halitt kela passatta
7
1 kafoot!
orr se halitt upossin sed ishaamine:
halitt nam qari hayyotum qafnaanniyu haka namat kiyyatin kiyyoseeh koddayy inxuftanemu?
2 pahanatass,
iskattet aatunt hak irshatidd kiyyatin kiyyoss iyy olle halittin hidant;
hekoddu male et irshaadd toyo,
halitt se it inhidant kela hepassatt.
3 semmaalla irshaadd kiyyatin kiyyo,
et nam pil olle aatunto arpalaytet kidamint;
hor et irshaadd toyo halitt se it olle inhidant kela hepassatte,
et nam pil olle aatuntonno amm arpalaytet kidamintamu.
4 kafoot!
innanno sedep kishshan;
oot inn meella dakint kristoos kodditen maalla,
qum toxtin reehattaatep halitt kenda reehatten;
semmalla ikkimin erkama Moohaat qunda qafnaanninnoss inn kristoos se toxt ila sohadess hekooyy kodditen.
5 helpaan innu has sohaatin mimmitaatinkinno,
hadat se nayq halitt seseyinniyu ikkimin toxtass qunda qafnaanninnoss meella dakinshaynnu qalli erkannin kida.
6 ammann lamm halitt se innu hid kela oot innu qum toxtin reehattaatep reehann maalla,
hidan halitt kela henpassann;
semmaalla sed kanneeshsh innu aylet Mooha koddan erkanninnu halitt awshitt heka laaffotatenn male amm halitt pahayt se tsaafamennemu.
halittanne juppot
7 semmaalla maanan kidinna?
kat halitt mashshayyess juppotemu?
iyyokku!
hekoddu male juppot maana koddaadd halitt ani ufunaytiyy.
halitt,
"hadatta diiyii" kida diiy kid hadat maana koddaadd amm ufunaanninhaayemu.
8 acac se halitt kapin deyin juppot paana akkattaan ikkim hadat heikk an ila sesseyintu kodit.
maana maalla,
juppot halitt male it toxt kida.
9 helpaan antu halitt ufunaatta diiyye kiyyatin qap makess;
lamm helpaan acac halitt deye,
juppot kiyyat akkatt,
antu lamm hentoy.
10 acac hin kiyyatass koddina kidam qaapawusamenno,
toxtann an qari dey.
11 paana se acac kapin akkaaden juppot ani paass;
acac settennenno an ikatt.
12 semmaalla halitt mashshayy miilot;
acacanno immiilenne shaakketanne iddik kida.
13 illo kat hin dikk toxtin an qari dey kidaamu?
iyyokku!
sekkapa juppot ikkim juppotumadin patipahintu ishaahamannintoss iyaan dikk kapin toxtin an qari deit;
semmaalla juppot acac kapann settur qareell juppot koddit ishaahmatt.
sootant nam ila kishshu
14 halitt heka Mooha koddaayy henxufn.
antu lamm iyy aylum juppotat kasham,
qaap sohaatin kallaanniyyu kida.
15 iyaan antu kodiyu amm ishaakinkiyyamu;
iyaan antu hoxsaanniyyu erkasan diinnin illo iyaan antu qar hitinniyyu erkannin.
16 etin iyaan antu erkasa fada diinniyyu erkanniyyu koddo,
halitt idikk koddaayyessin maanyet koddin.
17 etin sedep kodiyyo lamm juppot se an ila kishshu hin antu qar hittinniyyu,
erkannin male amm anamu.
18 an ila shoke namumaawu ila akkan dikk shokkooh naf kinnaatta diittaayy henxup;
et hasaawu akkan dikk erkasa fadiyyu koddu nafenno amm akkan se dikk erkasa fottinkiyyamu.
19 akkan se dikk antu erkasa fadiyyu amm erkanninkiyyamu;
hekoddu male hin naayq antu fada diinniyyun erkannin.
20 lamm etin iyaan antu fada diinniyyu erkanniyyu koddo,
hin sed erkannishshu juppot se an ila kishshu male amm anamu.
21 semmaalla,
halitt erkama qara nakayaayy henxishaak:
settenno antu iyaan dikk erkasa fadiyyo iyaan nayqin erkannin.
22 qallinhaat halitt moohaatenn masmasinkiyy.
23 hekoddu male halitt pil iyy haltt jupot se dakinshawu ila erkanniyyos nam hidam an kodiyyu kiyy.
halitt setttenno haltt qaapaawu adan dakinshawu ila erkanniyyo akkinkiyy.
24 antu poyrishsh ashshann kiyyo?
soha hin toxt daassam kela aynu an passinnina?
25 poldaaynu Yesus kristoos kapann moohaass aypila koddenii.
ammann antu paana shokkonn qaapaawonn halitt moohaatessin piddamin;
paana pilann has sohaawotenn iyy halitt juppotat piddamiyun kodd.