid,
"lashsh se antu uss issiyaatep deye hiran lashsh mina ikkim antu inn olle ashshann kallaad heufutan.
19 sulat orr ayhuta minan ikkaan miidamiyu nafenno ikkim antu ilmamanne dipatum kaanin ashshann pold erkayy heufutan.
20 mooraallessenno manayn tallassenno iyyaan ufunaatta inn fadusinniy dahennin inn kolliy male iyyaan antu inn lela male kap tarp amm hekiyanemu.
21 orr ayhutaatessenno koddu orr se ayhuta kodda diiyessenno dahenn juppot qara mitaatan ikkim Mooha kapop mitaatinan illo poldaaynu Yesus kristoos amaaninanessin iyyaa lel.
22 ammannenno lamm,
hin ulla an qari paina ufunaata malen laaffot miilot ani koomaannin yerusaalemep annin.
23 hekoddu male saparadaan antu uqqall anniyyu dahenn qalle ikkim rakkotanne hidanat an qari painan laaffot miilot anass lelin.
24 antu lel masmasunt heka dikkuma Mooha kollisaas,
erkamaan Yesus poldat an day hakan dikkinninos kiyyashawu nafessenno amm didisanninhinamu.
25 "toare,
hak ammannetessin inn kap mimmitaatan lel daamum Mooha inni ishaamin;
ammanneeshsh lamm inn ila nam shokkooh naf ikkim lakkiyya an akka fotta diinninos henxup.
26 semmaalla inn ila nam shokkooh naf et qishshawo,
kapi kaassawusama diittaawun inni ufnaytinnin.
27 qaap Mooha dahenn inn tura deka male innassin lel,
amm inn qara henhattiyemu.
28 maapar kristaana heka Moohac se iyyat diikayyind pidd qari lushaass laaffot miilot shinkama heeltayyetes inn kode mashshaynenne heelt se dikkiyyaa lushaa.
29 etin inn kapa reehhadu kanna orr siip Moohaat qaapatta diinniyyu iyyaan sessepaap nannayq kodd ikkim inn ilop kalinaness antu henxup.
30 settep lamm orr shakkan otanshayn ila sohanninan kollilaan kell kollisan orr se amaaniyyu ila orr lek issep mitaatinninan.
31 semmaalla shokku shokkotayne par halpattass lashsh min awaddann kallap ilmama pooyan se antu inn kors immashsh oorsattan illushadaa.
32 "ammannenno moohaanne lel dikkuma Mooha se inn qiqimisaassenne otant miilampayya ila tayma inn daatta fottinu harkassin inn haayy.
33 antu worqet shoke pirret shoke uuwaat nam amm henhadademu.
34 harkaawu hinin erkasan orr se an olle kiyyonne mashshaw ikkimin qarqaaress inn heufutan.
35 lel pold heka Yesus,
se 'nam qeeddanniyyu kapa nam daanniyyu ihartood' kidiyyu immashshi oorsattaannin harkoonnun erkasan tashampaya qarqaarot ikkim innu kapa fadamiyu paana lekennin akkiyy."