andotanne masmasunt
5
1 semmaalla oot innu amaantetin tsilluma akkann maalla,
poldaaynu Yesus kristoos kapin Mooha olle andotin qafna.
2 lamm iyy kapannin dikkuma Mooha hin innu ammann uqqall ellin qallep amaantetin kala fottin;
irraxatet se ikkimin serka Mooha qootanninnu innu daassantennenno masmasinkinn.
3 sedenneeh kodda male rakkattaaynonnenno masmasinkinn;
maana maalla,
ikkim rakkot duupattan deyishshu henxufn.
4 duupattot ekkawusaman kokkaattaann deyin,
kokkaattaanno irraxatetann deyin.
5 laaffot miilot se innu daasant kapan oot hoxsunt Mooha mutsuraannu qall innaakitt maalla,
irraxatet hin amm nam deesannishshamu.
6 innu tashshampayya kodditete hooraan Moohot quur paene kristoos juppampayya maalla toy.
7 nam oot tsillampaytat toynu akkatot rakkot kaant;
hor nam oot nam dikkat toyaayy saapaass akkaannaay koddinan.
8 hekoddu male sanu innu juppampayya kodditete kristoos ootaaynu maalla toy;
sedenno Moohot hoxsunt se iyyat innu qapu akkinnin.
9 semmaalla innu diikaayyin tsilluma akkanne,
ikkaanessin iyyin jiiayta Mooha kela passanninna.
10 innu olishshada Mooha kodditete toxt meetaayyetenn Mooha olle henxaraarann;
seqareell innu Mooha olle araaran kanna kiyyat meetaayyetennin dinanninna.
11 sedeeh kodda male,
poldaaynu Yesus kristoos se Mooha olle innu araars kapannin moohan masmasin.
toxt attaam minan; kiyyat kristoos minan
12 nam shokkooh minan juppot husslah qallep kalt;
juppot minan toxt paitt;
sedep lamm oot namat dahenn juppot erkayy maalla toxt nam heikk qari paitt;
13 halitt muus daassama turann juppot husslah qara kishsh;
hekoddu male por halitt teek ila juppot amm juppotap dihamishamu;
14 et koddono orr heka attaamep halitt qar tarpan juppot erkasa diiy naf hata male toxt attaameesh hirt hak muuset nam heikk qari daamunt.
attaamet kristoos se ittureesh deynoss paahnat kida.
15 hekoddu male daayy Mooha amm qum juppot namatepamu;
et juppot nam shokkooh minin orr lek raawene,
lamm daayy hin dikkuma Moohaatenne dikkuma Yesus kristoos shokkooh minin daassam sed qareell orr lekess pur.
16 settep lamm daayy Mooha amm qum qunda juppot nam shokkohaatepamu.
maana maalla,
horat juppot nam shokkooh minan deit,
daayyat lamm juppot se lekit kannass tsilluman dey.
17 et juppot nam shokkooh minin,
toxt nam heikk qari daamunte,
seqareell orr se dikkuma Mooha hin purenne tsillum patt qeeddad,
Yesus kristoos shokkooh kapann kiyyat inpushatenn kallaanninan.
18 semmaalla qum juppot attaam shokkooh nam heikk qarop horatin dexetep,
erkama tsilluma kristoos shokkohat nam heikk horat kela passisan kiyyat iddaannin.
19 acacama diitta attaam shokkooh minan qum orr lek juppampayy koddenep,
acacama kristoos shokkooh minan orr lek tsillampayya koddinan.
20 ikkim juppot lekintoss halitt dey;
hekoddu male juppot leka mittass dikkuma Mooha ikkaan leken.
21 hin kodden,
qum toxt minin juppot daamuntep,
poldaaynu Yesus kristoos kapan ikkim kiyyat parpar akkaannintos dikkuma Mooha tsilluma daattan daamuminan.