tsimotoos bawloosenne silaas olle antaayy
16
1 bawloos saparaddaan tarpenne listsra kidamiyaap aan;
toare,
nam Mooha amaaniyyu tsimotos kidamiyyu listsra kiyy.
inkoshiyy kristaana illo ayhutishet ;
appaayyl amm kirikishsh.
2 kaf listsraanne iqoniyone kiyyu iyaan dikk ootaayy ishaamin.
3 bawloos iyyann iolle anta fad illo oot orr ayhuta hin ulla kiyy dahenn appaayy kirikishsh koddaayy upan maalla karrasusiyy.
4 helpaan iyyaa saparaddaallin tarpiyane hin qimaayaanne orr hitaym yerusaalem woken ikkim lushanninan qaapusiyen.
5 seminan maapar kirstaanatenno amaantetin qimin;
iyyaan amaaniyanno lashsh min lekan annin kida.
bawloos meqtooniyaap hembam
6 bawloosenne silaas huss issiya qalli lel Mooha ikkim iyyaa inlelin oot laaffot miilot iyyaa dawurit maalla,
huss firkiyaatenne kalaatiyaatenn tarpen.
7 helpaan iyyaa heel huss miisiyaate paiyene huss pitaaniya kidamiyop antaas qaapaden makess;
hekoddu male laaffot Yesus ullop anta iyyaa dawurt.
8 semmaalla miisiyaan tarpen illo saparaan tsiroaata kidmiyap aanen.
9 bawlooset awad meqtoonishsh shokku,
"meqtooniyaap tarpii illo innu qarqaarii!"
kidiyyu iyy dinkamiyyo raaetin akk.
10 helpaan bawlooset raaet akk kanna esseteehin meqtooniyaap anta dikkisann;
hin sedep kodden,
ikkimin orr meqtooniyaatessenno lel masmasunt lelinnu poldat innu hembaayy oot innu ishaakin maalla kida.
liitiy Mooha amaanaadd
11 tsiroaataashsh konkannin utunnat saamotiraq kidamoshshop ann;
paarrashadde saparaan nabuli kidamiyapin ann.
12 lamm innu ulla sohanne filibisiyosen painn;
filibisiyoset saparaan kaan meqtooniya qalle kiyy;
huss orr roomaa qapaden kida;
sapara hin qallessenno lashsh qojin tarpinn.
13 lashsh sampataate por innu ulli dinkamanninnu fadaan saparaalle sohann,
haq shokku kapop ann,
ulli lainn illo iskatt se orqud qapam lel Mooha kollin.
14 iskatt se ulla kiyyu ilanno iskattet shakk liitiy kidamishshu sapara tiyaatsironet dalatt uuwaat roomat kashishshu Mooha huurishshu kiyy;
iyaan bawloos ishaamiyyu dakayyaass poldat mutsuraadd qahiyy.
15 itanne orr manaadd dahenn ahalisamen kanna,
"Mooha amaanaawu et ishshaakitan koddo,
hooyaa manaawu kallaadaa."
kidit innu dinkamit.
bawloosenne silaas sapara filipisiyosete
16 lashsh shakka helpaan innu por dinkamatep anninkinno ayleet shakk laaffot soumatin farot lelishshu paanaalle innu mini pai;
aylet hint soumann orr se it peashinniyoss kodashshet lekit kalinnin.
17 it bawloosenne innu kann antaann,
"orr hin erhama rumma heka Moohaat!
iyyaa paana dinaat inn lelin!"
hekidin ullupin.
18 lashsh lekitess qar oxoort sedep kodit;
bawloos lamm hemiirood illo mijiri kid "ikkim mahh (irrot) Yesus kristoosen italle sohannintossin hed acacin!"
ikid.
laaffot oshshittet settenno esseteeh qalle sohatt.
19 orr it peashinniy irraxatet se iyyaa kodashshetin akkanniyan quuramaadd akkenekuless bawloosenne silaas qapen,
kaadayya hussaaddu turop mooraallep dehayen.
20 hayyot orr roomaa kapop inxaanen illo,
"orr hin orr ayhutaat illo saparaannu qalli tulaya sohashinnin;
21 tampet innu orr roomaa qeeddatot innu fadusisa diitt kollinnin."
kiden.
22 siipanno dahenn shokkohumin iyyaa qari sohaden.
hayyotanno bawloosenne silaas pata uuwaat furusiyen illo ikkim halittin tolaminan acacen.
23 iyyaa ikkaan tolusiyen kanna man hidanatep kaliyen ikkim qiminninu lushinu waartiya acacen.
24 waartiyishshanno acaca se qeeddad kanna man hidana sett talla por se kann ooriy tallop iyyaa kaliyy.
lukkaaddonno qoyr olle birqiyy hid.
25 awadd joppe bawloosenne silaas dinkamanne laaletann Mooha aypisannin;
orr pil hin hidam lamm iyyaa dakassannin kida.
26 farnaatta male shilda kaan hak sheeht man hidana sett sesseynu kodden;
karfaddaan dahenn esseteeh qahisamen;
sansala orr se hidametenno fursam.
27 helpaan waartiyishsh hin peot ila hay,
karfada man hidana dahenn qahisamaaddu akke,
afa orr hidam dahenn passadenepa ikkinnaad iyyat ixikasa pillaw pushad.
28 bawlooset lamm "dahetaynon aren kinna,
imiida diiyii!"
hekid nass kaanin ullup.
29 wartiyishsh hinet 'ispan an deyaa!"
hekid illo man hidan tallop luum helishattan lukka bawloosenne heka silaas qari sunk;
30 altaash iyyaa sohashiy illo,
"poldalla,
dinaass maana koda an fadusinnin?"
ikkid.
31 iyyaa illo,
"Yesus pold amaanii dinannihhinta;
orr manayytetenno dinanninan;"
ikkiden.
32 lel poldatenno iyyanne orr manaayyeti lelen.
33 esseteeh awaddat sette waartiya man hidan sett iyyaan aan peesashaddu qaranno ijjiq illo iyyanne orr manaayy dahenn ahalisamen.
34 sekkannakules bawloosenne silaasenn manaayyep aan illo dama iyyaa dehayy;
oot orr manaayyetenne iyy Mooha amaanen maalla,
orr manayy dahenn olle masmasen.
35 helpaan lashsh parite hayyot siip,
"orr sett allhayyaa!"
hekiden orraddu hiten.
36 waartiya man hidan settetenno,
"ikkim hayyamintanes hayyot nam hitene,
sedeeshsh sohaadaa illo andotin aanaa."
hekid bawloosi lel.
37 bawloos lamm "innu iyyaan orr roomaa kodd qari horat quurant kinnaatta male mooraalli innu tolen illo man hidanatep innu kaliyen.
amman lamm man hidanate deketi innu hayyimu?
amm koddintamu!
iyyaa mashshaddu deyen innu hayyyenii!"
hekid iyyaa mitaattiyy.
38 orr se hitamenno hin ishaamam hayyot lelen;
hayyot settenno bawloosenne silaas orr roomaa koddaaddu ufunaadene hehuuren.
39 semmaalla hedeyen alhattot qara kaasawusaden illo man hidanate allhayyen;
ikkim saparaan qalle allxanninan dinkamaden.
40 bawloosenne silaasenno man hidanate sohaden illo man liitiyap kalen;
ullanno kaf akken kokkiyen illo saparaan qalle allsohaden tawen.