kann arsama kristaana qari pai
12
1 essete Daam herootisa kidamiyyu maapar kristaana ila karaddu rakkusisa hir.
2 ankas yewannis yayqoopenno pillawann ikusiyy.
3 hin iyyat erkayenn orr ayhuta masmasaaddu herootis akk illo betsiroosenno qapusiyy.
hin kodden,
helpa serkila laaqqotate kida.
4 iyyat qapusiyye man hidanatep kaliyy illo faasika kanna siip turop qeedda horat qari quurusisa qaapad illo nam afur afure ikkim koddinan lushinaness wartyada por afur qootami dayy.
5 semmaalla,
helpaan betsiroos man hidanate kiyyo maapar kristaana qiminniyan Mooha iddinkamin
hitaymishsh Mooha betsiroos man hidanate sohashshiyy
6 herootis paarreshadde betsiroos siip turop horati dehasaas qaapad makess;
awsette awadd betsiroos sansala lakken hidam otant wartiyada lakk talli pead.
wartiyada pilanno kaalt man hidan settet lushin.
7 uilaxaash hitaymishsh Mooha akkaad,
man se tallassenno attumat attummatt,
hitaymishsh settenno betsiroos dindalleeshsh daw hayiyy illo,
"shakar kid sohadu!"
ikkid;
sansaladdaanettenno harkooyy pataatt all yexen.
8 hitaymishsh illo,
'hidadu,
hopoottanno kodadu!"
ikkid.
betsiroosenno qum se iyyat iyy acacess kod;
hitaymishsh lamm,
"halpaayt uuwadu illo an kanni hoyyii" ikkid.
9 betsiroosenno man hidan talla iyy kanni sohad;
lamm hin hitaymishsh erkanniyyu afa raaetin akkiyyop ikkinnaaden male shaakket koddaaddu amm heishaakemu.
10 helpaan iyyaa waartiya shokkiyyaanne lakkiyya kapa tarpene karfa silf se harrat se op ullin saparaap sohanniyan kapa kiyyo paiyen,
karfa silf settetenno namat qappatta male iyyaa qahisam.
iyyaa paana shokku tarpene hitaymishsh settenno esseteeh iyy kapa reehad.
11 helpaan betsiroos ixiishshaake,
"poldat hitaymishshaayy hitan hark herootisenne hin orr ayhuta an qari qaapaden dahenn ila an dinisaayy ammann shaakketassin ishaak."
hekid.
12 helpaan iyyat sed ishaak kanna man maariyaam,
man inkot yewannis se marqoos kidamiyyotep aan;
ulla lamm siip lek orqudi qapam Mooha dinkamin kida.
13 helpaan iyyat karfa kokkoiyye erhaytet roota kidamishshu aynu koddaayy ishshaakaas harrop ant.
14 helpaan it nass betsiroos koddaayy ufunaatte masmasunt kaanten karfa tura qahisa male feelt tallop luunt illo,
"betsiroos harri ell!"
kidit lelt.
15 iyyaa illo,
"yaarikkishshamu!"
iti kiden.
it lamm,
"shaakketass iyy!"
hekidit;
iyyaanno,
"aynu up shoke hitaymishsh Mooha se iyy lushyu koddinan."
hekiden.
16 betsiroos lamm karfa kokkoisa orikannann qap;
helpaan iyyaa karfa se qahiyyen iyy akkene heshammaden.
17 betsiroos lamm ikkim rui kidinaness harkan ikap kokkoiyy illo ikkim poldat ashshann man hidan talla iyy sohashiyy iyyaa ishaam illo,
"sed yayqoopenne kafaaynu shakkanassenno lelaa."
ikid illo iyyaa kapa reehad por pilap taw.
18 helpaan lashsh parite warityaddaan,
"maana betsiroosin taw?"
kidaann all jaraarahen.
19 lamm helpaan herootis betsiroos fadusiyy dapekuless waartiyaddaanett dikkyy kaassad illo ikkim all rawisaminani kod;
sekannakules herootis haft yihuta qalle sohad illo sapara qisaariyaatep aan ulli laiyy.
toxt herootis
20 herootis siip sapara tsirosetenne sapara siitoona olle jiiayta qap;
siip settenno shokkohumann erhayt Daam se bilaatsoos kidamiyyu kapop deyen ikkim iyyaa olle kinaanninnu senen illo Daam qara araarisa kaassaden,
iyyaa maalla sedep koden,
oot hussaaddu huss se daamat peashinniyu qara dama akkanniyyu maalla kida.
21 hooraan qapam qarass herootis uuwaat daamumat uuwad,
sheedda daamum qari lai illo iyyaa olle ishaam;
22 siipanno,
"hin nass Moohaat male amm nass namatemu!"
hekiden ullupen.
23 oot iyyat Mooha serkisa diiy maalla,
esseteeh hitaymishsh Mooha iyy dawi iyyat juhan damam toy.
24 hekoddu male lel Mooha lashmin qallipaldattann kaan.
25 parnapaasenne saaol erkamaaddu kaysiyyen illo yerusaalemeeshsh antsokiyaap mitaaten;
yewannis se marqoos kidamiyyonnenno iolle deyen.