hayyoti acacama
13
1 oot hayyotumat dahenn Mooha kapaatt kodd maallanne hayyot ammannetenno moohan maakumisamen maalla,
namat dahenn hayyot acacama fadusinnin.
2 semmaalla nam hayyot qari sohanniyyu dahenn tampet Moohot dayy shiittin;
iyyaan sedep kodiyyanno dahenn horatann iqari deyin.
3 maakamma orr nayqunt erkanniyyu nahisaass male amm orr dikkunt erkanniyyossemu;
hayyot tura huura diitta fadimu?
iyyaan dikk erkayyii;
aypilaanno kapa akkanninta.
4 hayyot erhayt Moohaat,
iyy erkaamaan dikk hedi erkasa haayam kida;
et nayqunt erkattu koddo tura huurii;
iyyat pillaw hidad amm aypotassemo;
iyyat erhayt Mooha se jiiayta Mooha akkisa orr nayqunt erkanniyyu qara haarot oorinniyyu kida.
5 semmaalla hayyoti acacama inn fadusinnin;
inn acacamintan,
jiixila Mooha huraanneeh kodda male qaapaann inn qari horat quura tura kida.
6 inn tiiqot daannishshanenno sed maalla kida;
maana maalla,
hayyot erhama Mooha iyyaan erkama hin erkasa haayam kida.
7 semmaalla iyaan inn qara fadamiyy dahenn hayyoti dayyaa;
se tiiqot idaattot inn qara fadamiyyu tiiqot dayyaa;
se qarats idaattot inn qara fadamiyyoss qarats dayyaa;
se huurama fadusinniyyu huuraa;
se serka ifadusinniyan serkiyaa.
orrhoxsatta
8 orrhoxsatta pateeshsh kuur inn qara kinnaatta diiyyu;
maana maalla,
nam,
nam hoxsaanniyyu halitt dahenn kaysinnin.
9 acacaddaan,
"arpaluma diiyii;
ikasa diiyii;
hasha diiyii,
heka nam yeesatta diiyii" kidiyyanne acacadda shakkan dahenn acaca se,
"nam dahenn qum att ihoxsaannishshop hoxsaadu."
kidiyyu qalle kiyyan.
10 nam,
nam hoxsaanniyyu dahenn amm nam qari nayqunt erkanniyyamu;
semmaalla nam,
nam hoxsaanniyyu halitt dahenn kaysinnin.
11 helpaan inn peot ila hayyintan ammann hepaene sapan sed ufunaadaa;
helpaan innu tureeshsh uqqalli amaann qareell lashsh dinaaynu ammann innu kapop hedehaatte.
12 awaddat tarpishsh,
kallapatanno hedehaatt.
semmaalla erkama awaddat all diinnaa;
mehadda tor heka attummat uuwwannaa.
13 liilt male hasayyikoddaanne taarot,
arpalumanne iyaan nam deesanniyyanne shiittaanne maxashanumin kodda male orr attumat kallapatatin kallaanniyop etantumin kallaannaa.
14 semmaalla Yesus kristoos pold uuwadaa male hadat sohaanna kaysisa fada diiyyaa.