kiyyat laaffot miilotann
8
1 semmaalla orr Yesus kristoosin kiyy qarass ammann amm horat quuramintamu.
2 maana maalla,
halitt laaffot hin kiyyat se Yesus kristoos kapin akkaannishshu daanniyyu halitt toxtatenne heka juppot kela an passiy.
3 namat namumayyen tashshampayt koddaayy minann iyyaan halitt erkasa fotta diiy Moohot hexerkayy;
meetayyenno sohaan juppampayt uuwadep kiyy uuwashshisan juppot minin hit illo soha meetaayyetin juppot qari horat quurusiyy.
4 iyyat sed erkayy,
innu iyyaan has sohaatin kodda male has laaffotatin mimmitaatiy ilas acac halitt pah ikkim kaysaanninoss kida.
5 orr has sohaatin kallaanniyyu heka sohooddot qaapannin,
orr has laaffot moohaatin kallaanniyyu lamm heka laaffotat qaapannin.
6 heka soha qaapattot toxtann deyin,
heka laaffot qaapattot lamm kiyyatanne andotann deyin.
7 nam heka soha qaapanniyyu oot iyyat halitt moohaati acacama diinniyyonne acacamaanno fotta diinniyyu maalla,
olishsh Moohaat kida.
8 orr has sohaatin kallaanniyyu amm Mooha masmasusisa fottiyyanemu.
9 inn lamm et laaffot Mooha inn qalli kallaannishshu koddo,
has laaffotatenn male amm has sohaatenn kallaannimu;
nam laaffot kristoos ila teekit amm heka kristoosemu.
10 et kristoos inn qalle kiyyaado,
sohaann iyaan juppot minin toyiyyy koddan nafenno,
oot Moohot tsillampayya inn kod maalla,
nefseshinn it kiyyat qaftu kida.
11 lamm laaffot Mooha hin Yesus toxt ila sohashshitt et inn qalle kinnaannishshu koddo,
Mooha hin kristoos toxt ila sohashshiyy laaffoshshayy se inn qalli kallaannishshonn dakinshayn se toyintoss kiyyat daannina.
12 semmaalla kafoot!
kuur innu qara kiyy;
hekoddu male kuur hin amm has sohaatin kallaattaassemu.
13 et has sohaatin kallaannishshane toyihintan;
hekoddu male et irrot laaffot miilotatin erkamaann heka soha ikattane kiyyatanbn kallaannintan.
14 orr laaffot miilot tur qeeddishshu dahenn medda Moohaat.
15 semmaalla,
laaffot innu "aappu,
appoyy" kidinnu inhembinnu hekat medda Mooha koddaatt qeeddatten male,
amm huurran kallaattaass laaffot aylum qarxoorten qeeddattenemu;
16 laaffot Mooha laaffoshaynu olle kinnaattaan medda Mooha koddaaynu innu ufunaytinnin.
17 et innu medda Mooha koddine innu taymampayya kida;
kristoos ollennon tayinna;
etin ammann iyyaan rakkot kristoos qootanniyy koddino,
ukkanna iyyaan serkayy qootanniyin koddinna.
serkaan deyiy
18 hin innu amman miidaminknnu,
et serkaan ittureesh innu akkaannina kapi tooyamiyyo,
amm ikkaanep tooynkiyyamu.
19 uumot dahenn akkaatta medda Moohaat darray kaanin lushannin.
20 uumot dahenn ikkim aypot koddinoss qarass quurant;
sedenno hinnat uumaatin kodda male has Mooha se ikkim irraxatetin lushanninan koden kida.
21 irraxatet settenno ikkim uumot mashshayy aylum patet kela passattan medda Mooha olle serkaanne aylum male kallaatta qallin painoss kida.
22 uumot dahenn hak ammannetess laashamuntin taajama ullupaayy henhufun.
23 hekoddu male hin taajaman ullupaalle kiyyu amm uumaahamu;
innu iyyaan daayy laaffot miilot heka turqatta qeeddann lamm,
se ikkimin medda Mooha koddinnu,
dakinshaynu qaynu irraxatetin lushanniyanno tallinhaat taajaminkinn.
24 innu irraxatet sedennin dinann.
hekoddu male hin innu irraxatet kodann,
et iyaan akkaanniyy koddane irraxatet koddaaddu allhatin.
hin akkaanniyy aynu irrayin?
25 lamm iyyaan innu akka diinninkinnu etin irraxatet kodanno duupattannin lushannina.
26 settep lamm ashshann dinkamatta ikkim innu fadusinniyyu oot innu ufnaatta diinn maalla,
laaffot miilot tashshoshaynu qalle innoss hesin;
taajama op kapalle ishaama diinnaayenenn Mooha innu dinkamin.
27 Mooha mutsura nam qall tooyiyyu qaap laaffot miilot maana ikkim kodd hexup;
laaffot miilot has Mooha qarass miilampayyaa Mooha dinkamin.
28 orr Mooha hoxsaanniyyanne qum hasaayy qari hembamess akkanat dahenn dikkunttass ikkim iyyaa koddinan henxufn.
29 meetaayy ikkim otant kaf lek ili qart koddinu hin iyyat turiqatta ufunaad ikkim meetaayy pahanaanninaness turiqattiyy ulli quur.
30 hin iyyat turaqatta ulli quur lamm hehemb;
hin iyyat hemb lamm tsillampayyaass kodd;
hin iyyat tsillampayya kod lamm heserkiyy.
hoxsunt Mooha
31 ammann sedess maanan kidinna?
et Moohot innu olle kinnaado aynu innu shiittin?
32 Moohot meetayy shokkoohass mutsurotta male ootaaynu tarpiyy daaye,
ashshann meetaayy olle heikk patt innu daatta diinnina?
33 hin Moohot pahisad aynu kasasina?
iyy tsillampayya iyyaa kodiyyu,
mashshayyess Mooha kida.
34 iyy horat qari quurinu ayno?
yesuus kristoos horat qari quurinamu?
iyyokku!
iyyat ootaaynoss toy,
toxt ila sohad,
miskitt Mooha qari laddiyy,
ootaaynossenno dinkamin.
35 hoxsunt kristoos kenda aynu innu reehina?
rakkotemu,
shoke miidama?
ilikoyattamu,
shoke laaot?
patpatt kinnaattaamu,
shoke iyaan nam huurinniyy,
shoke torin toyaamu?
36 sedenno qum it,
"innu ootaaytessin awumitt ikawsamin;
helemmaan qalamiyyaapannon dihamin"
kidant tsaafantep kida.
37 laaddu hin dahenn ila kristoos se innu hoxsaadenn tannapot qaran tawun.
38 toxt kodditu,
kiyyatanno,
hitaymiyyaanno kodden,
hayyotanno,
se kiyyu koddu,
se deyiyonno,
irrampayyaanno,
39 hin erreel kaanenno kodden,
hin lahaat sekanno,
uuma heikktenno,
hoxsunt Mooha se innu poldaaynu Yesus kristoos kapin akkann kenda innu reeha ikkim fotta diinninan henxufnaad.