hitaym bawloos shokkiyya
orr qorontoosetess
paanussanne aypila
1
1 bawloos se has moohaatin nam hitaym heka Yesus kristoos kodda hembamenne kafittaaynu sostenes kapa,
2 maapar kristaana heka Mooha se sapara qorontoosete kiyyo,
hin Yesus kristoos iyyaa miiliyyenne miilampayya kodda hembam,
settep lamm iyyaan mahh Yesus kristoos se poldaaynonne poldaaddu kodd por heikketi hembiyy dahenness;
3 Mooha appaaynonne Yesus kristoos pold kapa has dikkanne andot inni koddenii.
4 oot Moohot Yesus kristoos kapin daayyaayy dikkumooyyin inni dayy maalla,
inn minann helpa mittin Mooha aypisannin.
5 paana heikkitenn ishaama ishaamaannenno koddo ufunat kristoos kapann heshshorokuntenn.
6 maanyetum se innu oot kristoos inni lell heqimsatten.
7 semmaalla inn dexema poldaaynu heka Yesus kristoos lushattan kallaannishshane daayy laaffot miilot shokkooh naf amm inn qara kellawinemu.
8 lashsh dexema poldaaynu heka Yesus kristoose ikkim haasutta male kinnaannintaness iyyat hak muutaytaatess inn qiminnina.
9 Mooha hin ikkim meetaayy poldaaynu Yesus kristoos olle shokkohum qafnaannintani inn hemb,
iyy amaanam.
reehaytot amm otant kristaana qalle fadusinniyyamu
10 kafoot!
reehayta otanshayn ila kinnaatta diiyyu.
dahaynenn ikkim ishaama shakkanooh ishaamintan,
mutsura shakkanoohanne qaap shokkoohin olli senintanessin mahh poldaaynu heka Yesus kristoosin antu inn dinkamannin.
11 kafoot,
otanshayn ila shiitta kiyyaataaddu orr man qeloi kapan dakayy.
12 settenno se inn mashshamashshayn,
"antu heka bawloos;"
"antu heka abiloos;"
"antu heka betsiroos;"
"antu heka kristoos" olli kikkidishshan kida.
13 kat kristoos qall heqootamemu?
bawloos inn maalla herahhamemu?
shoke inn ahalisanten mahh bawloosennemu?
14 oot antu qersiboosinne kayiyos pateeshsh inn ila aynonno ahalisa diiy maalla moohan aypisannin.
15 semmaalla nam mahh bawloosennin ahalisam kidinu amm hekiyyamu.
16 dukkess,
orr man istsifaanos ahalisaawu shaakket;
hin pateeshsh nam antu ahaliyy amm an mashsha hekiyyamu;
17 maana maalla,
kristoos an hit ikkimin lel masmasunt lelinoss male amm ahalisaassemu;
masqalet kristoos aypot kodda allhata tura lel masmasunt antu kollinniyyu amm ishaamaan ufnat namatin koddetennemu.
kristoos qall ishshaakaanne irrot Moohaat
18 lel hin kristoos masqalet qarass rahham toy kidiyyu orr se allpatiyyoss eepum,
lamm innu iyyaan dininass irrot Moohaat.
19 "toxare ufunat ufunampayya allinpatinnina;
qall ishaaka ufunampayyatenno aypotassin kodina."
hekidant tsaafante.
20 kat qall ishshaakampayt ahayla kiyy?
kollisampayt halittatenno ahayla kiyy?
nam ishaama uponno ahayla kiyy?
Moohot qall ishshaakat husslah sed eepumass inkodinemu?
21 maana maalla,
orr husslah ikkim qall ishshaakaaddun Mooha ufunaatta diinninaness Moohot qall ishshaakaayyin iyyaa tur duh.
semmaalla lel masmasunt se op eepumap tooyiyaan innu kollinninkinnun orr amaaniyyu dinisaass has Mooha kodd.
22 orr ayhuta ishaak nam shammusinniyyu akka fadin;
kirket lamm qallixishshaaka fadin.
23 innu lamm kristoos se rahhamin eeshshin;
hin ayhutaass kohayt,
siip pilass lamm eepum.
24 hor orr hembamess,
ayhutaassenno koddu kirketassenno,
kristoos irrot Moohaatenne qallixishshaaka Moohaat kida.
25 maana maalla,
iyaan namat Mooha kapa eepumap tooyiyyu qallixishshaaka nam qara tawan;
iyaan Mooha kapa melakkalumap tooyamiyyanno irrot nam qara tawan.
26 kafoot!
helpaan Moohot inn hembe ikkim ashshann kishshan qaapadaa;
qum qaap namatess inn ila orr lek amm iyyaan qallixishaakiyyamu,
iyyaan lek amm orr qiqqimemu,
shoke amm orr serkisamemu.
27 hekoddu male Moohot orr qallixishshaaka qapu deesasaass eepayya husslah pahiyy;
irrampayyaanno deesasaass melakalayya husslah pahiyy.
28 Moohot iyaan husslah kapa ikkaani tooyamiyy allipatisaass hin husslah qara ullaash kiyyanne tuffasham pahiyy.
29 iyyat sedep kod,
ikkim aynonno Mooha turass infoojiness kida.
30 hekoddu male Moohot ikkim inn Yesus kristoos olle shokkohum qafnaannintaness kod.
semmaalla,
Moohot ikkim Yesus kristoos ufunashaynonne,
tsillumaaynonne,
miilumaaynonne qaxamaannu koddinu kod.
31 semmaalla qum it matsaafa qari tsaafantep,
"nam fooja fadiyyu poldin fooju."