erkamampayya tapp pahisamaaddu
6
1 essete orr Yesus amaaniyyu lekan anniyo,
orr ayhuta iyyaan kap kirikket ishaamiy orr ayhuta iyyaan kapa ipret ishaamiy qarass kumuliyatta hiren.
iyyaa maalla kumuliyaniyanenno,
iskattaaddu hin irshadaadddu qarin raawen qarqaarsa se lashsh min qootamiyu akkatta diittaaddonn kida.
2 semmaalla orr hitaym hundan lakkenno orr amaaniyyu dahenn hemben illo ikidene,
"dama qoota maalla lel Mooha kollisa amm all diitta innu fadusinniyyamu.
3 semmaalla kafoot!
nam tapp iyyaan laaffot miilotanne ufunatin innaakood koddaaddu ufunasham otanshayn ila pahiyaa;
erkama hin iyyaassin daanninna.
4 innu lamm dinkamanne lel Mooha lela mina kinaannu."
5 ishaama hin siip dahenn masmasusiyen illo iyyaa istsifaanos se amaantetanne laaffot miilotin innaakkoodenne filibosenne birokorosenne niqaronanne tsimonanne berimenne niqoloos antsokiyisha se amaantet ayhuta ilop kalenno pahiyen.
6 orr hitaym turassenno ellashiyen illo iyyaa harkaaddu qari qapen Mooha iddinkamen.
7 lel moohaatenno qall paldaattaan aan illo yerusaalem qallessenno orr Yesus kanni anniyyu lekan aanen;
suukamma Mooha ilanno iyyaan lek amaanen.
qapama istsifaanos
8 istsifaanos dikkunt Moohaatenne irrootann innaakood illo yeshuttaanne ishaak kaan otant siip ili erkannin.
9 essete orr ayhuta hin qarenaanne iskintriyaanne kilqiyaanne issiya dey man dinkam se,
"heka orr aylum kela sohad" kidamiyyu ila kiyy hesohaden illo istsifaanos shiittin.
10 hekoddu male qallixishshaakaanne laaffot miilot se iyyat inxishaamiyu turi ella amm hefottenemu.
11 essete lamm orr,
"nam hin muusenne Mooha qari otitta leliyon dakayn."
kidiyyu deketi iyy qari dikkiyen.
12 siipanne qimaayaanne kollisampayya halittatenno seseyiyen illo istsifaanos aanen qapen arfayta turop dehayen;
13 illo orr maanyet eerpa koddenno,
"nam hin por sed miilenne halitt qari lel otitta lela amm all hediiyemu;
14 lamm,
'yesus naasratishsh hin man sed allin paqinnina;
tampet muus innu tarpiyenno all oohina.
' kidiyyo hendakayn" hekiden.
15 arfayta orquda qapam dahenn helpaan iyyaa iyy il tooyiyane miintiyy miint hitaymiyya moohaatep kinnaatt iyyaa akken.