shoopayt dinad
3
1 lashsh shakka betsiroosenne yewannis helpa dinkamate kallap saatet tsinqot qara man miilotatep annin;
2 ulla harrat "kaalt somm" kidamishshu kiyy;
orrat nam hak iyyat dalade hir shoopayt koddenn lashsh min deyin kaalt se kapi haayin;
iyyat ulli lain illo orr se man miilotatep kaliyu qara qasiyannin.
3 nam hin betsiroosenne yewannis man miilotatep kaliyane akk illo kodashshet iyyaa qara fadad.
4 betsiroosenne yewannis heillissaden iyy ili tooyen illo betsiroos,
"poraaynosh tooyii!"
ikid.
5 iyyat illo afa akkanat iddaassaminop ikkinnaad,
iyyat illo iyyaa ila tooy.
6 betsiroos lamm hekide,
"pirretanne worqet amm henqapamu;
hor iyaan antu qapun hed daannina;
mahh (irrot) nasiratishsh heka Yesus kristoosenn sohadu illo aanii!"
he iyy kid.
7 harkayy miskittishsh qap illo errop ellashshiyy;
esseteeh lukkooyyanne hinjillooyyanno qimen.
8 iyyat lamm laha full kid erri elli;
lukkooyyin antan iyyaa olle man miilot altop luume;
axantaanne tottoraannenno Mooha aypila dayy.
9 orranno dahenn iyyat anniyyu Mooha aypila dehanniyo akken;
10 illo nam hin iyy harrat man miilot se "kaalt somm" kidamishshu kapi lainnin kodashshet qasiyyanniyu koddaayy ufnaaden;
hin iyy erkawsamin ikkaan shammannin kida.
ishaama betsiroos man miilot talla
11 helpaan nam hin dinad betsiroosenne yewannis pat qapad olle kiyyo orrat dahenn shammattaann por se,
"por tarpanta salamoon" kidamiyop iyyaa kapop feelantan deyen.
12 helpaan betsiroos siip se akke,
"meeddu israaelet!
oot maanaates hinin shammannin?
maanaass illissannin innu tooyin?
afan irroshaynun shoke Mooha huuraaynun ikkimin nam hin anninu kodinepa inn kinnaannimu?
13 Mooha appadaannu Mooha aprihaamenne Mooha isaaqenne Mooha yayqoop erkamampaytaayy Yesus serkiyy;
inn lamm ikkim toyinos bilaatsoosi tarpitten daatten;
bilaatsoos all iyy hayya fade,
'amm iyy henhinnamu' hekkiditen.
14 se tsillampaytanne miilampayt kodd,
'amm henhinnamu' hekkiditen,
se nam ikayy ikkim inni furisaminu dinkamatten.
15 inn se kiyyat daanniyyu all ikatten;
Moohot lamm toxt ila sohashshiyy;
sedess innu maanyet kida.
16 nam hin inn akkishshanenne ufutan iyyat dinad qim,
mahh yesusin amaanaayyen kida;
iyyat irrot yesusenne amaantet se iyy kapin akkaannishshonn inn ilaashsh dinad,
dakinshayyenno andot akkatt.
17 "amman kafoot,
hin inn Yesus qari erkatten qum sinkiyyaannatep ufunat dapan koddaadd henxup.
18 lamm qum Moohot turaqatta kap himampayya dahenn qall,
'kristoos rakkot qeedatta iyy fadusinnin.
' kid qarass lelaayy ikkim kaysanninu kod kida.
19 sedeeshsh ikkim jupposhinn all inni ushuqamintu juppot qara mitaatan por moohaatep mitaataa;
20 pold kapanno sapan inn uqqalli awshumintan inni deyina,
Moohot kristoos se iyyat turaqatta inni pahiyy,
Yesus inn hitina.
21 moontalli olattot iyyi fadusinniyyu,
qum Moohot olo kap himampayya miilampayyaatin lelep haka heikk dahenn awshuminanes kida.
22 muusenno sedep kid,
'poldat moohaann otant kafaayn ila himampayt anap kiyyu inni sohashshinnina;
iyaan iyyat inni leliyyu dahenn dakayaa.
23 nam himampayt se kap dakaya diinniyyu dahenn siip Mooha ila reehamu all patu.'
24 ukannass lamm saamueleshsh hiraden himampayya dahenn oot sapan sedet torren.
25 inn taymampayya himampayyaat kida;
settep lamm Moohot aprihaamess,
'siip husslah qara kiyyu dahenn hottayten qoran akkanninan.
' kidan appadaannu olle kakaan iyyat kalenn inn taymampayaayya kida.
26 Moohot erkamampaytaayy sohashshiyy,
turaqatta inni hit,
shokkushokkotayne nayqunshayn qara inn mitaattisan inn qoraass kida."