orr pil masmasusisa
15
1 innu iyyaan amaantetin qinn tashshot tashshampayya haisa innu fadusinnin male,
amm iyyaan mashshaynu imasmasusinniyy kodda innu fadusinnishshamu.
2 shokkushokkotayno ikkim namat amaanteshayyin qiminu iyaan nam koddiyyanne nam masmasusinniyy erkannaa.
3 maana maalla,
kristoos amm mashshayy hemasmasusiyyemu;
sekapeeshsh lel matsaafa miilot se,
"otittaan op hedin oten an qari lekkad."
kidam tsaafam qari pai.
4 maana maalla,
duupattaanne kokkilaan innu matsaafadda miilot qara akkanninkinnon ikkimin irraxatet qafnaanninnu hin tureeshsh tsaafam dahenn qara kollaas innu tsaafant.
5 Mooha duupattaanne kokkila daanniyyu,
paahnat Yesus kristoos kanni antaaynnin shokkohum inni dayyu.
6 settep Mooha,
appa poldaaynu heka Yesus kristoos ikkim mutsura shakkanoohanne qaap shokkoohin iyy serkinnintan inn kodu.
siip ayhuta kodda diiyess lel masmasunt lelamaayy
7 qum kristoos serka Moohaat inn qeeddadep innanno mashshimashayni orrqeqqaeddadaa.
8 maana maalla,
kristoos shaakketum Mooha akkisaass irraxatet se Moohot appadaann hin tureesh kiyy dayy qarqimisaass,
erhayt ayhuta kodd,
hen inni kidin.
9 settep lamm iyaan kristoos maalla erhayt ayhuta kodd,
siip pil ikkim mutsurootta Mooha minin Mooha aypisanninaness kida.
sedenno qum it,
"semmaalla otant siip ayhuta kodda diiy ilassin hed aypisannina;
mahhaaytessennon laalannina."
kidant tsaafantep kida.
10 lamm:
"inn iyyaan ayhuta kodda diiy,
siip Mooha olle masmasaa!"
hekidant tsaafant.
11 illo lamm:
"inn iyyaan ayhuta kodda diiy dahenn!
Mooha aypisadaa;
siip dahenn iyy wososu!"
hekidant tsaafant.
12 settep isaayaas,
"iyy hotta issey ila dalanninu deyina;
siip ayhuta kodda diiyyessenno sinkitt kodda sohannina;
iyyaanno irraxateshaddu iyy qari haayanninan."
hekid.
13 ikkim irraxateshinn irrot laaffot miilotatin kaanan annintoss,
oot inn iyy amaanten maalla,
Mooha se irraxatet daanniyyu masmasuntanne andot inni lekiyu.
ishamaan bawloos oot erkammaayyati ishaam
14 kafoot!
inn iyyaan dikkuntin innaakood,
ufunat inni lekit,
shokkushokkotayne nam pil korsa fottin koddaayn henxishaak.
15 hekoddu male iyaan antu inni lela fad kiyy,
illo antu hayyotum se Moohot dikkumoyyin ani dayyin por karayy ila huura male inni tsaaf.
16 hayyotum settenno ani daassam,
lel masmasunt heka Mooha orr ayhuta kodda diiyi lelan qum suuka moohaatep koddan Yesus kristoossi erkasaass kida;
settenno siip ayhuta kodda diiy ikkim laaqqaan laaffot miilotin miilenne Mooha masmasusinniyy koddinan dehaanninani kodaass kida.
17 semmaalla Yesus kristoos olle kinnaattan Mooha erkasaawonn foojinkiyy.
18 iyaan antu ishaamenne erkayyenn ikkim orr ayhuta kodda diiy Mooha acacaminan koda hin kristoos an ilin erkayy pateeshsh amm akkan pil ishaaminhinamu.
19 settep lamm ishshaakadaan kakkaanenne yeeshutta irrot laaffot miilotatin kodam;
yerusaalemeeshsh hiran haka ilwarqotenne paattaan ukapeesh kikkiyyat antaann lel masmasunt heka kristoos henkolliyy.
20 antu lashshmin hadanniyyu lamm,
sheeht nam pil lahi haay qari erkasa kodda male por mahh kristoos ulli dakaysamaatta diiyess lel masmasunt se dikk lelaass kida.
21 setteno qum it,
"orr tureeshsh ootaayy it iyyaa lelama diitt akkinan;
hin ootaayy dakaya diiy ishshaakinan"
kidant tsaafantep kida.
bawloos roomep anta qaapad
22 antu haka ammanneti inn kapop deya fotta diiy,
sed minann kida.
23 ammann lamm oot iyaan antu huss sede erkanninu teekenenne settep lamm antu par lek tureeshsh hir inn akka hadat kaant qapu maalla,
24 helpaan antu ispeenep anniyyo ituri inn kapin hiikan fad.
etin helpa qoji inn olle masmasu kanna lamm iyaan antonaawu ani koddinann ikkim an qarqaarintaness irrayinkiyy.
25 ammann qarqaarsa miilampayya daassaminonnin yerusaalemep annin.
26 sedenno oot orr meqtooniyaanne akayiyaalle kiyy miilampayyaan yerusaaleme kiyy ila hiyayyaan kiyy qarqaaraass kodashshet hita sohaden maalla kida.
27 iyyaa kodashshet sedenno hita hoxsaaden,
oot qarqaarsot iyyaa qara fadamiyyu maalla kida;
maana maalla,
et siip pil qoran laaffot Mooha se ayhuta daassam iyyaa olle qootanniyyan koddo,
iyyaanno hin iyyaa qapanin ayhuta qarqaara iyyaa fadusinnin.
28 semmaalla etin yerusaalemep aanu illo kodashshet qarqaarsa sett dayyu,
erkamayyin kaysiyu kanna inn kapannin hiikina illo ispeenep annina.
29 helpaan antu inn kapop deyiyyo ikkimin qoran kristoos innaakotin inni deynoss henxup.
30 kafoot!
ikkim ootaawu Mooha dinkaman sootanshawu ila an qarqaarintanessin poldaaynu Yesus kristoosenne hoxsunt laaffot miilotatin inn dinkamannin.
31 inn maalla Mooha ani dinkamintanenno,
harka orr se amaana diinniyy huss yihuta qalle kiyy kela ikkimin passanninossenne erkamaan antu yerusaaleme qapu miilampayyaan ulla kiyy ikkim qeeddanninaness kida.
32 hin kaysaadan kanna et has Mooha koddo,
masmasuntin inn kapop deya inn kapi haysattan fadin.
33 Mooha andoti dahetaynin inn olle kinnaadu!
ameen.