siip Moohot pahisad
9
1 antu heka kristoos,
samaalla shaakketin ishaamin;
amm eerpaamu;
qaapaawu se laaffot miilotin turiqeeddamiyyonno anass maanyet.
2 dappet kaantenne baaqur muutayta dap mutsuraawu qalle kiyy.
3 oot orraawu hin sohan kafaawu koddetess etin kristoos kenda reehad illo pishaym Mooha an qari pai kid anass dikkaannaay.
4 iyyaa israaelet kida;
Moohot meddooyyass iyyaa kodad;
serkooyy iyyaa akkiyy;
kaka iyyaa olle kal;
halitt iyyaa dayy;
hokat shaakketin Mooha shoomattaatenno iyyaa kolliyy;
irraxatetatenno iyyaa dayy.
5 iyyaa daladen mayt appada israaelet ila kida;
kristoosenno sohann iyyaa ila dey;
iyyat Mooha heikk qara tawu haka parparat aypisam;
ameen.
6 hekoddu male amm lel Mooha allihat kidaamu.
maana maalla,
hin israaelet ila dalad amm dahenn israaelet shaakkemu.
7 settep lamm oot iyyaa hotta aprihaam kodden maalla,
amm dahenn meddaayy shaakkemu.
hekoddu male Moohot aprihaamess,
"hottaatt isaaqenn hembamina" hekid.
8 sedep kidot,
hin sohan dalad amm medda moohaatemu;
iyyaan hotta aprihaam kidamiy medda irraxatetateeh kida.
9 irraxatet se Moohot dayyenno,
"parmate eeskin deyina;
saaranno imm haayinta" se kidiyyu kida.
10 sedeeh kodda male helpaan ripq isaaq shokkooh se appa maaytaaynu koddess tahiyya qoommaatte,
11-12 pahila Mooha,
erkamaan dikk shoke nayq namat erkanniyyun kodda male,
hembantan koddaaddu ishaakisaass meddaan dalatta illo naayquntanno dikkuntaanno erkasa tureeshsh Moohot,
"ankasat insharass piddamina" kid ripqi lel.
13 sedenno qum it,
"yaaqopin hoxsaad lamm eesaaw qarhittiyy" kidamt tsaafantep kida.
14 semmaalla,
maanana kidinna?
Moohot qariqatta erkannin kidaamu?
iyyokku!
15 Moohot muusess,
"nam antu imutsuroonniyossin mutsuroonnina,
nam antu all iddiinniyyossin all diinnina" hekid.
16 semmaalla pahila Mooha hinnatt namatenn shoke erkama namatin kodda male moohoot nam mutsurootaann kida.
17 matsaafa miilot oot fariooness,
"hin antu hed qari erkanniyun irroshawu akkisaassenne mahhaawonno husslah dahenn qara ikkim ufunashaminossin hed daamumusiyy" hekidin.
18 semmaalla Moohot nam iyyat imutsurootta hinnaadess mutsuroonnin;
nam iyyat hinnaad lamm mutsura qall iija kodin.
jiixila Moohaatenne nam mutsurottaay
19 semmaalla "maanaass Moohot orr erkamaaddu hin naayq minin jiixinn?
nam hasaayy shiitta fottinu hekiyyamu?"
hekkidint an kaassannint koddinan.
20 att nam!
Mooha olle shiittamattaas paana maanaat qaft?
mehaddaan huss ila soorumam nam iyyaa sooromess,
"maanaass sedep an sooront?"
kidiyyanemu.
21 shoke nam huss ila mehadda soorumiyyu jooqqa iyyat shokkoohin qeedd ila mehadda shakkan serkaass,
shakkan lamm ullaash kiyy sooruma joqaan qarann hayyotum inqapomu?
22 et Moohot jiixaytaayy akkisaassenne irroshayy ufunaytisa fadu illo mehadda hin patet dikkisam heka jiiaytaayy koddess ikkaan duupadu koddo aynu upa?
23 iyyat maalla sed erkayy,
mehaddaan mutsurootaay akkinniyy,
iyyat turaqatta serka ulli dikkiyyess lekussa serkooyy akkisaass kida.
24 mehaddaanettenno orr ayhutaateeh kodda male innu iyyaan orr ayhuta kodda diiy ila iyyat hembenno kida.
25 settep lamm him hosei qarass,
"orr siipaawu kodda diiyyessin 'siipaawu' kidina,
siip hoxsashama diiyessennon 'siip hoxsasham' kidina hembina;
26 por se iyyaa 'amm inn siipaawomu' kidameness,
'medda Mooha se kiyyatin kiyyot' kidaminan hembaminan."
hekidamt.
27 isaayaassenno oot israaeletatess nassayy err qeedd,
"et dihaassa medda israaelet qum shaahat pakatetatep kinnaadan nafe iyyaan iyyaa ila dinannin iyyaan qojeeh.
28 maana maalla,
poldat olatta male shakar kidina husslah qari horat quurina."
hekid.
29 lamm qum isaayaas,
"Mooha se heikk fottiyyu hotta innu hattisa diiyy kid,
qum sapara sotometenne heka kamora patenepin innonno pataan."
kid turaqattiyy lelep kida.
30 ammann maanaan kidina?
orr ayhuta kodda diiy tsillum kann fada qaapatta diiy tsillum akkaden;
tsillum settenno iyy amaantetin akkaanniyyu kida.
31 israaelet lamm halitt tsillum daanniyyu kann anniy amm tsillum qarann hepaenemu.
32 "maanaass tsillum qarin paisa diiyyen?"
et kidanto,
iyyaa tsillum akkatta faden,
amaantetin kodda male,
erkaman koddaadd maalla kida;
semmaalla daka kohaytatenn kohaytisamen.
33 sedenno qum it,
"toare,
daka nam kohaytinniyun tsiyoon haayna;
daka settenno shilk nam sunkinniyyu kida;
lamm nam iyy amaaniyyu amm lilmaanninamu"
kidant tsaafantep kida.