juppot ketta reehattan kristoosin kallaatta
6
1 semmaalla maanan kidinna?
dikkuma Mooha ikkim lekinanes juppotannin kallaanninnamu?
2 iyyokku!
innu qum toxtin reehattaatepin juppot kenda reehanne,
ashshannin juppotin kallaanninna?
3 innu iyyaan Yesus kristoos olle shakkanaah kodda ahalisamin dahenn toishayy olle shakkanooh kodda ahalisamaaynu inxuftanemu?
4 helpaan innu ahalisaman iyy olle mookamine iyyaan toishayy qootanniyin koddin;
semmaalla qum serka appaayy toxt ila kristoos sohashiyyenepin innonno kiyyat awshittetin kallaanninna.
5 etin toxshayyin iyy olle sedep shakkanooh koddine,
settep toxt ila sohattaan iyy olle shakkanoohin koddinna.
6 dakinshinnu hekat juppot ikkim all hatintu illo sed kanneeshsh aylamma juppot koddaannu all hatinoss namumaannu pahayt kristoos olle rahhamaayy henxufn.
7 maana maalla,
nam toy,
juppot piddama kela hepassad.
8 settep lamm oot innu kristoos olle toin maalla,
ikkimin iyy olle kiyyaatan kallaanninnu amaanninkinn;
9 kristoos toxt ila sohattaayyenne ittureesh qarioora toya diittaayy,
toxtanno iyy qari hayyutum dapaadd henxufn.
10 maana maalla,
helpaan iyyat toye,
juppoot iyy qari hayyutum qafnaatta tura shokkooh itturi toy;
ammann lamm kiyyatan kallaattaayy,
moohaass kallaannin.
11 settep lamm inn qum toyaatep juppoot kenda reehattaaynenne lamm poldaaynu Yesus kristoos kapin Mooha kallaattaayn qaapadaa.
12 semmaalla ikkim hadashadd kaysinnintani dakinshayn se toyintu qari juppot hayyutum qafnaatta diittu.
13 settep lamm meella dakinshayn mehadda nayquntat kodan juppoti dehasa diiyyaa;
sekapeeshsh orr toxt ila sohad kiyyatin kallaaniyap Mooha idehayyaa;
meella dakinshaynetenno mehadda tsillumaat koda Mooha dehayaa.
14 ammann inn dikkuma Mooha kannaatt male amm halitt kannaatt kallaanimu;
semmaalla amm juppot inn qari irrot heqqaftamu.
erkamampayya tsillotat
15 semmaalla maanan kidinna?
oot halitt kannaatt kinnaattaannu all hat,
innu dikkuma Mooha kannaatt kinnu maallan juppot erkanninnamu?
iyyokku!
16 et inn nam shokkoss aylet koddan iacacama mashshayn dehannishan koddo,
nam se inn iyyi acacamishshaness aylet koddaayn inxuftanemu?
settep lamm et juppoti acacamishshane juppot se toxtin inn qar deyshoss aylet koddintan;
lamm et Mooha se tsilluma daanniyyu acacamishshane ayleet Moohaat koddintan.
17 turaqattaas inn aylet juppotat makess;
amman lamm oot inn kollilaan inn qeeddatteness mutsuralleell acacanten maalla,
aypila Mooha koddenii.
18 aylum juppot kela passatten,
iyyann tsilluma erkanniy kodditen.
19 oot inn qaapin tashishan maallan,
qum kollinat nam qar sedep kidin.
qum inn turiqatta ikkim dakinshinn nayqunt erkannintu oshumassenne nayquntass aylet koditen dehattenep ammann lamm tsillum se por miilumatep namin anniyoss dakinshayin aylet koda dehayyaa.
20 helpaan inn aylamma juppot kodditene tsilluma erkasot amm inn dakaysamanniyamu.
21 kat essete maana uqqalle akkaten?
hin ammann inn deesanniy pateeshsh amm akkan shakkoh naf uqqalle heakkattenemu;
muutayta hin dahenn toxt kida.
22 amman lamm aylum juppot kela passatten illo aylamma Mooha kodditen;
inn uqqalle akkannintanenno miiluma kida;
muutaytaaddenno kiyyat parparat.
23 heriy juppot toxt;
daayy Moohot dikkumooyyin daanniyyu lamm kiyyat parpar se poldaaynu Yesus kristoos kapin akkaannishshu kida.