paanussa orr qara lelam
16
1 alawshaynu feep,
taaqonishshet se maapar kristaana se kenkiriyaalle kiyyu qarqaarishshu inn harkassin haay.
2 oot it ananne orr lek qarqaart maalla qum keessuma qeeddattot miilampayya qara fadamiyyu mittaas mahh poldatin it qeeddattan iyaan it fadusinniyy dahennin it qarqaaraa.
3 birisqiilanne aqiil hin erkama Yesus kristoosin an olle kiyy qara paanusaawu lelaa;
4 iyyaa an maalla toxt dikkisaden;
anaaha kodda male maapar kristaana se lek heka orr ayhuta kodda diiy por amaantetatep deyenno iyyaa aypisannin.
5 maapar kristaana se manaaddu orrqudiqapamiyyossenno paanussaawu lelaa.
ebenetsoos se issiyaa qalle turi qatta kristoos amaan antu hoxsaanniyyu paanussaawu lelaa.
6 maariyaam se inni erkasan payyahiti paanussaawu lelaa.
7 kafaawu ayhuta ila antironiiqosenne yuniyaasa hin an olle hidamess paanusaawu lelaa;
iyyaa orr an turin kristoos amaan,
otant orr hitaym ila ufunasham kida.
8 ambiliyaatoos se antu poldin hoxsaanniyyu paanussaawu lelaa;
9 urupaanos se kristoosin innu olle erkanniyyonne istsakes se antu hoxsaanniyyu paanussaawu lelaa.
10 abeliis se kristoosin kinnaattaayy ekkawsam,
maanyetum qapu paanussaawu lelaa;
orr man aristsopulosetesenno paanussaawu lelaa.
11 kafittaawu herotiyon ayhutishshi paanussaawu lelaa;
orr man narsisaas ila hin pold amaani paanussaawu lelaa.
12 iskatt se erkama Mooha maalla tashshiyy,
iyyaanno trufaynanne trufosa paanussaawu lelaa.
persis se erkama Mooha erkasan qimishshu antu kristoosin it hoxsaanniyyu paanussaawu lelaa
13 rufoos se poldi erkasan ikkaan ufunashami paanussaawu lelaa;
inkoshayy se inkotawop an hoxsannishshossenno paanussaawu lelaa.
14 assinkiritosenne filekosenne hermesessenno,
patropaasessenno,
hermaasessenno,
kafaaynu hin iyyaa olle kiyyassenno paanussaawu lelaa.
15 filolokosenne yuliyanne,
neeriyanne alaawshayyessenno paanussaawu lelaa.
settep lamm olumpasessenne miilampayyaan iyyaa olle kiyyi paanussaawu lelaa.
16 dinkishsh miilin orrdinkan paanussa olli dehayyaa.
maapar heka kristoos dahenn paanussa inni dehannin.
korsa muutayta
17 kafoot!
orr se kollilaan inn qeeddatten shiittan otaanshayn qalli reehaytetanne kohaytin deyiyy kenda illushadaa;
iyyaa raantanno all sekaadaa!
18 orr sedep kiyy kardaddoseeh male amm poldaaynu kristoosi erkanniyyanemu.
ishaamaan diddikkap kiyy ishaamaanne eerpan kanneell nam qaqapaann dippatayya eepumusinnin.
19 iyyaan lel masmasuntat acacamiyy koddaann nam heikk kapi dakaysamaad maalla henmasmas;
hekoddu male ikkimi akkan dikkass iyyaan qallishshaakiyy,
akkan nayqass lamm dippatayya koddintanessin fadin.
20 et sedep koditane Mooha andot daanniyyu shakar kidina lukkaann kannaatt seetsan qall dokkonnina.
dikkuma poldaaynu heka Yesus inn olle kinnaadenii.
21 tsimootiyos se an olle erkanniyyonne kafaawu hin ayhuta kodd,
luqiyosenne iyaasonnenne sosbatsiroosenno paanussa inni dehannin.
22 an tsertsiyoos se hitaym sed tsaafenno poldannin paanussa inni dehannin.
23 kayiyos hin ananne maapar kristaana dahenn qeeddanniyyu paanussa inni dehannin.
erstsoos se kaadayt kodashshet saparanetti koddenne kafittaaynu qurtsoosenno paanussa inni dehannin.
24 dikkuma poldaaynu heka Yesus kristoos dahetaynnin inn olle kinnaadenii;
ameen.
dinkam aypila
25 lel masmasunt se antu leliyonn,
hitaym se oot Yesus kristoosi tarpisamiyyonne lel shaakket se olo hir dekam ammann lamm patpahenn,
Moohot amaanteshaynin ikkim kokkaannintan koda fottina.
26 ammann lamm shaakket hin patpahit,
matsaafadda himampayya kapin ufunashant;
acac Mooha parparatennenno ikkim siipat dahenn Mooha amaaninan iacacaminan lelant.
27 Mooha se iyyeeh ufunampayt koddess,
Yesus kristoos kapin parpar aypila koddenii!
ameen.