aprihaam amaantetann tsilluma akkad
4
1 semmaalla aprihaam hin appaaynu kodd maanaa akkad henkidinna?
2 et aprihaam erkaman tsillampayt kodd kid,
iyaan iyyat infoojinu qaafnaattaay;
hekoddu male iyaan iyyat Mooha tur infoojinu amm heqapamu.
3 matsaafa miilot,
"aprihaam Mooha amaan;
amaanteshayyenno tsilluma idihant" hekidin.
4 nam erkanniyyu kodashshet iddaassamishshu,
heriy erkamoyyaatess male amm pattayaassemu.
5 hekoddu male,
et namat erkamaan dikk qafnaatta diiyyu nafe,
et Mooha se juppampayya tsillampayya kodiyu amaano,
amaanteshiyy tsillumaass iddihaminta.
6 taawitenno nam Moohot erkaman kodda male tsilluma iddih,
iyy hartood koddaayy akkisaas sedep kidin,
7 "orr qarkalmaaddu all iyyaa diissamen,
jupposhadonno all iyyaa ushuqant,
iyyaan hartood;
8 nam Moohot juposhayy qari diha diinniyyu
iyy hartood!"
9 illo kat hartoota hin orr se karrasamessehamu?
shoke orr se karrasama diiyessenno?
orr se karrasama diiyessenno;
tureesh "aprihaam Mooha amaan,
amaanteshiyy tsillum iyy dihant" henkidin.
10 amaanteshiyy aprihaam tsilluma idihant awame?
karrasamaayy tureeshshamu shoke karasamaayy kanneeshsha?
karrasamaayy tureeshsh male amm helpaan iyyat karrasam kannaamu.
11 aprihaam karrasama tureeshsh amaanteshiyy tsilluma iddihamaadd akkisaass karrasamot ishshaakass iddaassam.
semmaalla aprihaam,
orr se karrasama male amaaniyyu,
amaanteshiddu tsilluma iyyaa dihamishshu dahenness appa kida.
12 settep lamm aprihaam orr karrasamessenno appa;
iyyat orr karrasamess appaaddu koddiyyu,
karrasamaaddu maallaah kodda male amaantet se iyyat karrasama tureeshsh qapu kanni antaaddu maallanno kida.
irraxatet oot amaantetat daasant
13 aprihaamenne hottaayy husslah taya irraxatet iddaassant,
tsilluma amaantet kapin kodden male amm halitt kaysisaannemu.
14 orr irraxatet tayin et iyyaan halitt lushanniy koddan kid,
amaantet amm heriy qafnaannaxatemu;
irraxatetanno aypot koddaxat kida.
15 halitt,
jiiayt moohaaten deyin;
hekoddu male et halitt teek kid,
halitt qar tarpot amm kinnaannaayemu.
16 semmaalla irraxatet hinett amaantet qarass haayant kida;
irraxatet settenno ikkim hotta aprihaam dahennes lushamintu Moohot dikkumoyyin daattaayy heufunashant.
sedenno iyyaan halitt lushanniyasseeh kodda male iyyaan heka aprihaamep amaaniy dahennessenno kida;
iyyat dahetaynoss appa.
17 oot aprihaamess,
"appa siip leketessin hed kodina" hekidant tsaafant.
irraxatet hin maalla aprihaam daasant,
oot iyyat Mooha se iyyaan raaw toxt ila sohashinniyonne iyyaan kinnaatta diiy ikkim kinnaaninan kodiyu amaan maalla kida.
18 aprihaam akkan iyyat irraxatet uqqari haayanninu kinnaatta male lel se "hottaatt iskaap lekina" kidam lelam qapattan,
ikkim appa siip leki koddinu amaanaann irraxatet kodad.
19 iyyat par tseetap kiyyu kaysiy dakinshiyy tashite haaya fotta diittaayy,
saaranno haay dapaadd ufnaad nafe amaanteshayy qari amm hekellayemu.
20 amaantetann qim serka Mooha dehayy male irraxatet se Moohot iddayy amaantetin qeedattaass amm heshurshuremu.
21 irraxatet se Moohot iddayyenno ikkim ikkaysisa fottinu mutsurooyy qalleett amaaniy.
22 semmaalla amaanteshiyy tsilluma iddihant.
23 et koddonno,
lel hin "tsillum koddit iyy dihant" kidiyyu tsaafam,
aprihaameseeh kodda male;
24 innossenno kida;
innu iyyaan Mooha se poldaaynu Yesus toxt ila sohashiyy amaaniyassenno amaanteshinnu tsillumass dihamint.
25 Moohot ikkim iyyat jupposhaynu maalla toyinoss tarpiyy dayy;
tsillampayya innu kodassenno toxt ila iyy sohashiy.