lekkatta laaffot miilot
2
1 helpa serkila ayhuta heka lashsh hund heniyyaa hin "bentseqosts" kidamishshu paiyene soollet dahenn por shokkooh orrqudiqapamen.
2 nass kota kaanetep kiyyonno iyyaa kendda moontalleett dey illo man se iyyaa ulla kiyan innaak.
3 iyaan haalayt apittatep kikkiy qalliqoqqotamenno akken;
iyaanno nam nam qarass hayisaden.
4 orri settenno dahenn laaffot miilotann innaakoden illo se laaffot miilot ikkim ishaaminan iddaatin kapa pilin ishaama hiren.
5 essete siip husslah qara kiyyu ila orr ayhuta iyyaan huss dahenn qalle dey,
Mooha huuriy yerusaaleme kallaaniy kiyy.
6 helpaan iyyaa nass se dakayene,
siip lek iyyaa kapop dey;
iyyaa kapaddu kapaddun ishaamiyane,
oot iyyaa dakayen maalla,
iyaan iyyaa kidinan dapen.
7 yeshuttaanne shammattaannenno,
"orr hin sedep ishaamiyyu dahenn orr kellilaatin hinemu?
8 kat ashshann kapaddu kodda male kap hussaynu ishaamin innu dakayin?
9 innu orr baritet,
orr metenne orr elaam,
iyyaan mosopotaamiyaanne yihutaanne qapotoqiyaanne banitsosenne issiyaanne,
10 firikiyaanne binfiliyaanne kiptsenne paattaan huss liipiya qalle sapara qaraana kapaash kikiyya kallaaniyanne orr sapara roometeeshsh dey,
orr ayhutaatenne orr amaantet ayhuta ilopa kal kida,
11 orr qeritsesetenne orr arapaatenno,
toare erkama Mooha hin kaan iyyaa kap hussayinotin ishaamiyyane,
dakayninkinn" hekiden.
12 semmaalla iyaan iyyaa kidinan dapen illo shammattan,
"kat hin maaniyyaa?"
olli kikkiden.
13 orr shakkan lamm,
"ukot lekiyen taaroden" hekiden qar beejjiyaden.
ishaama betsiroos
14 helpaanette betsiroos orrhitaym hundann shakku sett olle err ell illo nassayy err qeedd siip setti sedep kid,
"orr ayhuta,
inn hin yerusaaleme kallaanniy dahenn hin ufunaadaa,
hin antu ishaamiyyu dikkiyyaa dakassadaa.
15 lashsh amman etikel saatet halpatt kida,
semmaalla orr hin qum inn qaapannishanes amm hetaarodenemu!
16 hekoddu male hin himampayt iyuel sedep kid lel ikkim kaysaanninos kida,
17 'moohot helpa muutaytaateb sedep koddint hekid;
laaffoshawun nam dahenn qara tiiqina;
meddaann diiddaanne iskatt hima himinan;
orraxaashiya raaet akkinan;
qimaayaann oommot omooninan.
18 lamm helpaanette erhamaawu diiddaanne iskatt qarass
laaffoshawun tiiqina
iyyaanno him himinan.
19 erra moontalless yeeshutta,
laha hussalessenno ishshaakin akkinnina;
diikanne apittanne qayya pooranno akkaannina.
20 lashsh pold hin kaant nam shamusinnishshu
deya tureeshsh,
lashsh poorinnaninta;
lehaanno diikap kinnaannina
21 nam mahh pold hembanniyu dahenn passannina.'
22 "meeddu isiraeleta,
lel sed dakassadaa,
qum inn mashshayn ufutaness Yesus nasreetishsh,
otanshayn qalless Moohot iyaan nam shamusinniyanne yeshuttaanne ishshaak iyy kapin erkasan aynu koddaay inni ufunaytiyy.
23 iyyat qum qaap se Moohot turaqatta ulli quurenne ufnaad qarass tarpisam inni daassam;
innanno ikkim nayqisampayac harki rahhaminu toynu kodusitten.
24 Moohot lamm irrot toxtat kela passiyy illo toxt ila sohashiyy;
maana maalla,
toxt iyy qapa hattisa amm hefottitemu.
25 taawitenno ootaayyes sedep kidin,
'helpaminin pold itura akkin;
ikkim antu ininahines iyyat an olle kiyy.
26 semmaalla mutsuraawu hemasmasen;
kapaawonno masmasuntann innaakkod;
settep lamm dakinshiyyu hin toyintu irraxatetann kallaanninta;
27 nafiseshawu amm siool ili alldiinnihintamu;
maana maalla,
miilampaytaatt ikkim poosaalli murqinu amm kodihhintamu.
28 paana kiyyatat an ufunaytitt;
an olle kinnaattaaytenn masmasunshiyu it kaant koddint.'
29 kafoot,
taawit hin appadaannu ila ishokku kodd,
toya mookamaayenne poosaayyaanno hak awwet are innu kapa kinnaattaaddu ilaash inni lelan fadin.
30 hekoddu male taawit sedep kida infott,
oot iyyat himampayt kodd illo ashkot se Moohot,
'hottayt ila iyy shokkun sheedda daamumaayt qari hedi haayina' kid irraxatet idday upu maalla kida.
31 taawit iyaan ittureesh koddina akkaan,
oot toxt ila sohatta kristoosesd,
ikkim iyyat por orr raawi ili hata diinninonne dakinshiyy poosaalli murqa diinnintu lel.
32 Moohot Yesus sed toxt ila hesohashiyy;
innonno sedess dahetaynon maanyet;
33 iyyat miskitt Mooha qari laxa moontalleel sohad kanna irraxatet laaffot miilot se Mooha appa kapa daasant qeedadd illo hin ammann inn akkishshanenne dakayishan innu tiiq.
34-35 amm taawit moontallep hesohademu male,
iyyat,
'poldat poldaawoss,
hak antu olishshadaatt lukkaatt keli hedi kodinu,
miskittaawu qari laii' heikkid.
36 "semmaalla Yesus se inn rahhiten Moohot kristoosenne pold iyy kodaay siip israaelet dahenn shaakketass heufunaadenii"
37 helpaan iyyaa sed dakayene mutsuraaddu qappasham illo iyyaa betsiroosenne orrhitaym hin shakkanass,
"kafoot!
kat maana koda innu fadusinnin?"
kiden.
38 betsiroos illo,
"juppot qara mitaataa;
diissima jupposhayn akkatta shokkushokkotayne mahh Yesus kristoosin ahalisamaa;
lamm laaffot miilot se dayya Mooha kodditenno qeeddannintane;
39 irraxatet hin innassenne meddonnassenne orr se sek moohaannu poldat ammann hembinos dahenn kida."
40 betsiroos lel pil ilek iyyaa lelaan,
"horat se dalashot sed nayq qari deyishu kela ipassiyaa!"
hekid qimiyy kors.
41 orr ishaamaayy dakay ila iyyaan lek lel Mooha qeeddad ahalisam;
awusette nam kuma halpattap kiyyu orr amaaniyyu qari padawam.
42 iyyaanno kollila orr hitaym dakayaanne shokkohumin ollin kallaattanne laaqqot olli moossaannee dinkamann kokkaannin kida.
shokkohum orr amaaniyyu
43 helpaanette oot iyaan nam shamusinniyanne ishaakat orr hitaymatin erkawusamiyu maalla namat dahenn huurin kida.
44 orr amaaniyyu dahenn shokkohum qapan;
iyaan iyyaa qapanenno dahenn heka hulayitat kida.
45 uladdonne mehaddoddonno kashin illo kodashshet se qum it nami fadusinnishshu mitti olli qootin.
46 lashmin man miilotat qaap shokkoohin orqudi qapaman kokkaannin,
manaddu tallanno laaqqot olli moossin mutsuraan dikkanne masmasuntin dama ollin damin;
47 moohaanno aypisannin illo siip turi dahenn kaanussa akkaden.
lamm poldanno lashshmin orr dinanniyu iyyaa qari padawin.