betsiroos iyaan iyyat erkayy orr hitaymati ishaam
11
1 orr hitaymatenne kaf hin yihuta kiyyu siip ayhuta kodda diiyyenno lel Mooha qeeddattaaddu dakayen.
2 helpaan betsiroos yerusaalemep aane orr ayhuta hin amaaniyy ila shakkana iyy shiitten,
3 "man orr se karrasama diiyetep ant iyyaa olle dama dant."
ikkiden.
4 betsiroos lamm hirayta qara hiran orkann orkanna sedep kid iyyaa lell.
5 "helpaan antu iyoobe Mooha dinkamanniyyo raaetin akk;
hin antu akkenno,
uuwaat kaantep kiyy dind afurin qapam moontalleett lekkanniyan an turop deyiyyane kida.
6 helpaan antu illissanniyyu tooyiyyo horet husslah iyaan lukka afur qapanne pinanaanne iyaan lahan soohiyanne hampiraan errin hayanniyin akk.
7 essete nass,
'betsiroos,
sohadu,
qaladu,
damii.
' kidiyyun dakay.
8 ananno,
"polda,
amm koddintamu,
iyaan miila diiy oshshiyya amm apure kapann henkodemu."
henkid immitaattiyy.
9 lakkiyyaasenno nass,
'iyaan Moohot miiliyy oshshiyya kida diiyii.
' kidiyyu moontalleett ani mitaattiyy.
10 hin halpattin kodden kanna dahenn moontalleel qeeddamen.
11 "esseteeh orr hin qisaariyaashsh an kapop hitam nam halpatt man se antub kessummumi ulla kiyyo harra paen.
12 laaffot miilotanno ikkimin shurshura male orr se hitam olle anninu ani lelt.
kafadaawu nam leh settenne an ollennin ann man qorneloos tallop luunn.
13 iyyanno hitaymishsh Mooha manayy talla iyy akkaattaayyenne,
"iyoobep nam hitii illo simoon se betsiroos kidamiyyu hembusiyyii;
14 iyyat iyaan hedenne orr manaayit indinannintan hedi lelina" ikkidaayy innu lel.
15 helpaan antu ishaama hire laaffot miilot qum it turaqatta innu qari lekkattep iyyaa qarassenno lekkatt.
16 essete lel se poldat,
"yewannis haqann ahaliyy,
inn lamm laaffot miilotann ahalisamintan."
kid an mashsh oori.
17 et Moohot daayyaay se iyyat helpaan innu Yesus kristoos pold amaanne innu dayy iyyaa dayyo;
kat antu Mooha dawura fottinhinnamu?"
18 helpaan iyyaa sed dakayene,
iyaan iyyaa mitaattinninan dapen illo,
"sedeeshsh Moohot siip ayhuta kodda diiyessenno juppot qara mitaatan kiyyat awshittet iyyaa dayy" kidaan Mooha aypisaden.
antsokiyaalle orr Yesus amaaniyyu kristaana kidamaaddu
19 orr rakkot se isitsifaanos qari deitt minin hussall muut hak nakul finqetessenne hak utet qobiroos se pakatet ila kishshotessenne hak sapara antsookiyaatess aanen illo orr pili lela male orr ayhutateseeh lel Mooha lelen.
20 hekoddu male helpaan orr qobiroosetenne orr sapara qereena ila karatiddu antsokiyaap deyene lel masmasunt heka pold heka Yesus orr kiriketi lelen.
21 poldanno irrotayyen iyyaa qarqaarin,
orr lekenno amaanen por poldatep mitaaten.
22 hin ulli koddamenno maapar kristaana se yerusaaleme kiyyu dakay illo antsokiyaap parnapaas hit.
23 helpaan iyyat dey hin Moohot dikkumooyyin erkayy akke hemasmas illo ikkim dahenn qiminan mutsura qallelli poldi kallaanninan kors.
24 iyyat nam dikk,
laaffot miilotanne amaantetin innaakood kida.
siip lekenno por poldatep mitaaten.
25 sekanna parnapaasenno saaol kann fadaass sapara tsersesetep aan.
26 helpaan iyyat akke antsokiyaap indey.
iyyaa lakkenno parass maapar kristaana olle lel Mooha siip lek kolliyen.
soolletanno antsokiyaalless hirayta qara kristaana kidant hembant.
27 helpaanette himampayya yerusaalemeet antsokiyaap deyen;
28 iyyaa ilanno nam akapoos kidamiyyu husslah dahin qarass ikkim laaot kaant koddintu laaffot miilotin lel.
(hin kodden,
helpaan qelaawtoos daamume kida.)
29 soolletanno qum iyyaa fotten mittass mashshamashshaddu qarqaarsa poha illo kaf se yihuta kallaanniyyu hita kutaden.
30 qarqaarsa settenno pohen,
illo parnapaasenne saaol qari qimaayya kristaanat hiten.