betsiroosenne qorneloos
10
1 saparaan qisaariya kidamiyya nam qorneloos kidamiyyu kiyy;
iyyat sinkit tseet heka orr tor rooma se "hala tsaaliya" kidamiyyot kida.
2 iyyat orr manayy dahenn olle Mooha shoomattan Mooha huurin;
hiyayya hesin lashsh min Mooha kapop dinkamayy dehannin.
3 lashsh shakka kallap saatet tsinqot qara hitaymishsh Mooha iyy kapop dey illo,
"qorneloos" kidiyyu iyy hembiyyo raaetin pat pahiyy akk.
4 helpaan iyyat hitaymishsh set illisad tooyiyyo nahaman,
"polda!
maaniya?"
kid.
hitaymishsh settenno,
"dinkamaaytenne qarqaarsa att hiyayya daannishshu Mooha kapass inqaapawusama hedi kodden.
5 ammann iyoobep nam hit illo simoon se betsiroos kidamiyyu hembusiyyii.
6 iyyat pakatet kapa man qool koshampaytate,
man simoone keesummum kiyy" ikkid.
7 helpaan hitaymishsh hin iyy lel iyy kapa tawe qorneloos erhamaayy ila nam lakkenne wottaattar ila iyy Mooha huuriyyu hemb illo,
8 heikk iyyaa lel illo iyoobep hit.
9 paarreshadde kallap saatet leh qara iyyaa anniyyan saparaanette paene,
betsiroos Mooha dinkamattaass man se iyyat ulla kiyyo errop fayyad.
10 helpaanette betsiroos hetuffi illo dama dama fad,
pihot dikkisamiyyo,
raaet akka hir.
11 raaet se iyyat akkenno,
moont qahisant akkan uuwaat kaantep kishshun dind afureeshsh qapam moontalleett lekkanniyyu kida.
12 uuwaat se qallenno pinana lukka afur qapanne iyaan lahan soohiyyanne hampiraan errin hayaniy dahenn kiyy.
13 helpaanette nass,
"betsiroose!
sohadu illo qaladu damii!"
kidiyyu dakay.
14 betsiroos lamm,
"polda!
amm koddinanemu!
antu iyaan miila diiy oshshiyya kiyy amm apure hendamemu."
hekid.
15 lamm nass,
"iyaan Moohot miiliyy oshshiyya kida diiyi."
kidiyyu qar oor dakay.
16 iyaa halpattin sedep kodden kannakuless hin uuwaatap kiyy esseteeh moontalleel qeeddamen.
17 helpaan betsiroos furila raaet hin iyyat akk,
"maana koddinan kat?"
kidiyyu qaapattan baaquriyyo,
orr hin qornelos hit,
kaassiyan man simoone paen harri ellen.
18 hembantaanenno,
"simoon hin betsiroos kidamiyyu man iyyat kessummum ulla kiyyu hiniyemu?"
kiden kaassaden.
19 helpaan betsiroos hin iyyat raaetin akk qalli adattaalle kiyyo laaffot miilot,
"nam halpatt,
toare,
hed fadin;
20 sohadu lekkadu;
an iyyaa hite,
shurshura male sohadu illo iyyaa olle aanii."
heikkidit.
21 betsiroosenno helekkad orr se kapop aan illo,
"toare,
nam inn fadishshan anayyu;
iyaan inn maalla deiten maana?"
iyyaa kid.
22 iyyaanno,
"innu deinn,
sinkitt tseet qornelos kapa kida;
iyyat nam dikk,
iyy moohaanno huuriyyu,
siip ayhuta dahin serkinniyu kida;
hed manaayyep hemba illo iyaan att iyy lelishshu dakayass hitaymishsh Mooha iyy lel."
he ikkiden.
23 betsiroos illo kessummumi tallop iyyaa qeeddad.
lashsh lakkiyaate iyyaa olle sohad aan;
sapara iyoob qalle kaf se kiyyu ilanno karatiddu iyy olle aanen.
24 paarreshadde qisaariya paen;
qorneloosenno orr manaayyetenne katooyy hemb illo betsiroos lushannin.
25 helpaan betsiroos ulla pae,
qorneloos iyy kapop dehaad illo lukkaayy keli kilp ishshoomad.
26 betsiroos lamm,
"errop ellii!
ananno qumaaytep nam!"
hekid illo errop ellashshiyy.
27 iyy olle ishaaman tallop luum illo siip lek orqudi qapam akk;
28 illo,
"nam ayhuta orr pil olle kinnaatta,
manaaddopanno kalaass amaanteshaynon dawuramaadd heufutan;
hekoddu male ikkim antu aynossenno iyy miila diiyy shoke oshshitt inkidiness Moohot ani akkiyy.
29 semmaalla helpaan hembantaatt an qarin pae shiitta malen dey;
ammann lamm maanaass an hembiten henkidin inn kaassannin."
he iyyaa kid.
30 qorneloos illo,
"halapal tura kishsho eesk saatet tsinqot qaran manaawu dinkamannin;
farnatta male,
nam uuwaat haahisa haahinishu uuwad an turi elli illo,
31 "qorneloose,
Moohot dinkamaayt hedakayy;
qarqaarsa att hiyayya daannishshonno hedess qaapawusam;
32 ammann iyoobep hitaym hit illo simoon se betsiroos kidamiyyu hembusiyyii;
iyyat pakatet kapa man qool kooshampayt man simoone kessummumi kiyy.
' ani kid.
33 semmaallan esseteeh antu hed mina hit;
hedenno deyaaytenn iyaan dikk kodit;
ammann iyaan poldat hed acac dahenn dakayaassin innu dahenn are Mooha tura kinn."
ishaama betsiroos
34 betsiroos ishaama hire,
"shaakketass Moohot qariqatta erkasa diittayy henxishaak;
35 nam huss ahatenno et koddo,
et Mooha huuriyyu illo iyaan dikk erkanniyyo,
Moohot iyy qeeddannina.
36 Moohot siip israaeletatess Yesus kristoos se heikketess pold kodd kapann lel masmasunt heka andot hitaayy iufunasham.
37 yewannis oot ahalila kolliyy kanna,
hin kelila hiran hak huss yihutaat kodd dahenn heufutan.
38 "lamm Moohot Yesus nasiratishshass laaffot miilotanne irrot daattaayy heufutan;
oot Moohot iyy olle kiyyu maalla,
iyyat iyaan dikk erkasaanne orr qayyin qapam dahenn dinisaan mimmitaat .
39 "paattaan huss yihuta qalle kiyyanne sapara yerusaalem qall hin iyyat erkayy dahenness innu maanyet;
iyyaa qoyr qarass iyy rahhen ikayyen.
40 hekoddu male Moohot lashsh halpattiyaate toxt ila iyy sohashiyy illo ikkim nam akkaanninu kod.
41 iyyat amm nam heikketess akkaademu.
iyyat akkaad,
innu iyyaan Moohot turaqatta maanyeti pahisadessenne iyyat toxt ila sohad kanna iyy olle dam ukess kida.
42 iyyat iyy orr kiyyat qaponne orr raawi qari horat quura Moohot pahiyy koddaayyess ikkimin maanyet koddininnonne lel masmasunt siip lelinnoss innu acac;
43 nam iyy amaaniyyu dahenn ikkim diissima juppot mahhaayy minan akkanninoss himampayya dahenn maanyet ikkoddin."
orr ayhuta kodda diiy laaffot miilot qeeddaden
44 helpaan betsiroos sed ishaamiyyo orr se lel Mooha dakayiyyu dahenn qarass laaffot miilot lekkat.
45 orr betsiroos olle dey,
kristaana ayhuta dahenn Moohot siip se ayhuta kodda diiyyessenno laaffot miilot daattaayy akkene heshammaden.
46 iyyaa shammanniyan oot siip ayhuta kodda diiy kap pilin ishaamiyyan Mooha aypisanniyanenne serkinniyane iyyaa dakayen maalla kida.