betsiroosenne yewannis arfayta ayhuta turop dehaaden
4
1 helpaan betsiroosenne yewannis siipi ishaamiyane suukammaannea kaadayt wartiyada man miilotatenne satuqet iyyaa kapop dey.
2 oot orrhitaym siip kolliyenenne toxt ila sohatta Yesus minan toxt ila sohattot kinnaattaayy lelen maalla iyyaa lamm hejiiaden.
3 semmaalla betsiroosenne yewannis qapen illo oot lashsh ponnaatt maalla,
hak etikelat man hidaanat peashshiyen.
4 hekoddu male orr se ishaamaaddu dakay ila orr lek heamaanen;
dihaassa diiddaanib amaanetenno nam kum hen kay.
5 paarreshadde kaadayya ayhutaatenne qimaayaanne kollisampayya halitt yerusaalemess orqudi qapamen.
6 orr se orqudi qapam ilanno suuka suukamma haannanne qayaafanne yewannisenne iskinitroosenne kaf suuka suukammaat iyyaa olle kiyy.
7 iyyaanno orr hitaym lakka sett otanshaddu ili ellashisaden illo,
"irrot opaaynonn shoke mahh (hayyotum) opaaynonn sed erkatten?"
kiden iyyaa kaassaden.
8 helpaanette betsiroos laaffot miilotan innaakood illo,
"meeddu qimaayaanne kaadayya siip!
9 awwi innu kaasawusaminkinnu,
oot erkamaan dikk hin shoopayt sett erkawsamenne ashshann ikkim iyyat dinad maalla kida.
10 nam hin iyyat dinad inn turi ell,
mahh (irrot) nasiratishsh heka Yesus kristoos se inn rahhiten lamm Moohot toxt ila sohashshiyyin koddaayy inn dahetaynessenne siip israaeletat dahenn heufnashamu.
11 iyyat,
'daka se inn man dihampayya alltuffatten,
kaysila man kodd.
' kida.
12 semmaalla dinot Yesus kristoosenneeh male amm hepilann hekiyamu;
mahh indinaass Moohot nami dayy husslah qara iyy pateeshsh hepil amm hekiyamu.
13 helpaan betsiroosenne yewannis huura male ishaamiyan iyyaa akkene,
oot iyyaa orr kollinnat dap ulaash kiyyu koddaaddu upan maalla,
heyeeshen illo Yesus olle kinnaattaddu ishaaken.
14 oot nam se dinadenno betsiroosenne yewannis olle ell iyyaa akken maalla,
iyaan iyyaa mitaattinninan dapen.
15 semmaalla ikkim arfayta kapa altop all sohanninan acacen illo,
16 "ammann orr sed ashshannin kodinna?
shammot kaant harkaddu qalli erkawusamaadd siip sapara yerusaalem qalle kallaanniyoss dahenn heufunashame,
amm marmatta fottinhinnamu.
17 hekoddu male siip lek qarin paisa tura sedeeshsh mahh Yesus hemban ikkim iyyaa namass inxishaamin sissikinna dawrina;"
kiden mariyaden.
18 sekannass lamm hehemben illo ikkim iyyaa mahh yesusenn akkan shokkooh naf inxishaamin shoke inkollinnin acacen.
19 betsiroosenne yewannis lamm sedep kiden,
"intu inn wokaa,
kat Mooha qara dakaya kapeeshsh inn kap dakayot Mooha turi hedikkamu?
20 innu,
hin innu akkinenne dakayn ishaama amm alldiitta fottinhinnamu."
21 kaadayya siipatenne arfaytat,
oot siipat hin kodd minan Mooha aypisanniyu maalla,
iyaan iyyaa betsiroosenne yewannis maalla horsinninan akkatta diiyenenne siip tura huuraann qarxooren acacen illo all hayyen.
22 nam hin shammot se erkawsantin dinad paraayy hund afur qaareell kiyy.
dinkam orr Mooha amaaniyyu
23 helpaan betsiroosenne yewannis fursamene kafaaddu kapop aanen illo iyaan kaadayya suukammaatenne qimaaya ayhuta iyyaa kiden lelen.
24 helpaan kafaddu sed dakayenekules nassaddu erri qeedden illo shokkohumann sedep kiden Mooha dinkamaden,
"poldaaynu,
hed se hussanne moontanne pakatetanne iyaan uqqalle kallaanniy dahenn uum Mooha!
25 att laaffot miilotin erkamampaytaayt appaaynu taawit kapann sedep kidit lelt,
'orr ayhuta kodda diiy maanaass miirin sohaden?
siipanno maanaass aypoti suladen?
26 daamada husslah hesohaden;
kaadayyaanno shokkohumann orqudi qapamen,
poldanne kristoos hekayy qari sohaden.'
27 "shaakketass herootisenne bentsinishsh bilaatsoos orr ayhuta kodda diiyenne siip israaelet olle kodden sapara hin qall erkamampaytaayt se miil Yesus se att kristoos kodit qari sohaden;
28 it sedep koddit,
hin att turaqatta irroshaytenne hasaytin ulli quurt ikkim kaysaanninoss kida.
29 polda,
ammann miishshoshaddu tooyyii;
lamm erhamaatt ikkim lelaayt huura male lela fottinan kodii;
30 mahh (irrot) erkamampaytaayt se miil heka Yesusen ikkim baaqampaya dininan illo ishaakanne yeshutta ikkim kodaminan harkaayt akkiyyii."
kiden.
31 iyyaa dinkamaden kanna por se iyyaa ulli orqudi qapamen heshild illo iyyaa dahenn laaffot miilotin innaakooden huura male lel moohaatenno lelen.
shokkohum orr amaaniyyu
32 orr amaaniyyu dahenn mutsura shakkanoohanne qaap shokkooh qapan;
iyaan iyyaa qapan dahenn heka hulaytat kida;
nam,
"hin hekaawu" kidiyyu amm hekiyamu;
33 orrhitaymatenno toxt ila sohatta pold heka Yesus irrot kaantin lelin;
Moohot ikkaaness dahetaddun iyyaa qor.
34 oot iyyaa dahenn ulla shoke man iyyaa qapan kashiyan illo kodashshet settin deyiyan maalla,
otanshaddu ila amm nam rakkanniyyu hekiyamu.
35 kodashshet settennenno deyin orrhitaymati daannin illo iyyaa qum it ifadusinnishshu nami qootin.