nam ifatta diiyyaa
14
1 nam amaanteshayyin tashampayt kodd qeeddada male qaapayy shiitta diiyyaa.
2 nam karatiyy heikk damaass amaaniy;
tashampayt lamm mijaah damin.
3 semmaalla nam heikk damiyyu nam se dama diinniyyu patann daft kida diiyyu,
nam se dama diinniyyonno nam se damiyyoss patann daft kida diiyyu,
Moohot heqeeddade.
4 kat hed se erhayt nam pilatess patann daft kidiyyu att ayno?
iyy hedikkitt shoke hennayqitt kidinu poldaayy kida;
laaddoss oot Moohot iyy ellashshisa fottiyyu maalla,
qimina ellina.a
5 settep lamm nam "lashsh shakk lashsh shakk qara tawos serka qaft" kidiyyu qaapanniyyu kinnaatta fottina;
iyy shokku lamm "lashsh dahenn serka orrop kiyy qaft male otant lashsh ila amm reehaytot hekiyyamu."
hekidin qaapannin.
semmaalla nam hinep kikkiyy mutsurooyy qalli amaaniyyu shurshura male erkayyu.
6 nam lashsh shakk it shakk qara tawunisan serkinniyyu serka poldatess hekidin serkinnin;
nam dama heikk damiyyonno serka poldatess hekidin damin;
damaayyennenno Mooha aypisannin.
nam dama heikk dama diinniyyonno,
serka poldatess kidin alldiinnin,
dama diittaayyennenno Mooha aypisannin.
7 innu ila nam iissi kallaanniyyu shoke iissi toyiyyu amm hekiyyamu.
8 etin kiyyatin kinnaanno poldassin kallaannina,
etin toxnonno poldassin toyina.
semmaalla etin kallaannono,
toxnonno poldass kida
9 maana maalla,
kristooss toy toxtalle sohadenno,
hin raawenne hin kiyyatin kiyyassenno pold koddaass kida.
10 att illo maanaass kafittaaytess patann daft kidin?
shoke maanaas kafittaayt ifannin?
dahetaynonnin sheedda kristoos heka horat turi ellinna.
11 maanaasse,
"antu iyy kiyyatin kiyyu,
hekidin poldat;
namat dahenn kilpooyyann an turi qullannina;
kapayyennenno antu Mooha koddaawu ishaamina."
hekidant tsaafant.
12 semmaalla mashshmashshaynossin oot erkamaannot Mooha turop dehaannina kaassiyaayy mitaattinnina.
kohayt kodda diiyyaa
13 semmaalla mashshmashshaynu patanni daft olli kikkida diinnu;
sekapeeshsh paana kafittaayyin qalli kohayt shoke urkupa haaya alldiitta kutadu.
14 nam akkan shokku oshshiyya kidiyyu qaapanniyyoss akkan hin iyyass oshshiyya koddin male,
akkan heikk mashshaddu oshshiyya kodda diittaaddu Yesus poldin kinnaataawonn shurshura male henxishaak.
15 et iyaan att damishshu minann kafittayt jemperrannishsho amm hoxsuntann kallaannimu;
semmaalla nam se kristoos iyy maalla toy,
damaan att damishshu minin ikkim patinu koda diiyii.
16 hin dikk inn kapa kiyy otusisa diiyyaa.
17 daamum Mooha heka tsillumatenne andotatenne masmasunt se laaffot miilotatin akkaannishshot male amm heka damotatenne ukotatemu.
18 maana maalla,
nam sedep kristoos erkanniyyu Mooha masmasusinnin;
nam kapaashshanno aypisamiyy.
19 semmaalla iyaan andot uqqalle akkaannishshonne innu mashshmashshaynu ollin kokkokkinninikinnu qimisannaa qapannaa.
20 damot minin erkama Mooha pulpula diinnaa.
dama dahenn iyaan miil;
hekoddu male damaan nam shokku kohayt koddiyy damot patin dapat kida.
21 semmaalla iyaan kafittayti kohayt koddiyy iyaanno,
soha dama,
ukot uka,
shoke akkan nam kohaytinniyyu dahenn erkasa diitta hedikka.
22 amaantet se att hineti qaftu hedenn moohaasseeh kodditu;
nam akkan iyyat shaakket kidiyyu qari amaaniyyu erkanniyyu illo qaapatiyy jiixisa diinniyyu iyy hartood.
23 nam ijjawsattan damiyyu lamm oot iyyat amaantetin dama diinniyyu maalla horat iyy qari quuramina;
hin amaantetin kodda diiy dahenn juppot kida.