bawloos efesone
19
1 helpaan abiloos sapara qorontoosete kiyyo bawloos huss se qorontoos qudan kiyyon tarp illo efesone paiy;
ullanno soollet qoji akk
2 illo,
"helpaan inn amaantene laaffot miilot heqeeddatenemu?"
kid iyyaa kaassad.
iyyaanno,
"iyyokku,
amm henqeeddanemu;
laaffot miilot kinnaattaadd naf amm hendakaynemu."
hekiden iyy mitaattiyen.
3 bawloos illo,
"settekult ahalila hekannen ahalisanten?"
he iyyaa kid.
iyyaanno,
"ahalila ahalisampayt yewannis ahaliyenin ahalisamin."
he iyy kiden.
4 iyyat illo,
"yewannis ahalila juppot qara mitaata akkisaat ahaliy;
iyyat siipaassenno leliyo,
'se an kaneeshsh deyiyun amaanaa!
' iyyanno Yesus" he iyyaa kid.
5 helpaan iyyaa sed dakayene mahh pold heka Yesusen ahalisamen.
6 helpaan bawloos harkayy iyyaa qari qape laaffot miilot iyyaa qari lekkatt illo iyyaa kap pilan ishaamen;
himanno himen.
7 orr settenno nam hundan lakk pahatu kida.
8 bawloosenno man dinkam ayhutaatep annin leha halpatt oot daamum Mooha huura male siip ishaamaanne pata pahisan kollin.
9 lamm orr shakkan mutsurooddu ija kodattaan siip se ilaashsh paana pold qar hittisan,
'amm amaaninhinamu' kidiyyane,
kapa allsekaad soollet haw allqap illo por se antaraasha tsiranos kidamiyyu lashsh min kollinnin.
10 bawloos par lakkess sedep erkay;
siip huss issiya qalle kallaaniy dahenn,
orr ayhutaatenne kirket,
essete lel pold dakaya fotten.
shammot Moohot bawloosin erkusiy
11 moohaanno shammot kaant bawloosin erkayy.
12 sed minan marattotanne uuwaat dakint bawloosin iqappat qeedin baaqampayan qapannin iyyaa dinin;
laaffot nayqatenno allsohannin.
13 orr ayhuta iyyaan qayy sohashshisan errall anniya karatiddu "mahh Yesus se bawloos ishaamiyyon ikkim sohanintanessin inn acacin!"
kidaan mahh pold heka Yesus hemban laaffot nayq orr qara sohashisa ekkannin.
14 medda tapp heka asqewa ayhutish se kaadayt suukamma koddetenno settep koden.
15 laaffot nayq lamm,
"antu Yesus henxup!
bawloosenno henxup!
inn orrame?"
he iyyaa kidin.
16 nam se laaffot nayqatin qaapamenno qarop tor,
uuwaat pata allkakkaai iyyaan push allpepesayy,
iyyaa patpatt man se talla all feeladen.
17 helpaan orr ayhutaatenne kirket hin sapara efeson qalle kallaanniy dahenn sed dakayene hehuuren,
mahh pold heka yesusenno ikkaan serkisam.
18 orr se amaaniyyu ilanno orr lek erkaamaddu hin nayq pat pahinnin lelin puutsiyattan deyin kida.
19 sohayaan lekenno matsaafaddaan iyyaa uqqalle soyiyan orqudop qapen siip se ilaashsh alldoohiyen;
heriy matsaafaddaanett pirret tsaqaraa kuma hund hen koddaay.
20 paana sedenn lel pold qall paldattaanne pushan aan,
siip lekenno dakayy.
orqari sohatta siip efesonet
21 hin dahenn kodden kanna bawlooset huss meqtooniya kidamiyonne akayiyan tarpa yerusaalemep anta qaapad illo,
"etin ulla paiyo sapara romaatepin annina."
kid.
22 semmaalla orr se iyy hesiyu ila nam lakk,
tsimootosenne erasitsos meqtooniyaap hit,
iyyat mashshayy lamm haft issiya qalli lashsh qojji olad.
23 essete paana pold minan sapara efeson qall tulayya kaan sohaden.
24 nam shokku timetsiros kidamiyyu pirret ila sira soorumiyu paahnat torpab suutanna heka aritsimis kidamiy sooruman kodashshet lekit shumampaya akkusinniyu kiyy.
25 iyyat orr se pirret ila sira soorumiyonne orr pil iyyaan erkamaaddop kiyy erkanniy orqudop qap illo sedep iyyaa kid,
"meddu siip!
innu shorokum akkanninkinnu erkama hinin koddaaddu heufutan;
26 bawloos lamm,
'iyaan hark namatin soorumam amm moohaamu.
' kidaan sapara efesoneteeh kodda male por qoj pateesh huss issiya dahenn qalle ikkim siip lek amaanusiyy,
porayyep mitaattiyy inn mashshayness heakkiten,
dakayten.
27 erkamaannu hin tuffashamaah kodda male,
torpa artsemis se kaant,
hin huss issiyaatenne husslah dahenn ishoomanniyu aypot kodin;
lamm serkaadd hin kaan deesannin."
28 helpaan siipat sed dakayene miiran innaakkoden illo,
"artsemis hekat efeson it kaant!"
kiden ullupen.
29 saparaanettenno dahenn sesseyen.
siipanno kata bawloos nam lakka se orr meqtooniya kodd kayiyosenne aristsirokos qapen illo mooraallep tishen infeelen.
30 bawloos siip se kapop antass fad makess,
hekoddu male soollet iyy dawuren.
31 hayyot huss issiya ila iyyaan moyishama bawloos kodd ila karatiddu bawloos kapop nam hiten illo,
"mooraallep anta diiyii!"
kiden dinkamen.
32 oot otant siip ila orqari sohatta kaan kiyyu maalla,
orr lek maana maalla ikkim iyyaa orqud qapamen amm heupanemu.
semmaalla et nam shokku akkan shokku kidiyyo,
nam shokku lamm hepil lelin ullupin.
33 kaf orr ayhuta ila karatiddu se iskintir kidamiyyu aykusisaann siip turop tarpiyen;
siip ila orr shokku ikkim qiminu ootaaddu ishaaminu korsen;
iskintirenno siipat rui kidaass harkan akkiyy illo iyaa qara oorisa ishaama dikkisad.
34 hekoddu male siipat dahenn iskintir ayhutishsh koddayy iyyaa ufunaadene,
"artsemis hekat efeson it kaant!"
kidan saatet lakkep kishshu nass shokkoohin ullupen.
35 muutasha kela tsaafishsh saparaanett siip sett rui kidusiy illo,
"siip efesonete!
orr sapara efeson qalli kallaaniyyu torpa artsemis hin kaanenne paahnat artsemis se moontallett peit ikkim lushinaness aynu ufnaatta diiy?
36 oot nam sed marmiyu teek maalla,
ikkim rui kidintan illo iyaan nayq erkasa shakar kida qara illushannintanessin fadin.
37 orr torpa artsemis ponqa diiyenne moohaaynu qari lel otitta lela diiy qaften arep indeiten.
38 timetsirosenne shumamipayaan iyy olle kiyy nam iyyaa kasisiyan et kinnaado,
lashsh op horat uqqari quuriyan kiyy;
hayyotanno hekiyan;
ulli ordeehen.
39 et hepil iyaan inn fadishshan kinnaadane lamm orqudaqapama siip iyy ufunashamen toyamina.
40 hin inkinnekuless ikkim iyyaa hin awwi ari kodden,
'siip oriqari ooriyen' kidan innu inkasasinessin huurin;
'oriqarioora hin maana minan sohad' et kidan innu kaassadane iyaan innu mitaattinninu amm henqafnamu;"
41 hekid illo orr se orqud qapam ikkim purjaajinu kod.