orqudiqapama yerusaalem kodam
15
1 orr karaddu huss yihutaateett antsokiyaap dey illo,
"tampet se muus daasant mitti et karasama diittane amm dina fottihhintanemu" kidan kaf kollinnin.
2 bawloosenne parnapaas sed minan orr se olle jiiaytaanne shiitta kaan qallep kalen.
sekanna bawloosenne parnapaas ikkim kafaaynu hin antsokiya kiyy karaddu olle yerusaalemep anninan illo ishaama hin orr hitaymatenne qimaaya dehanninan wokant.
3 semmaalla iyyaa maapar kristaanaten hitamen aanen;
helpaan iyyaa huss se finqe kidamiyyonne samaariya kidamiyyun taripiyane siip ayhuta kodda diiy por moohaatep mitaataaddu ishaamen;
ishaama hinenno orr se kristaana kodd dikkiyen masmasusiyen.
4 helpaan iyyaa yerusaaleme paiyene maapar kristaanaatenne orr hitaymatenne qimaayaanno iyyaa qeeddaden;
orr se hitamenno Moohot iyyaa olle kiyattaayyen hin iyyat erkayy dahenn iyyaa ishaamen.
5 hekoddu male orr faraset hin amaaniy ila karatiddu hesohaden illo,
"siip hin ayhuta kodda diiy ikkim karasaminanenne halitt muus lushanninan koda fadusinnin."
kiden.
6 orr hitaymatenne qimaayya oot ishaamaanettet orrturi oorisaass orqudiqapamen.
7 shiittaan lek kanna betsiroos errass elli illo,
"kafoot,
siip ayhuta kodda diiy ikkim kapaawalle lel masmasunt dakayan Mooha amaaninaness sed tureesh Moohot otanshayn ila ikkim an pahiyes heufutan.
8 Mooha hin mutsura nam upu qum iyyat laaffot miilot innu dayyep iyyaassenno daattan iyyaa qeeddattayn maanyet iyyaa kodd.
9 oot Moohot mutsuraaddu amaantetin miiliyy maalla otanshaynonne otanshaddu tallass amm reehaytet hekodemu.
10 lamm appadaannonno koddo innonno qampar innu haisa fotta diinninkinnu holma orr se amaaniyyu qari hausisan maanaassin Mooha ekkawusannin?
11 innonno qumaaddop dikkuma pold heka Yesusen dinattaynu amaaninkinna."
12 essete siip hin ulla orqud qapam dahenn rui kiden illo bawloosenne parnapaas ishaakanne yeeshutta Moohot otant orr se orr ayhuta kodda diiy ila iyyaan erkusiyy dahenn iyyaa ishaamiyane dakassannin kida.
13 helpaan iyyaa ishaamaaddu kaysiyene yayqoop sedep kid,
"kafoot,
an qara dakayaa,
14 Moohot siip mahhaayyin hembaminu otant orr ayhuta kodda diiy ila pahisattass ashshann ikkim iyyat tooy simoon torr.
15 ishaama himampayyaatenno lel sed olle senin;
sedenno se sedep kidant tsaafant kida,
16 'sekanna mitaatinhina;
man taawit se sunk ellashinnina;
se pulpulamenno ussaytinnina soorumina
17 antu maalla sedep kodinu,
orr se hat
siip ayhuta kodda diiy mahhaawun hembam dahenn ikkim an pold fadinanes kida;
18 Mooha hin olo hir sed ufunayitiyy sedep kidin;'
19 "semmaalla qaapaawu,
ikkim innu siip se orr ayhuta kodda diiy por moohaatep miitaatiyu inrakkusinnines kida.
20 hekoddu male,
'damaan suutanna dehaatta minin oshum dama diiyyaa;
arpalum qara sekaadaa;
soha horet qohiquurama diikat ila all urqa male siipotin toxt dama diiyyaa;
diikanno dama diiyyaa;
' kidinaa iyyaa tsaafinaa.
21 maana maalla,
olo hiran halitt muus sampata min man dinkam ayhuta talla waarusisamin,
lel moohaatenno settep sapara dahenn qall lelamin."
taptaapet se orr amaaniyyu tsaafant
22 sekanna orr hitaymatenne qimaaya maapar kristaana dahenn olle kodden orr qoji siip se orqud qapam ila pahisa illo bawloosenne parnapaas olle antsokiyaap hita senen;
semmaalla kafaaynu ila iyyaan sinkiyya koddan ufunaysham,
yihuta se parsapaas kidamiyonne silaas pahiyen.
23 taptaapet se tsaafantenno iyyaa qari hiten;
tsaafaanettenno sedep kidin,
"innu kafaayn,
orr hitaymatenne qimaayya,
inn hin antsokiyaanne soriyaanne kiliqiya kallaanniyanne siip orr ayhuta kodda diiy ila kafaaynu koddess paanussan inn dehannin.
24 innu ila orr karaddu iyyaan innu iyyaa acaca diinn inn kapop aan,
lel se iyyaa inn lelenen ikkim inn payahiyenenne it hallutta inni koddit hendakayn.
25 semmaalla orqudiqapamaaynu kanna,
bawloosenne parnapaas iyyaan hoxsasham olle kafaaynu inn kapop hitaassin senn.
26 bawloosenne parnapaas oot poldaaynu Yesus kristoos maalla iyyaan iddayy kida.
27 hin innu inni tsaafin ikkim kapannenno inni lelinanessin yihutaanne silaas hitin.
28 hin fadusinniy arikannaatt kiyy pateeshsh haisot pil ikkim innu inn qarass inhausinnines laaffot miilotanne innoss,
hin iyaan dikk koddaaddun akkin.
29 damaan suutanna dehaad dama diiyyaa;
diikanno dama diiyyaa;
soha horet issiipitt toxt dama diiyyaa;
arpalum qara sekaadaa;
hin qara et illushattanne iyaan dikk erkannin kida;
andotan laxaa."
30 orr se hitamenno hesohaden illo antsokiyap aanen;
orr amaaniyonno orqudi qapen illo taptaapet se iddayyen.
31 helpaan kristaana ulla kiyyu tapitaapet se waarusiyene,
lel se nam kokkokkinniyonn allmasmasen.
32 yihutaanne silaasenno,
oot iyyaa himampayya kodden maalla,
kafaaynu illekess lel moohaatin korsen kokkokkiyen.
33 yihutaanne silaas lashsh qoj ulli oladen kanna,
kafaaynu hin amaaniy kapa andotin sohaden illo orr se iyyaa hit kapop mitaaten.
34 [sillaas lamm ulli all hataass kutad.]a
35 bawloosenne parnapaasenno kristaana pil iyyaan lek ollenn lel pold kollisaanne ishaaman antsokiyaall oladen.
36 lashsh qoji kanna bawloos parnapaases,
"hooyii innu mitaatinu illo kafaannu ashshann kiyattaaddu ufunaatta saparaaddaan innu lel pold ulla lellep annu."
he ikid.
37 parnapaasenno yewannis se marqoos kidamiyyu ikkim iyyaa olle anninoss fad.
38 bawloos lamm ikkim nam hin iyyaa olle anninu amm hefademu;
iyyat maalla fada diiyenno,
oot iyyat binfiliya iyyaa ketta reehad illo lakkiyya erkama iyyaa olle anta diiy maalla kida.
39 sed minan bawloosenne parnapaas ikkaan orshiitten illo orketta reehaden;
semmaalla parnapaas marqoosenn iolle utunnat qobiroosetep konkaalle aan.
40 bawloos lamm silaas pahisad;
kafanno bawloos hark pold qalli haayen illo iyyat aan.
41 iyyat illo maapar kristaana se lek kokkokkisan huss sooriyaatenne huss kiliqiya qallin tarp.