bawloos sapara qorontoosete
18
1 sed kanna bawloos sapara atenaate sohad illo qorontoosep aan.
2 ulla ayhutishsh huss bantsoos kidamiyyu dalad aqiila kidamiyyu akk;
iyyanno oot qelawutos Daam rooma ikkim orr ayhuta sapara roomaate all sohanninan acac maalla,
haypaashayy birisqiila olle helpa qoji tureesh huss tsaaliyaateeshsh dey;
bawloosenno iyyaa kapop aan.
3 oot erkamaayy erkamaaddop tunkaan heddisa kodden maalla,
iyyanno iyyaa kapas kallaad illo iyyaa olle erkasa hir.
4 sampata min man dinkamaadotess orr ayhutaatenne orr kiriket olle ishaaman amaansisa ekkannin.
5 helpaan silaasenne tsimootos meqtooniyaashsh deyene bawloos,
"Yesuset kristoos" kidaan lel Mooha orr ayhuta kollisaan maanyetumin kokkaattann aan.
6 hekoddu male helpaan orr ayhuta iyy shiitten otene uuwaatayy hissis,
"patetayness inn kaasawusamina;
amm antu uqqalle henkiyamu;
sedeeshsh orr pila kapopin annina!"
iyyaa kid.
7 illo iyyaa kapa reehad man tiitoss se iyastsoos kidamiyyu manaayy man dinkam ayhuta kapa kiyotep aan;
nam settenno iyy Mooha huuriyyu kida.
8 qarisboos,
kaadayt man dinkam ayhutaatenno orr manayy dahenn olle pold amaan;
orr qorontoos iyyaan lek hin bawloos ishaamiyyu dakayen illo amaanen ahalisamen.
9 poldanno bawloosess awadd raaetin akkaad illo,
"huura diiyii;
rui kida diiyii;
ishaamii.
10 antu hed ollenn kiyy,
nam hed miidinu amm hekiyamu;
sapara hin qalle orr lekin qapa."
ikid.
11 semmaalla bawloos lel Mooha iyyaa kollisan paranne pak ulli olad.
12 helpaan kaliyoos peashisampayt huss akaayiya kodde orr ayhuta shokkohumann bawloos qari sohaden;
por horat quuraatepanno inxaanen illo,
13 "nam hin ikkim siipat paana halitt shiittiyun Mooha shoomanninoss kodusinnin!"
kiden.
14 helpaan bawloos iqara mitaatisa dikkisade kaliyoos orr ayhutaates sedep kid,
"inn orr ayhuta patandapat shoke nayqunt kaant inn qari erkawusam kid,
kaassiyaayn duupattannin inn qara dakayaay.
15 hekoddu male,
orshiittaann et oot lelatenne heka mahhadaatenne heka halittaynett koddo,
innann poru;
amm antu hinetti horat quurinhinamu;"
16 hekid illo por horat quuraate altaash all iyyaa sohashshiyy.
17 essete orraatini dahenn sohaden,
sostenes kaadayt man dinkam sheedda horat turi qapen tolen;
hin lamm kaliyoses amm hedakaysamadenemu.
bawloos antsokiyaap mitaat
18 bawloos kaf olle lashsh lekit qorontoos olad kanna iyyaa kapa reehad illo saparaan kenkiraos kidamiyap aan.
oot iyyat silatet qapu maalla,
ullass iqar haatad.
sekanna konkaan sooriyaap anta sohaden;
aqiilanne birsiqiilanno iyy olle kiyaan;
19 helpaan iyyaa saparaan efeson kidamiyin paene aqiilanne birsiqiila ull diiyy;
man dinkam ayhutaatep kal illo orr ayhuta olle ishaam.
20 ikkim helpaan lek iyyaa kap olanninu iyyaa iyy kaassanniyane amm owo hekidemu.
21 hekoddu male,
"et has Mooha koddo aww pilan inn kapop mitaatina deyina."
he iyyaa kid illo efesone sohad konkan aan.
22 helpaan iyyat saparaan qisaariya kidamiya paiye,
yerusaalemep aan maapar kristaana qara paanussa lel illo antsokiyaap lekkad.
23 ullasenno helpa qoj olad;
sekanna huss kalaatiyaatenne firikiyaall por shokkooshsh por shokkop mimmitaatan kristaana kokkiy.
abiloos qorontoosepanne efesonep antaay
24 ayhutishsh abiloos kidamiyyu iyy sapara iskintiriy qalli dalad efesonep dey;
iyyat nam matsaafa miilot qimisad kollenne ishaama fottiyyu kida.
25 nam hin ipaana pold koll,
oot Yesus paana pahin ishaamiyyonne haalawa haalawan kollinniyyu kida;
hekoddu male iyyat upu ahalila yewanniseeh kida.
26 iyyat huura male man dinkam ayhuta talla ishaama hir;
hekoddu male helpaan aqiilane birsiqiila iyy qara dakayene manaddop inxaanen illo se tureeshsh qara tawu paana Mooha pata pahiyen iyyi ufunaytiyen.
27 helpaan abiloos huss akaayiya kidamiyop anta qaapade kafat qaapaayyen senen;
kaf hin ulla kiyyu ikkim paana dikkin iyy qeeddanninaness woraqata itsaafen.
helpaan iyyat ulla paiye orr se dikkuma Mooha minin amaaniy ikkaan qarqaar.
28 settenno Yesuset kristoos koddaayy matsaafa miilot qalle ikkaan ishaaman orr ayhuta shiittin siip ilett pushin kida.