israaelet paana Mooha kanni anta diittaaddu
10
1 kafoot!
hadat kaant antu mutsuraawu qalle qaponne dinkam antu Mooha dehanniyyu,
ikkim israaelet dinannintoss kida.
2 ufunat pahitenn kodda diitt male iyyaa iyyaan oot Moohaat doohiy koddaaddoss antu maanyet.
3 oot iyyaa tsillum Mooha kapa deyiyyu ufunaatta diiyenenne poraddooshsh tsillum akkatta paana fadanniyyan maalla,
amm tsillum moohaati hepiddamenemu.
4 maana maalla,
namat dahenn amaantetin tsillum akkattaass kristoos hin halitt kaassanniyyu dahenn kaysiyy.
dinot nam heikketess
5 oot tsillum se halitt kanni antan akkaanniyyotess muuset sedep kid tsaaf,
"nam hin halitt leliyyu kaysinniyyu dahenn kiyyatann kallaannina."
6 hekoddu male tsillum amaantet kapin akkaanniyyu sedep kidin,
"mutsuroott qalleet,
'aynu moontallep fayyannina?
' kida diiyii;"
sedenno kristoos lekkisaass kida;
7 "shoke mutsuroott qalleet,
'aynu didim kelop lekkannina?
' kida diiyii" hekidin;
hin lamm kristoos toxt ila sohashshisa kida.
8 lamm sedep kidant tsaafant,
"lel Mooha hed kapa kiyy;
laaddu kapaytenne mutsuroott qalle kiyy" lel sedenno lel amaantet se innu lelinkinnu kida.
9 et Yesuset pold koddaayy kapaytin ishaantu,
Moohot toxt ila iyy sohashshisaayyenno mutsuroottin amaanto dinannihint.
10 nam mutsuroyyin amaaniyyu tsillampayt koddin;
kapayyennenno ishaamiyyu dinanniyy.
11 matsaafa miilot qalless,
"nam iyy amaaniyyu dahenn amm lilmaanninamu" hekidant tsaafant.
12 oot pold shokkooh,
pold nam dahenn kodd,
orr se iyy dinkaminniyyu dahenness daayyayy purnatin daanniyyu maalla,
otant ayhutaatenne orr ayhuta kodda diiy ila amm reehaytet hekishshamu.
13 maana maalla,
"nam mahh Mooha hembanniyyu dahenn dinannina" hekidant.
14 et sedep koddo,
iyy amaana male ashshannin hembatta fottinan?
otaayy dakayya male ashshann amaaninan?
nam leliyyu kinnaatta male ashshann dakaya fottinan?
15 hitama male ashshann lelaayy lela fottinan?
sedenno qum it,
"orr lel masmasunt leliyyu lukkooddu maanaap senin" kidant tsaafantep kida.
16 hekoddu male qum isaayaas,
"polda!
lel se innu lell aynu qeeddad?"
kid lelep,
dahenn lel masmasunt sett amm heqeeddadenemu.
17 semmaalla amaantet akkaannishshu lel masmasunt dakayaan;
lel masmasuntatenno akkaanniyyu kollilaan oot kristoos lelamiy kapann kida.
18 intu an kaassadono,
kat lelaayy amm hedakayenemu kidaamu?
qum se it matsaafa miilot qalli,
"nassaaddu husslah dahenn qarass dakaysamaad;
lelaaddonno haka heel husslahatess paiyy."
kidant tsaafantep,
shaakketass hedakayen.
19 lamm kidinkiyya,
israaelet lelaayy amm heupanemu kidaamu?
muuset turass qattiyy,
"siip tuffashamennin ikkim maashanumintani inn kodina;
siip qallqaapatta diinniyyonnennon inn miirannina."
hekkid.
20 isaayaasenno,
"orr an fada diiyessin akkaad;
orr por antu ulla kiyyu kaassatta diiyessennon patpah."
hekid huura male ishaam.
21 lamm oot israaeletatess,
"siip acacama diinniyyanne siitampayya ikkim an kapop deynanessin lashsh muumeti harkooyyu iyyaa minaashsh qap."
hekidin.