ishaama istsifaanos
7
1 suuka suukammaatenno,
"ishaama hin shaakketemu?"
hekid istsifaanos kaassad.
2 istsifaanos illo sedep kid,
"kafaawonne appadaawu an qar dakayaa!
appaannu aprihaam sapara kaaraanetep kala turann helpaan iyyat huss masobotamiyaate kiyyo Mooha serkisam iyy akkaad illo,
3 'hussaytenne kafaayt ketta rehaadu illo por se antu hed akkinniyopa aan.
' ikidd.
4 essete iyyat huss keletaate sohad illo kaaraan kallaad.
appaayy toy kanna lamm Moohot huss se inn aww ulla kallaanishshanep iyy hit.
5 hekoddu male por hooft lukketatep kiyyu naf amm ulla iyyi hedayemu;
hor,
aprihaamet meedda qafnaatta turann,
huss sed Moohot iyyanne iyy kanna hottaayyi tayima daattaass irraxatet iddayy.
6 Moohot iyyass kide,
'hottaatt huss pilass patayya koddinan,
aylum kelass par tseet afur rakkotin kallaanninan.'
7 lamm Moohot,
'antu siip se aylet iyyaa kodad qarassin horat quurina;
hottaaytenno ulla sohanninan por sed ili ani shoomanninan.
' hekid.
8 tampet karrasamaatenno ishaak kakaati iddayy;
helpaan aprihaam isaaq haaye lashsh lakkushiyaate karasusisiyy;
settep lamm isaaqenno meetaay yayqoopess tampet se kaysiyy;
yayqoopenno meddaayy hin appada mayt hundan lakk koddess settep kaysiyy.
9 "oot appada kafittaaddu yoosefi maxashanumen maalla,
aylumass kiptsep iyy kashaden;
lamm Moohot iyy olle kinnaad.
10 rakkoshayy dahenn ilanno iyy sohashshiyy;
Daam kipts farion turassenno kaanusaanne qall ishaaka iyy dayy.
farionenno huss kiptsetenne manayy dahenn qarass kaadayt iyy kod.
11 essete huss kiptsetenne huss kanaxan dahenn qarass laotanne rakkot qint koddit illo appaddaanu dama iyyaa daminan dapen.
12 yayqoop uunt huss kiptsete kinnaattaadd dakay illo turaqatta appadaannu ullop hit.
13 iyyaa lakkiyya aanene lamm yoosef kafaayyess iufunaytiyy;
farionenno dalashot yoosef ufunaad.
14 sekkannakules yoosef appaayyenne orr manaayy nam hund tappanne hen dahenn hembusiyy.
15 lamm yayqoop kiptsep aan;
iyyanno appadaannonno ulli raawen.
16 lafishiddu qeeddant,
poosaan sapara sekemete kiyy aprihaam medda emor qara kodashshetin pidd qalli mookant.
17 "helpaan irraxatet hin Moohot aprihaam dayy kaysaannishsho dihaassa siipaaynu hin kipts qalle kiyy ikkaaness lekan aanen.
18 essete Daam,
yoosef ufunaatta diiy huss kipts peashisa hir.
19 iyyat siipaaynoss paas iyaan nayq iyyaa qar erkayy,
ikkim meddaaddonno all kashaminan raawinaan appadaannu koom.
20 "essete muuset dalad,
illo meet Mooha turi sommoma qapu kodd;
man apayyetessenno leha halpatt kamm.
21 helpaan iyyat all kashame inant farion iyy akkatt qeeddatt meetadd kodatt kammisatt.
22 muusenno ufunat kiptset dahenn koll;
erkamaanne lelannenno nam qim kodd.
23 "helpaan iyyat par hund afur kaysiye kafaayy israaelet tooyaass qaapad.
24 kafaayy ila nam shokku nam kiptsetin miidamiyo akk illo qarqaar dawi ikayy.
25 muuset ikkim Moohot iyyin aylum kela kafayy sohashinninu,
afa kafaayy qaapanninanep ikkinnaatt makess;
iyyaa lamm amm sedep heqaapadenemu.
26 paarreshadde lamm israaelet lakk ikkaan ollin jiianniyane muuset akk.
orrmina kaapa hinnaad illo,
'inn kaf shokkooh maanaass orrmiidin?
' iyyaa kid.
27 "hin kayshayy miidiyu lamm muus all tuquur illo kide,
'aynu innu qari peashisampaytanne horat quurampayt hed kod?
28 qum att hal kiptsishsh ikattep an ikasa hintamu?
' ikid.
29 helpaan muuset sed dakayekuless huss mitiyaamep feelad pataytissha koddan kallaad,
illo ulli imm lakk haay.
30 "iyyat par hund afur ulli kallaad kanna hitaymishsh Mooha utet siina kidamishshu qara haalayt apittatin huushsha ilaashsh ixakkaad.
31 helpaan muus sed akke heshaammad;
iyyat kapaash kidd illissad tooyiyyo,
nass pold,
32 'antu Mooha appadaatt Mooha aprhaamenne Mooha isaaqenne Mooha yayqoop.
' kidiyyu dakayiyyo huuraann helshad;
illo amm il tooya hefottemu.
33 poldanno,
'oot por hin att ulli ellit iyy miil kodd maalla,
lukkaatt kela hopa all furiyyii.
34 rakkot siipaawu se huss kiptsete kiyyu henxakk;
ullupittaaddonno hendakay illo iyyaa dinisa lekkad;
ammann hooyii!
antu kiptsepin hed hitina.
' he ikkid.
35 "muus se siip israaelet,
'aynu peashisampaytanne horat quurampayt hed kod?
' kiden shiitten,
Moohot hitaymishshaayy se huushsha ila iakkad kapan peashisampaytanne iyy aylum kela sohashinninu kod hit.
36 iyyat huss kiptsete iyyaa sohashiyy;
kiptsenne pakatet ertiraatenne lak patpatt kiyyu qalli par hund afur iyaan nam shammusiniyanne ishaak erkayy.
37 iyy 'otant kafaayn ila Moohot himampayt anap kiyyu inni sohashinnina' kid siip israaeletat lel,
muus sed kida.
38 nam hin iyy hitaymishsh se olle utet siinaat ishaamenne appadaannu ollenne siip se lak patpatt kiyyu qalle orqudi qapam olle kinnaad illo lel Mooha se kiyyat daanninno innu tarpisa qeedd kida.
39 "appadaannu lamm iyy qara dakaya amm hefadenemu,
iyy qeeddatta hittiyen,
mutsurooddu qalletanno qaraashsh kiptsep mitaata qaapaden.
40 aronesenno,
'muus hin kiptse innu sohashshiyy ikkim maana qara kiyyu amm henxufnamo,
moohada sinkiyya innu koddina,
innu tureeshsh annina innu soorumii!
' he iyy kiden.
41 helpaanette suutanna paahnat okkatin koden laaqqa iqqalen;
erkama harkaddotennenno masmasen.
42 moohaanno iyyaa turi yipir kid;
qum se it matsaafa himampayya qalli tsaafant,
ikkim iskaan moont quda kiyyi shomanninan tarpiyy iyyaa dayy.
settenno qum it,
'meddu israaelet!
horet se qalantenne laaqqa
kat par hund afuress lak patpatt kiyyu qalle shaakketass ani dehattenemu?
43 suutannaann hin inn harkaynin soorunten
ishoomannishshan,
tunkaan suutanna heka molokkennea
iska suutannaann hin inn refaan kidishshan haitten.
ananno ikkim paqintan sapara papilon qaran tarpintanessin inn kodina.'
kidant himampayyan tsaafantep kida.
44 "appadaannu lak patpat kiyyu qalle tunkaan Moohot kinnaattayy akkinniyyu qapan;
tunkaan settenno qum Moohot iyy lelenne iyy akkiyy qarass muuset soorum.
45 helpaan appadaannu huss siip se Moohot iyyaa tura kann ariyy tayene iyaasu olle tunkaan setten ullop kalen,
iyyat hak sapan taawitet ulli olad.
46 taawitenno Mooha turass kaanussa akkad illo Mooha yayqoopess man diha Mooha dinkamad.
47 hekoddu male iyy man Mooha dih salamon kida.
48 "et koddonno Moohot rummot man hark namatin diham talli amm kallaanniyamu;
hinenno qum himampayt,
49 'moont sheeddoyyu;
hussanno por lukkoyyot;
kat man ashshann kiyyu ani dihintan?
por antu ulli haysanninonno iashshann kiyyo?
hekidin poldat.
50 hin dahenn iyaan harkaawu erkayinhinemu?'
kid tsaafep kida;
51 "inn iyyaan iij kodd,
mutsuraann duhamenenne lappaan dakaya diinniy qap,
inn qum appadaannatep helpa min laaffot Mooha shiitin.
52 himampayya ila appadaann aynu kanni arisa diiyen?
himampayyaan turaqatta dexema tsillampayt sedi lel alli raawiyen;
ammann inn iyy hetarpitten ikusitten.
53 inn hitaymiyya Mooha kapann halitt qeeddatten,
hekoddu male amm helushatenemu."
istsifanos dakaann reepam toy
54 helpaan daet arfayta sed dakayene mutsuroodu qalleet miirooden illoddu kapa qaninsaden.
55 istsifaanos lamm laaffot miilotann innaakkod moontallel illissad tooy illo attummat serka Mooha akk;
yesusenno miskitt Mooha qari ell iyyat akk illo,
56 "toare moont qahisam,
meet nam miskitt Mooha qari ell antu akkin."
kid.
57 essete iyyaa ikkaanes ullupen laappooddu qall qapaden illo shokkohuman iyy kapop feelen;
58 saparaallenno all iyyin sohaden illo dakan reepa hiren.
helpaan iyyaa dakan iyy reepiyaane maanyetanno lukka kolkolt shokku saaol kidamiyyu kapass uwawaaddu haayaden.
59 helpaan iyyaa dakan iyy reepiyane istsifaanos,
"Yesus poldallo!
nafseshawu qeeddadu."
hekid dinkamad.
60 lahassenno kilpiyad illo,
"polda!
juppot sed iyyaa qari diha diiyii!"
kid nass kaanin ullup illo toy.