hitaym bawloos
orr roometes
1
1 bawloos,
aylet Yesus kristoos se nam hitaym kodda hembam,
lel masmasunt heka moohaatenno lela pahisam kapa hitaym hitam.
2 lel masmasunt sedenno irraxatet se Moohot himampayya kapin matsaafa miilot qalli dayy kida.
3 lel settenno oot meetaay poldaannu Yesus kristoos,
se nam koddan,
hotta taawit ila dalad;
4 settep lamm laaffot miilumaatin toxt ila sohattaayin meet Mooha koddaayy irrot kaantin ufnaytisamet lelin.
5 ikkim siipat dahenn Mooha amaaninonne iyyi acacaminu kodaass Moohot mahh kristoos minan daayy se nam hitaymat innu kodinu innu day;
6 innanno ikkim heka Yesus kristoos koddintaness otant kaf se hembam ila kishshan.
7 inn iyyaan moohan hoxsashamenne miilampayya kodda hembam roome kishshan dahenness,
Mooha appaaynonne Yesus kristoos pold kapa has dikkanne andot inni koddenii.
dinkam aypila
8 oot amaanteshinn husslah dahenn qari dakaysamaatt maalla turassin qattinnin inn minin Yesus kristoos kapin moohaawu aypisannin.
9 lashsh min dinkamaawun inn qaapattaawoss Mooha se antu lel masmasunt oot meetaayyet kollisaan mutsurooyyu dahennen iyyi erkanniyyu maanyeshawu.
10 amman lamm et has Mooha koddo,
inn kapop deyaas ikkim paanaawu an pahinossin lashshmin Mooha dinkamannin.
11 daayy laaffot miilot se ikkim amaantetin qimintan inn kodinu inni qootaassin inn akka darrayyin;
12 sedep kidaawonno,
amaantet se innanne an ollin qafunun ikkimin orrkokkokkinninoss kida.
13 kafoot!
qum antu siip pil ila orr lek iyyaan amaaniyy akkadep inn ilanno iyyaan amaaniyy akkattaas helpa leken qaapad makess;
hekoddu male hak ammanet dawramaawu ikkim ufunaannintanessin fadin.
14 orr ufunat qaponne iyyaan ufunaat dap,
iyyaan kollinnat qapanne kollinnat dap kollisass kuur an qara kiyy.
15 semmaalla inn iyyaan huss roomet kallaanniyyassenno lel masmasunt kollisan fadin.
lel masmasunt irrot Moohaat
16 lel masmasuntatin amm lilmaanninhinamu;
maana maalla,
lel hin orr amaaniyyu dahenn dinisaass irrot Moohaat;
settenno turiqattass orr ayhutaatess,
settep lamm orr ayhuta kodda diiyessenno kida.
17 maana maalla,
qum it "tsillampayt amaantetann kallaannina" kidant tsaafantep,
lel masmasunt sed,
Moohot nam tsillampayt kodiyu,
hiraymaashsh hak muutaytaat amaantetin koddaadd lelin.
nayqunt orrat
18 orr nayqunshaddun ikkim shaakket inxishaahamannin kodiy,
Mooha huura diittaaddonne nayqunshaddu dahenn qarass jiixayta Moohaat moontallett deyina.
19 maana maalla,
oot Mooha ufunaattat hin iyyaa fadusinniyy,
Moohot patpahiyy iyyaa ufunaytiyy.
20 kinnat Mooha hin hak husslah uumameesh hirtete akkaatta diinnishshu,
settenno irroshayy heka parparatenne moohumaayy,
hin iyyat uum kapin patpah akkaad maalla,
orrat nayqunt iyyaa erkanniyyaneys iyaan iyyaa qari marmanninan amm heqapanemu.
21 iyyaa Mooha ufunaatete amm serkaanne aypilaan qum moohumayyet iyyi fadusinniyy iyyi hedayyenemu;
qaapaaddonno aypot kodd;
mutsuraaddu hin qaapatta diinniyyaanno hepoorinnaawen.
22 "innu ufunampayya" kiditete eepayya kodden.
23 Mooha se toya diinniyyu shoomatta kapa,
paahnat nam se toyinotenne hekat hampiraatenne heka iyyaan lukka afur qapatenne uuma lahin soohiyyotess shoomaden.
24 semmaalla Moohot ikkim mashshamashshaddu dakinshaddun iyyaan nam deesanniyy ollin erkanninaness hadashaddu se nayq oshshuman innaakkott turass all iyyaa diiy.
25 iyyaa illo shaakket Mooha eerpan oohen,
uumampayt alldiiyyen hin uumami shoomaden,
ierkayyen.
hekoddu male,
uumampayt haka parparatess iyy aypisam;
ameen.
26 semmaalla Moohot hadat nam liilinnishshu turass all iyyaa diiyy.
iskattaddu nafenno pexashshet op diirt olle pexanniyan all oohen iskattanne iskatteeh ollin pexaden.
27 settep lamm diiddaanno pexashshet op iskatt olle pexanniyan all oohen diirtanne diirteeh ollin pexatta hadaden illo ollin ooshshumen;
horat se erkamaaddu hin nayq minin iyyaa fadusinnishshonno mashshaddu qeeddaden.
28 "Mooha ufunaattot maana innu kodina?"
kidaaddu minann Moohot ikkim iyyaan iyyaa liilinnin erkanninaaness qaap awtadapi all iyyaa diiyy.
29 semmaalla iyyaa nayqunt heikketenn,
qarakalaann,
yeimaann,
ururumaann,
toqaytilaann,
nam ikasaann,
tulayyaann,
nam eepumusisaanne hadat nayqatenn innaakkooden;
settep lamm kexemampayya,
30 iyyaan mahh nam patinniyy,
Mooha qar hittinniyy,
nam tuffanniyy,
foojampayya,
ipeepiyy,
nayqunt koda paana fadanniyy,
lemmooddu acacama diinniyy,
31 qalliqaapatta diinniyy,
olli senat pulpuliyy,
hoxsunt dap,
nam mutsurootta diinniyy kodden.
32 halitt Mooha se,
"iyyaan hin erkanniyy dahenness toxt ifadusinnin" kidiyyu ufunaattete hin erkannin;
erkassaah kodda male orr sedep kodiyonno aykusinnin.