erkama Mooha erkasaass ashshann kallaatta fadusinnin
12
1 semmaalla kafoot!
ikkim dakinshayn laaqqaan Mooha masmasusinniyyanne ulla kalanne iyaan miil kodintan dehannintanessin mahh Mooha se nam mutsuroonniyetin inn dinkamannin;
sed erkasaann paana shaakketatin Mooha serkinnintan kida.
2 ikkim has Mooha se dikk,
iyy masmasusinniyyonne haasutta dap ishaakaanne ufunaatta fottintaness qaapayn awshumisattan kiyyashayn oohantu male husslah sed pahanaatta diiyyaa.
3 amaantet se Moohot mashshimashayni inni dayy mitti dippatuman qaapadaa male,
se qaapatta inn fadusinniyyu qareell foojan ikkakkaanisan qaapatta diiyyaa henkidin hayyotum se Moohot dikkomooyyin ani daayyin shokku shokkotayne inni lelin.
4 qum dakint shakkaah meella lek qaftu erkama meella dakintatenno dahenn shakkanooh kodda diiyyenep,
5 innu iyyaan lek kodditete kristoosenn dakint shakkaah;
illo mashshimashshaynoss orrinqaqapann.
6 semmaalla daayy se Moohot dikkumooyyin innu dayy erkama qara nakannaa;
dayyaannu et him koddo qum amaanteshaynu mitti him se lelinaa;
7 et erkaman nam qarqaara koddo qarqaarra kokkaannaa;
et kollisa koddo kollinnaa;
8 et korsa koddo korsa kokkaannaa;
et nami daatta koddo mutsuraalleell daannaa;
et peashshila koddo peashshisa kokkaannaa;
et nami mutsurootta koddo masmasuntin immutsuroonnaa.
9 hoxsunshayn hoxsunt shaakket kodditu;
iyaan nayq hittiyyaa;
iyaan dikk qapadaa.
10 hoxsunt kafumatin mashshimashshayni orrhoxsaadaa;
orrisesserkiyaa;
11 iyyaan laaffot miilotin dooha doohiyy,
poldi erkanniyy koddaa male melakkaluma diiyyaa.
12 irraatetin masmasaa;
rakkot duupadaa;
dinkamin kokkaadaa.
13 miilampayya rakkoshaddu ila qarqaaraa;
keessuma qeeddatta kokkaadaa.
14 orr se inn qari sohanniyyu qoraa,
qoraa male pisha diiyyaa.
15 orr masmasiyyu olle masmasaa;
orr pooyiyyu olle pooyaa.
16 mashshimashshayn qaap shokkoohin ollin kallaadaa;
orr tuffasham olle kallaadaaa male fooja diiyyaa;
ufunatin qafn kida diiyyaa.
17 nayqunt nayquntin ooha diiyyaa;
nam heikk turi iyyaa dikk erkayyaa.
18 et fottitane nam heikk olle andotin kallaatta iyaan inn qara fadamiyy dahenn erkayyaa.
19 moyshadoot!
miir moohati por hayyaa male,
mashshayni haarot oorsatta diiyyaa;
"haarot hekashawu,
iyy haarot oorinninu anayyu' hekidin poldat."
hekidant tsaafante.
20 sekapeeshsh nam hed qar hittinniyyu et tuffo dama iddayyii;
et deepoodo haq ikkishshii;
sed erkasaaytenn pork apittat qari poottinta.
21 dikkunt erkasan nayquntin pushii male nayquntin pushimaatta diiyii.