rakkot teseloonq sohatt
17
1 helpaan iyyaa saparaddaan amfibolisenne abolooniya kidamiyin tarpene teseloonqep aanen;
ullanno man dinkam orr ayhutat kiyy.
2 qum kollinashayyetep bawloos man dinkam settetep aan;
sampata halpattassenno matsaafa miilot qalle siipi akkisan kolliy.
3 kristoosess rakkot qeeddattaanne toxt ila sohattot iffadusisaayy patapahiyy kolliyy illo,
"Yesus hin,
awi antu inn leliyyu,
kristoos kida."
ikkidin.
4 iyyaa ila orr shokku lel sett dakayen illo bawloosenne silaas olle kinnaaden.
settep lamm kirikket iyyaan Mooha huuriy iyyaan lekinne saparaan qalle iskatt ufunasham iyyaan lek lel sett qeeddaden illo olle kinnaaden.
5 lamm orr ayhuta maxashanuman siitampayaan erkama dap paana kapa orqudi qapen illo iyyaa qari sulen;
saparaan qall tulayya sohashiyen;
bawloosenne sillaass qapa illo siip daatta man iiyaason mantaren.
6 hekoddu male helpaan iyyaa bawloosenne silaas dapene iiyaasonenne orr amaaniyyu ila karaddu kaadayya saparanettet dehasa tishen inxaanen illo,
"orr hin husslah dahenn orqari sohashshiyyen,
ammann lamm arep deyyen!
7 iiyaasonenno manayyep iyyaa qeeddad;
iyyaa lamm dahenn,
'daam pil iyy Yesus kidamiyyu kiyy.
' kidan halitt Daam roomaa shiittin."
kiden ullupin.
8 helpaan siipanne kaadayya saparaanett sed dakayene orqarass ooren.
9 iiyaasonenne orr shokkonno waas hembusiyen illo allhayyen.
bawloosenne silaas peeriyaalle
10 kafat shakar kiden bawloosenne silaas awaddatin saparaan peeriya kidamiyap hiten;
helpaan iyyaa ulla paiyene man dinkam ayhutaatep kalen.
11 oot orr ayhuta hin peeriya kiyy hin teseloonqe kiyy kapa iyyaan qaap dikk qap kodden maalla lel Mooha masmasunt kaanten qeeddaden;
lelaaddu shaakket koddaayy ufunaattaassenno lashsh min matsaafadda waarusinnin kann fuqin.
12 semmaalla iyyaa ila iyyaan lek amaan;
orr kirikk ilanno iyyaan lek iskatt shorokiyyaanne diidda heamaanen.
13 hekoddu male orr ayhuta hin teseloonqe kiyy bawloos peeriya lel Mooha lelaayy helpaan iyyaa ufunaadene ullop aannen siip sulen tulayya ulli sohashiyen.
14 essete kafat shakar kiden bawloos pakatet kapop hiten;
silaasenne tsimootos lamm ulla peeriyaas haten.
15 orr bawloos hayyad hak saparaan atena kidamiyatess iyyin paen;
illo acac bawloos se,
"silaasenne tsimootos olatta male shakar kiden an kapop deyen" kidiyyun peeriyapa mitaaten.
bawloos sapara atenaate
16 helpaan bawloos sapara atenaati silaasenne tsimootos lusha qara kiyyo,
suutannaan siipat ishshoomanniyun saparaan innaakotaaddu akkaayyen jemperayy.
17 semmaalla man dinkamaaddu talla orr ayhutaatenne orr se Mooha huuriyyanne orr iyyat kapiyalleesh lashshmin akkiyyu olle ishaamin.
18 orr ufunat kann fadiyy ipikoroosanne isitoyka kidamiyy iyy kapop deyen illo iyy shiitta hiren.
orr shakkan,
"kapelayt hin maana kida fadin?"
hekidin karatiddu lamm,
"afa oot moohada awshiyya ishaamiyyop kinnaan" hekidin;
sedep iyyaa maalla kiden,
oot bawlooset toxt ila sohattaanne lel masmasunt heka Yesus ishaam maalla kida.
19 bawloosenno hemben por se ariyosfakos kidamiyyu orrat ulli orqud qapamiyop indeyen illo ikkidene,
"kollila awshiyya hin att kollinnishshu maana koddaaddu ufunaatta fottinhinnamu?
20 iyaan kessuma kodd innu ishaant,
innu maana koddaaddu ufunaattan fadin."
21 iyyaa sedep kidiyyan,
oot orr atenaatenne orr huss pil hin atenaa kallaanniy dahenn akkan awshiyya ishaamanne dakayaaseeh helpaaddu ushiisa hoxsanniyan maalla kida.
22 bawloos siip se ariyosfakos qalli orqudi qapam turass ell illo,
"orr atenaate!
dind heikketen iyaan inn iamaanishan qafnaattayn henxishaak.
23 saparaann qall antu mimmitaatiyyo porada inn ull shoomannishshan helpaan antu tooyiyyo por laaqqa hin,
'mooha se ufunashama diinniyos' kidiyyu qari tsaafamin akk;
ammann lamm antu inni leliyyu oot Mooha se inn ufunnaatta male ishoomannishanet kida.
24 Mooha se husslahatenne iyaan uqqara kiyy dahenn uum;
iyyat pold moontatenne heka husslahat;
amm iyyat man miilot se hark namatin diham talla kallaanniyamu.
25 iyyat kiyyatanne laaffotanne hepilanno dahenn iyy nam daanniyyu kodd maalla,
amm iyaan ikellawi hekiyanemu;
hesayma namatenno amm ifadusinniyamu.
26 iyyat siip hawhawu kiyyu dahenn nam shokkooh ila uum;
ikkim husslah qara kallaanninan kod;
por iyyaa ulla kallaanninanenne sapan iyyaa uqqalli kallaanninan iyyaa qoot.
27 sedep iyyat maalla kod,
ikkim orrat Mooha kann fadan iyy akkatta fottinanes kida;
hekoddu male iyyat shokkushokkotaynu kapa amm hesekaademu.
28 'innu kiyyat qafnaann sesseyinkinnu,
kallaanninkinnonno iyyann kida;'
sedenno qum orraann hin daassot daassanniyy
'innu dahaynon meddaayy' kidenep kida.
29 semmaalla innu medda Mooha koddine,
'moohot,
hin qaapanne sooritum namatin soorumam;
worqet shoke pirret shoke dakalla paahnaannin.
' kida qaapatta amm innu fadusinnishshamu.
30 Moohot,
hin orrat olo iyy ufunaatta diittaaddun erkayyen duupattaann all diiy,
amman lamm ikkim nam por heikkete kiyyu dahenn paana nayqunt qara mitaatinoss acac.
31 maana maalla,
Moohot lashsh iyyat nam se iyyat pahisad kapin husslah qari tsillotin horat quurinu qapad.
toxt ila iyy sohashisan nam heikketi sed patpahiyy.
32 lel se,
"toxt ila sohatta" kidiyyu helpaan iyyaa dakayene orr shokku iyy qarass beejjiyaden;
shakkan lamm,
"oot sed helpa pilan hed qara dakayinna."
ikkiden.
33 sekanna bawloosenno iyyaa ila reehad taw.
34 diiddaan qoji lamm bawloos olle kinnaaden illo amaanen;
orr se amaan ila orr daaet ariyosfakos kodd tiyonasiyos kidamiyonne iskattet tamaris kidamishonne orr pil iyyaan lekenno kiyan kida.