Moohot amm israaelet all hekashemu
11
1 kat illo Moohot siippayy all kashemu?
henkidin kaassannin.
amm apure all hekashemu!
ananno mashshawoss israaelishsh;
antu hotta aprihaam,
mayt piiniyaam.
2 siip Moohot turaqatta pahisad amm all hekashemu.
eliyaas siip israaelet ashshann ikkim Mooha turi kasas,
matsaafa miilot ootaayyess maana ikkim kidiyyu immashsha inqaftanemu?
3 essete eliyaas,
"polda!
himampayyoott heraawiyen;
por laaqqa uqqari hedi dehaanniyonno all paqiyyen;
anaah hat;
ananno ikasa fadin."
hekid.
4 lamm Moohot maana kid iyyi mitaattiyy?
"nam kum tapp iyyaan paxaal shoomatta diiyyin hattisad."
5 ammanenno orr israaelet iyyaan qoji dikkuma moohaatin pahisam ukela hat hekiyan.
6 et pahila dikkuma moohaatin koddane amm erkama namatennemu;
erkama namatin koddan kid lamm dikkuma Mooha aypot koddaayen.
7 illo maana qarann paen?
israaelet hin iyyaa fadiyyan amm heakkadenemu;
hin pahisam iyaan iyyaa fadiyyan hexakkaden;
hin hat mutsurooddu iij kodden.
8 sedenno qum it,
"Moohot mutsurooddu shikkamot kod;
semmaalla hak awetess indooddu amm akkiyyanemu;
lappooddonno amm dakayiyyanemu."
kidant tsaafant mittass kida.
9 taawitenno,
"damoshaddu urkupaan nam qapiyy,
qaaw nam sunkinniyyu,
iyyaa miidiyyu ikodditu!
10 indooddu akka tura il patenii;
surraddonno awmitt rakkotin koorawu!"
hekid.
11 intu an qarxooronu kaassadonu;
orr ayhuta sunken,
lakkiyya haya diittaassemu?
iyyokku!
qarakala ayhuta minann hin ayhuta kodda diiy dinatta akkaden.
hin kodden,
orr ayhuta ikkim siip pil mashanuminan kodaass kida.
12 qarakala ayhuta qorana kaan husslahat akkusiyyen;
sunkantaaddonno siip pilass qoran kodd;
et orr ayhuta dinadan kid qoranat ashshann puraay!
dinatta orr ayhuta kodda diiyet
13 hin ammann antu ishaamiyyu inn iyyaan ayhuta kodda diiyyess kida;
inn iyyaan ayhuta kodda diiyyess nam hitaym koddaawonn erkamaawonn foojinkiyy.
14 antu sed erkanniyyonno orr ayhuta hin sohan kafaawu kodd ikkim maxashannuminan kodan iyaa ila karaddu dinisa fottihina kidaann kida.
15 Moohot all iyyaa kashaayyenn,
et siip husslah Mooha olle araaramu koddo,
helpaan Moohot iyyaa qeeddanniyyo maana ashshann koddina?
hin qum toxt ila sohattaat kida.
16 pukeessa shakkanooh hin Mooha dehaad qara heka turaqatta et iyyaan miil koddane,
pukessaan dahenn iyyaa miil kida;
settep hittin qoyr et iyy miil koddo,
haarrooyyanno dahenn iyyaan miil kida.
17 hin haarra ekert manqaratep kiyy ila et haara karatiddu quuraman sunkan illo hed se qum haarra ekert muralletep kiyyu et otanshadu ili kaltu shorokumanne qoranaaddu qootannishshu koddo,
18 haarra hin qidam sunk qari fooja diiyii;
et foojishsho lamm sed qaapadu,
hittin hed hainnin male amm hed hittin hainnimu.
19 att lamm "haarra qepen sunken,
antu poraaddu ili dihamaas" hekkidin koddinan.
20 sedep kidaatt hedik;
iyyaa amaana diittaaddu minan qepen,
att lamm qima ella fottit,
amaanaayten kida;
semmaalla huura hed fadusinnin male fooja diiyii.
21 et Moohot orr ayhuta hin qum haarraan uumametep kiyy mutsurootta diiyyo hedessenno lamm amm mutsuroonninamu.
22 semmaalla dikkunt Moohaatenne miiraayy tooyadu;
miiraayyenno orr se sunk qarass kida;
et dikkunshayyin qintu kallaannishshu koddo dikkuma Mooha hed qara kinnaanninan;
hin inkinnekul hedenno allquuramint sunkint.
23 orr ayhuta lamm et amaana diittaaddu all diiyyane poraaddop mitaatinan;
maana maalla,
Moohot poraaddu pahaytap iyyaa mitaattisa fottina.
24 inn iyyaan ayhuta kodda diiy lamm uumaaynenn haarra ekert murall kodditete porayn male et ekert manaqar qarass dihama fottitan koddo,
orr ayhuta hin uumamaaddun haarra ekert manaqar kodd,
ashshann poraaddu pahaytap mitaata fotta diinninan!
Moohot nam heikketi mutsuroottaayy
25 kafoot!
afa ufunat qaftanep it innass inkinnaannin,
akkan dekad shakkan antu inni lela fadiyyu kiyy;
settenno israaelet mutsuraaddu iija koddataaddu hak muutaytaat kodda male,
hak dihassa orr ayhuta kodda diiy por moohaatep deyiyyu kaysaanninoss kida.
26-27 paana sedenn,
qum it,
"dinisampayt tsiyyoone sohannina;
hotta yaayqoop ilanno dahenn Mooha huura diitta all patinnina;
helpaan antu jupposhaddu dahenn all uushuqiyyo,
kakaan antu iyyaa olle kal hin iyyaa."
kidant tsaafantep,
israaelet dahenn dinanninta.
28 israaelet lel masmasunt qeeddatta diittaaddonn inn iyyaan ayhuta kodda diiy maalla olishshada Mooha kodden;
lamm por pahilateeshsh mayt appada minann moyshada Moohaat kida.
29 Moohot pahilaayyanne daayyaayy daattaay maalla amm qaapayy oohiyamu.
30 innanno tureeshsh amm moohaass heacacantenemu;
ammann lamm acacama diitta ayhuta minan Moohot inni mutsurood.
31 Moohot inni mutsuroottaayy minann ikkim iyyaassenno mutsuroonninos,
ammann iyyaa iyyaan Mooha acacama diinniy kodden.
32 Moohot nam heikket mutsuroottaayy akkisaass ikkim dahenn acacama diittaaddu ili hidaminan kodusiyy.
aypilaan Mooha dehaad
33 shorokum Moohaatenne qallxishshaakaayyenne ufunashayy it ashshann qallinhaat sekaatte!
horat quuraayy kannass amm painniyyanemu,
paanaayyenno iyy ufunashama diinniyyu.
34 iyy qaap Mooha upu ayno?
nam iyy korsiyyonno ayno?
35 ikkim pirkaataayy ioorinninu,
nam Mooha pirkaattiyy ayno?
36 heikk iyy kapann deyen,
iyy erkayy,
dahenn serkayyass kodden;
hak parparat serka iyyii koddenii!
ameen.