amaanama Mooha
3
1 orr ayhuta siip pil qara maanann tawan?
shoke karrasamot maana kodina?
2 ayhutishsh koddot paana heikketen shaakketass heaak.
hin heikk qareell tooyamiyu,
Moohot lelaayy ayhuta hark haayaayy kida.
3 kat ayhuta ila orr shakkan amaanama diittaaddu,
amaanama Moohaat all hattinninamu?
4 amm apure all hattinninamu!
qum it,
"lelaayt qara sohattaann tsillampayt koddinta;
horatanno hedess quuraminta"
kidamt tsaafantep namat et dahenn eerpampayt koddonno Moohot shaakket.
5 hekoddu male et jupposhinnu tsilluma Mooha ufunaytinnishshu koddo,
maanan kidinna?
et Moohot jupposhaynu minin horat innu qari quur kid,
amm shaakketass horat quuremu kidaamu?
antu sed ishaamiyyu qum qaap namatess kida.
6 amm sedep koddintamu!
et sedep koddito Moohot ashshann husslah qari horat quurina?
7 et eerpaawu shaakket Mooha akkisan,
lekusa serkoyy akkinniyyan koddo,
kat maanaass juppampaytap horat an qari quuraminta?
8 orr shokku afan,
"akkan dikk akkattaass akkan nayq erkannaa" kidiyyu kollinniyop tooyaan an keyin;
semmaalla horat orr sedep kiyyu qari quuramishshu it pahit kida.
namat dahenn juppampayt
9 semmaalla maanan kidinna?
innu orr ayhuta kodda diiy qaran tawunamu?
iyyokku!
ayhutaanno koddu orr ayhuta kodda diiyyennno namat dahenn juppampayt koddaayy turassin qattiyy lel;
10 qum it,
"amm tsillampayt hekiyamu;
amm shokkooh naf hekiyamu;
11 nam qall qaapanniyyonno amm hekiyamu;
nam Mooha fadiyyonno amm hekiyamu;
12 dahenn paana Mooha patin dapen;
iyyaan awta dap kodden;
nam erkama dikk erkanniyyu shokkooh naf amm hekiyamu.
13 leli nayq,
nam didinniyu ishaamaass
kapatiddu qum poosaan qahisamet;
arrapaddon nam eepumusinnin;
ishaama hibbodotenno qum marset maakaatep kiyyan;
14 kapaaddu qallessenno pishaymaanne ishaama haddawiy innaakod.
15 lukkoddu nam ikasaas hoshin;
16 paanaaddu patetanne poyrumann nam qari deyin;
17 amm paana andot heupanemu;
18 amm Mooha huuriyanemu."
kidant tsaafantep kida.
19 hin acaca halitt ishaamiyyu dahenn iyyaan halitt kannaatt kiyy koddaaddu henxufni;
semmalla siipat iyaan iyyaa qari marmanninan dapinan illo rui kidinan;
husslahatenno dahenn horaat Mooha kanneett kinnaanina.
20 semmaalla aynonno halitt lushattaan amm Mooha turi tsillampayt koddinamu;
maana maalla,
halitt,
namat dahenn juppampayt koddaayy akkinnin.
tsillumat amaantetann
21 ammann lamm paana Moohot naman tsillampayt kodiyu halitt male kodaayy heakkaad;
sedenno maanyetum matsaafadda halitt muusetenne heka himampayyaaten ufunaytisam.
22 semmaalla Moohot reehayta koda male orr se Yesus kristoos amaaniyyu dahenn tsillampayya kodin.
23 maana maalla,
namat dahenn juppot erkay illo serkaan Moohot iddayy dap.
24 semmaalla orrat erkama qaaxama hin Yesus kristoos kaysiyy kapann dikkuma moohaatin heriy male tsillampayya kodden.
25 Moohot,
ikkim orr iyy amaaniy dahenn diissama juposhaddu diikaayyin akkanninaness,
Yesus kristoos laaqqa dehayy;
Moohot maalla sed kod,
juppot se olo erkawusant alldiittan duupattan tarpisan tsillumaayy akkisaass kida.
26 sapan sede lamm Moohot mashshayy tsillampayt koddaayy akkinniyyu,
orr Yesus amaaniyyu dahenn tsillampayya kodaan kida.
27 ammann iyaan innu infoojinkkinnu maaniya kiyy?
amm akkanat hekiyamu!
maanaassin infooja diinnin?
innu infooja diinninkinnu,
oot innu amaantetin tsilluma akkann maalla male,
amm oot innu halitt acacamin maallamu.
28 "semmaalla,
Moohot tsillampayt nam kodiyu,
namat erkama halitt kaysisan kodda male amaantetan" henkidin.
29 kat Moohot Mooha ayhutaateehamu?
Mooha orr ayhuta kodda diiyetennon hinemu?
shaakketass iyyat moohaaddonno kida.
30 heyye,
Moohot shokkooh;
ayhutaanno koddu orr ayhuta kodda diiyenno dahenn iyy tsillampayya kodiyu iyyeeh.
31 semmaalla,
amaantet minannin halitt all hatinamu?
iyyokku!
laaddu qiminninhinna qapanninna male.