erkama orr hitaym
1
1 toofiloos!
matsaafaawu heka turaqatta qalless erkamaanne kollila Yesus dahennin tsaaf.
hin antu tsaafenno helpaan Yesus erkama hiradeeshsh hiraann
2 hak iyyat moontallep sohadess hin iyyat erkayy kida;
essete iyyat orr hitaym se iyyat pahisad laaffot miilotin acac kanna moontallep sohad.
3 lamm iyyat rakkot qeeddad toy kanna maanyetum lekenn kiyyatin kinnaattaayy iyyaa akkiyy;
lashsh hund afur iyyaa axakkaad illo oot daamum Mooha iyyaa kolliyy.
4 helpaan iyyaa ollin dama damiyyanea sedep kid iyyaa acac,
"irraxatet se appa kapa daassant antu inni lel lushadaa male yerusaaleme sohatta diiyyaa.
5 yewannis haqann ahaliyy,
lashsh qojj kanna Moohot laaffot miilotann inn ahalinnina."
Yesus moontallep qeeddam
(mar. 16,19-20; luqaa. 24,50-53)
6 helpaan iyyaa orqudiqapamene,
"polda,
kat helpaan att isiraeletass daamumaaddu mitaatinnintu daannintu ammannemu?"
kiden iyy kaassaden.
7 Yesus illo,
"hooraane sapan appat hayyotumayyin quur ufunaattaass amm inni hedaassantemu.
8 hekoddu male et laaffot miilot inn qari lekkatto irrot qeeddaannintan illo yerusaalemenne huss yihuta dahenn qalless samariyaallessenno por heikkete husslah qara maanyet ani koddintan."
hekid iyyaa mitaattiy.
9 helpaan iyyat sed lel kanna iyyaa heakkitete iyyaa ileeshsh moontalleel qeeddam;
urrashshetanno iyy akka iyyaa dawurit.
10 helpaan iyyat moontalleel tawiyu,
iyyaa kanneell tooya qara kiyyane uilaxash nam lakk iyyaan uuwaat axat uwadd iyyaa kapi ellen illo,
11 "orr kellilaate,
maanaass ari elliten moontallel tooyin?
Yesus hin inn kapa moontalleel qeeddam,
qum se iyyat moontalleel sohanniyyu inn akkitenep qaraatt mitaatina."
iyyaa kiden.
matiyaas por yihuta ili pahisam
(laale. 109,8)
12 essete orr hitaym utet se utet ekertada kidamishshooshsh yerusaalemep mitaaten;
utet settenno paana op lashsh sampataateb anniyanep kishshonn yerusaalem kettaashsh sekaannin kida.
13 helpaan iyyaa yerusaaleme paene,
man se iyyaa ulla kallaanniyane faattallep fayyaden;
iyyaanno,
betsiroosenne yewannisenne yayqoopenne intiriyaasenne filiboosenne tomaasenne partalomoosenne matiyosenne yayqoop imm ilfiyoosenne simoon se hussayy maalla sootinc kidamiyyonne yihuta imm yayqoop kida.
14 hin dahaddonn lashshmin mutsura shakkannoohann dinkam orqudiqapamin;
iyyaa ollenno iskatt karaddonne inkot Yesus maariyaamenne insharaddaayy kiyy.
15 helpaanette betsiroos otant orr amaan nam tseetann hund lakk ilass ell illo sedep kid,
16 "kafoot,
oot yihuta se,
orr se Yesus qap tura kiyyaadetess,
lel matsaafa miilot hin laaffot miilotin turaqatta taawit kapin lelam,
kaysaatta iyy fadusinnin.
17 yihutot innu ila nam shokku koddaann erkama hin ila iyy qootan qapu makess."
18 (nam hin kodashshet erkamaayy hin nayq maalla iddaassantenn lak pidd;
erra pei miint lahan shoom kardatiyy qalle lakki kaaxam marqina qalle tiiqamen.
19 orr yerusaaleme kallaanniyyonno dahenn sed ufunaaden illo kapaaddun lak sett 'akeltaama' kiden,
furila lel sedetenno 'lak diik' kida.)
20 ukkanna lamm betsiroos sedep kid,
"matsaafa laalet qalless lel,
'manayy enayt koddu,
nam ulla kallaanninonno kinnaatta diiyyu;'
lamm
'kaaddumayyenno nam pil qeeddadu'
kidiyyu tsaafam.
21 semmaalla helpaan Yesus poldat otanshaynu ila mimmitaatiyyo dahenn orr se innu olle kiyy,
22 iyyaanno iyyaan ahalila yewanniseeshsh hiran hak lashsh se Yesus moontallep sohadet innu olle kiyy ila nam shokku toxt ila sohatta yesusess innu olle maanyet kodda iyy fadusinnin."
23 sekannakul nam lakk dehayyen.
iyyaanno yoosef se parsapaas shoke iyositsoos kidamiyyonne matiyaas kida;
24 illo,
"polda,
hed se mutsura nam dahenn upu,
orr sed lakk ila aynu ikkim att pahisatt innu akkiyii;
25 yihutot porayep anniyyo,
erkama namhitaym hin iyyat allidiiy nam porayy ili koddinu qeeddaninu innu ufunusiyyii."
hekiden dinkamaden,
26 helpaan iyyaa hitsa kashiyyane hitsot matiyaasess pei illo iyyat orr hitaym hundan shokku olle diham.