hanaaniyanne sabbiira
5
1 nam shokku hanaaniy kidamiyyu haypaatayy sabbiira kidamishshu olle ul kash;
2 it heufunaattete kodashshet se qara hattiyy illo shakkin aan orrhitaymat dayy.
3 betsiroos lamm sedep ikkid,
"hanaaniya!
ikkim laaffot miiloti paasintu illo heriy ulayt qara all hattisannintoss seetsanat ashshann hedi qallep kal?
4 att kasha turannenno hekaaytinhinemu?
att kashshikannanno kodashshet hin hekataytinhinemu?
kat maanaass sed mutsurootti qalli qaapatt?
Mooha turass eerpoott male amm nam turassemu."
ikkid.
5 helpaan hanaaniy sed dakaye hesunk illo toy;
orr ishaama hin dakay dahenn ikkaan huuren.
6 orraxashiyanno dakinshayy dikkiyen illo inxaanen mooken.
7 saatet halpattap kishshu oladen kanna haypaashiyy hin kodd ufunaatta male ullop luunt.
8 betsiroos illo,
"intu ani lele,
ulaayn sedess kashshenemu?"
ikkid.
itanno,
"heyye sedessin kashin."
ikkidit.
9 essete betsiroos lamm,
"ashshann laaffot pold ekkawusatta senten?
toare orr irshayt mook alta paen,
hedenno qeeddinan mookinan."
he iti kid.
10 it illo esseteeh lukkeshayy kapi sunkit toxt;
orraxashiya hin irshaadd mookenno helpaan iyyaa tallop luumiyane it toxt akken illo qeedden irshaadd kapi mooken.
11 maapar kristaanaatenne orr se ishaama hin dakayenno dahenn ikkaaness huuren.
ishaakanne yeshutta orr hitaymatin erkawusam
12 orrhitaym ishaakanne yeshutta lek otant siip ili koden;
orr amaaniyonno dahenn mutsura shakkanoohann kodden illo por tarpanta salamooneti orqudiqapamin.
13 orr pil ila nam shokkooh naf iyyaa olle kinnaattass amm hefottemu,
hekoddu male siipat dahenn iyyaa serkinnin.
14 orr pold amaaniyyu diiddanne iskatt dihaassaaddu lekaan aanen.
15 semmaalla orrat helpaan betsiroos tarpiyo ikkim kaattaayy naf baaqampayaan ila karaddu qarin painaness roohhaanne afandaalli paana kapi peashinnin.
16 lamm orrat saparaan yerusaalem kapeesh kiyy qalle baaqampayaanne orr laaffot oshshittetin rakkanniyon deyin,
iyyaanno dahenn dinannin.
kannxarsama orr hitaym qari pai
17 essete suuka suukammaatenne kaf satuqet ila orr se iyy olle kiyyu dahenn maxashanumann innaakooden iyyaa qari sohaden;
18 orr hitaymatenno qapen man hidanatep kaliyen.
19 hitaymishsh Mooha lamm awadda karfa man hidan qahiyy iyyaa furiyy altop sohashiyy illo,
20 "man miilotatep aanaa illo lel sed heka kiyyat awshitteti dahenn siip lelaa!"
he iyyaa kid.
21 orr hitaymatenno acacaayy dakayen illo paarreshadde etikel lashsh yaama turin man miilotatep aanen kollisa hiren.
helpaan suuka suukammaatenne orr se iyy olle kiyyu ulla paiyenne arfaytanne qimaaya dahenn hemben illo ikkim man hidanate orr hitaymatin deyinan hiten.
22 lamm orr se hitamenno man hidanate paiyene amm iyyaa ulla heakkenemu.
helpaan iyyaa mitaatene,
23 "kaalt man hidan iqimess duhant,
waartiyadaanno hakatalles ellen innu akkin;
helpaan innu man hidan qahinne lamm man talla amm nam henxakkinemu" hekiden.
24 kaadayt wartiya man miilotatenne kaadayya suukamma helpaan iyyaa sed dakayene,
"hin lamm maana koddinan?"
kidaann hallutta iyyaa koddit.
25 essete nam shokku dey illo,
"toare,
orr inn man hidanatep kalitten man miilot altass siip kollin."
kid iyyaa lel.
26 esseteeh kaadayt wartiyada heka man miilot orrayy olle aan iyyaan dey;
oot iyyaa siipat dakann innu reepina kiden huuren maalla,
amm irrotann indeyenemu.
27 iyyaa indeyene arfayta turass ellashiyen illo suuka suukammaatenno,
28 "mahh sedin kollisa diiyyaa innu inkidin innan acacinemu?
inn lamm toare yerusaalem dahenn kollilaannan innaakiten;
lamm toxt nam sedetin innu qapin."
ikkid.
29 betsiroosenne orr hitaym lamm sedep kiden mitaattiyen,
"nam qara dakaya kapeshsh Mooha qara dakaya innu fadusinnin.
30 Mooha appadaannu,
Yesus se inn masqalet qari rahhiten ikatten toxt ila sohashshiyy.
31 Moohot,
ikkim Yesus siip israaelet juppot qara mitaattitininoenne diissama juppot iddaanninoss sinkittanne dinisampayt kod,
miskittaayy qari serkan laxashshiyy.
32 sedess innonno maanyet kida;
laaffot miilot se Moohot orr se iyyi acacamiyyu dahenn dayyenno maanyet kida."
33 helpaan arfaytot sed dakayene,
ikkaaness jiiaden illo orr hitaym all raawisa faden.
34 lamm nam kemaaliyaal kidamiyyu siipat dahenn serkinniyu farasishsha kollisampayt halitt kodd arfayta ila kiyyu erri elli illo ikkim orr hitaym dind qari alli kiddinan acac.
35 illo arfayta sedep kid,
"meeddu siip israaelet!
hin inn orr sed qari erkannishshan qall qaapadaa.
36 sed tureeshsh nam tewotaas kidamiyyu,
'antu nam kaan' kidan sohad nam tseet afurep kiyyu iyy olle kiyaad;
hekoddu male iyyat ikawsame orr se iyy kanni oorenno dahenn purjaajen,
qaapaaddonno aypot kodd.
37 sekkanna lamm helpa dihaassa siipate yihuta kelilishsh sohad siip lek ikkanni ooriyy;
helpaan iyyat ikawsame orr iyy kanni oorenno dahenn hepurjaajen.
38 semmaalla ammann innass lelin,
orr sed qara mitaataa;
all iyyaa diyyaa!
erkama hin shoke qaap hin et heka nam koddane patinan.
39 lamm et qaap Mooha koddo amm iyyaa pusha fottihintanemu;
laaddu sedep kodaanna Mooha qari sohatta inn koddinta."
he iyyaa kid;
iyyaanno korsaayy qeeddaden.
40 illo orr hitaym hemben litsootin kaypen;
ikkim iyyaa mahh Yesus inkollinin acacen illo allhayyen.
41 orr hitaym lamm mahh Yesus minan deesot qeeddattaaddonn,
masmasuntan arfayta kapa sohaden aanen.
42 lashsh min man miilotatenno manna tallaashanno Yesuset kristoos koddaayy kollisanne lel masmasunt lela amm all hexellashshiyenemu.