saol kristaana miidaayy
8
1 lamm saaol ikawusama istsifaanosess iyyaa olle sen.
awusette maapar krsitaana se yerusaaleme kiyyu qarass miidama kaan pai.
orrhitaymat yerusaalem hat male kristaanat dahenn yihutaanne samaariyaalles purjaajen.
2 orr Mooha huuriyyonno ikkaaness istsifannos pooyen,
mooken.
3 saaol lamm maapar kristaana all pulpulaass manna kel antan iskattanne diidda qapin hidin.
4 hin all purjaajenno por se iyyaa ullop feeladene dahenn lel Mooha lelen kolliyyen.
5 filiboosenno sapara samaariyaatep aan illo oot kristoos siipi lel.
6 helpaan siipat hin filiboos ishaamiyyu dakayen,
hin nam shamusinniyy iyyat erkanniyyonno akkene mutsura shakkanoohan iyy qara qeeddaden.
7 orr lekk qallenno laaffot oshshittet nass kaanen ullupin sohannin;
orr lekk iyyaan muluhluhenne hokkaliyy dinannin.
8 saparaan qallessenno masmasunt kaant koddit.
9 saparaan qalle nam shokku op simoon kidiyyan,
"anaaha taw" kidiyyu soumin siip shammusinniyyu kiyy.
10 namat dahenn,
"irrot Mooha hin kaant hiniy!"
hekidin orr lekk iyy kap dakayin.
11 siipat iyy kap dakayiyyu oot iyyat helpa leke soumaayyin iyyaa shammusinniyu maalla kida.
12 lamm helpaan filiboos oot daamum Moohaatenne oot Yesus kristooset lel masmasunt iyyaa lele diiddanne iskattanno heamaanen illo ahalisamen.
13 simoonenno mashshayyess heamaan ahalisam illo filiboos olle kinaatta hir;
helpaan iyyat ishaakanne shammot kaant erkawsamishsho akkekules heshammad.
14 orrhitaym hin yerusaaleme kiyy,
orr samaariya lel Mooha qeeddattaaddu dakayen illo betsiroosenne yewannis ullop hiten.
15 helpaan betsiroosenne yewannis ullop aanene ikkim laaffot miilot qeeddanninaness Mooha iyyaa dinkamen.
16 maana maalla,
iyyaa mahh pold heka yesusenn heahalisamen male iyyaa ila nam shokkooh naf qarass amm laaffot miilot helekkattemu.
17 helpaan betsiroosenne yewannis harkaddu iyyaa qar qapene laaffot miilot qeeddaden.
18 helpaan orrhitaym harkaddu orr qari qapan laaffot miilot iyyaa daassamaadd simoon akke kodashshetan dey illo,
19 "nam antu harkaawu qari qapiyu dahenn ikkim laaffot miilot qeeddanninoss anassenno hayyotum sed dayyaa."
kid.
20 betsiroos illo kide,
"daayy Mooha kodashshetin akkatta qaapatte,
kodasheshaytenne hed ollin pataa!
21 oot mutsuraatt Mooha turass iyaan dikk kodda diiyen maalla,
amm erkama hin ila poranne qootan heqqaftamu.
22 sedeeshsh nayqunshayt qara miitaatii;
sho qaap mutsuraatt all hedi diinninu koddo pold dinkamadu;
23 att maxashanum nayqin innaakoottaaytenne hidan juppot ila kinnaattaaytin akkine" ikkid.
24 essete simoon lamm,
"hin inn lelten ila shakkanooh naf an qari paisa tura inn mashshayni pold ani dinkamaa."
he iyyaa kid.
25 helpaan betsiroosenne yewannis lel pold ishaamenenne lelen kanna samaariyaalle paatta lek qalleesh lel masmasunt lellelaan yerusaalemep mitaaten.
filiboosenne toobbiyyishsh
26 hitaymishsh Mooha filiboosess,
"sohadu illo paana se yerusaalmeett sapara kaasaatep anniyyun dind tapup qari aanii;
paana settenno lak patpatt kiyyop annin."
he ikkid;
27 iyyat sohad aan illo kunaayt shokku,
toobbiyishsh yerusaalemep Mooha shoomatta dey akk;
nam hin haet toobbiya se hintekk kidamishshoss iyy pasad dahenn qarann kaadayt kodd kida.
28 iyyat mitaatiyyo sarakalla qarass lai matsaafa isaayaas heka himampayt waarusinnin.
29 laaffot miilot illo filiboosess,
"sarakalla se kapop dehaadu!"
ikkid.
30 filiboos lamm sarakalla kapop feel illo iyyat matsaafa isaayaas heka himampayt waarusinniyo dakay illo,
"matsaafa se att waarusinnishu hedi kaliyamu?"
ikkid.
31 iyyat illo,
"nam qall ani furinniyu kinnaatta male ashshann ani kala fottina?"
kid illo ikkim filiboos sarakalla qallep fayyanninu iyy kapi lainninu dinkamad.
32 lel iyyat matsaafa se qalle waarusinniyonno hiniyy,
"iyyat qum laha se op qalot inxanniyanetep kodd;
qum henoaan et op pat mujiyane rux kidiyatep kodd;
iyyat amm kapayy hehokkiyemu.
33 iyyat hedeesaw,
horat pahitenno amm iyyi hequurantemu;
kiyashiy husslah qara all qeeddante,
oot dalashoshayy aynu ishaama fottina?"
34 kunaayt hin lamm filiboosess kide,
"intu ani lele,
himampayt hin oot opaaynoss sed ishaam?
oot mashshayyetemu shoke oot nam pilate?"
35 filiboosenno lel matsaafa sed qara hir illo oot Yesus,
lel masmasunt illel.
36 iyyaa paanaalle anniyyane haq kapa paen illo kunaaytin,
"toare haq,
ahalisamaass maana an dawuraay?"
ikid. [
37 filiboos illo,
"et mutsuroott dahennenn amaanto fottihinta."
ikkid.
iyyat illo,
"Yesuset kristoos meet Mooha koddaayy amaaninkiya" kid.]a
38 kunaayt settenno sarakalla sett ellashusiyy illo filiboosenne iyy lakkaddun haqallep lekkaden,
filiboos iyy ahaliyy.
39 helpaan iyyaa haq se qalle sohadene laaffot pold filiboos qeeddit intawt;
illo kunayt hinett lakkiyaas amm iyy heakkemu,
hekoddu male masmasuntann paanayy qapad.
40 filiboos lamm sapaaraan asaatson kidamiyass akkaad;
hak qisaariyaatep deyinos saparaddaall dahenn mimmitaatan lel masmasunt lelin kida.