bilaatsoos turop Yesus dehayyen
(mati. 27,1-2; 27,11-14; mar. 15,1-5; yewa. 18,28-38)
23
1 essete arfaytat dahenn sohaden illo Yesus bilaatsoos turop dehayyen;
2 sedep kiden iyy kasasa hiraden,
"nam hin siipaaynu patindapusinniyyon akkin;
Daam roomat tiiqot daattanno dawurin,
lamm,
'antu kristoos,
daam' hekidin ishaamin."
kiden.
3 bilaatsoos illo,
"att Daam ayhutaatemu?"
kid Yesus kaassad.
Yesus lamm,
"qum se att kiditepa" ikkid.
4 helpaanette bilaatsoos kaadayya sukammaatenne siipass,
"nam sed qarass nayqunt shakkaah naf amm henxakkemu" he hekid.
5 iyyaa lamm,
"nam hin kelila hirad hak aret,
huss yihutaatenno dahenn kollisan siip tulayya sossohashiyy" kiden qimiyyen kasasen.
Yesus herootis turop dehaad
6 bilaatsoos kelila kida dakayekules,
"hin nam kelilaatemu?"
hekid kaassad.
7 helpaan iyyat Yesuset nam huss se herootis peashshinniyyu koddaayy ufunaade oot herootis yerusaaleme kiyyu maalla ullop iyy kapop hit.
8 herootis helpa leke Yesus akka hadannin illo helpaan iyyat iyy akkekul ikkaaness masmasunt idakaysamaatt;
oot iyyat erkamaay dakay maalla Yesus shammot erkanniyyo akkaass irraxatet kodannin.
9 semmaalla herootis kaassiyy lek Yesus qara kaassad;
Yesus lamm akkan shokkooh naf amm iyyi hemitaattiyyemu.
10 kaadayya sukammaatenne kollisampayya halitt muusetenno ullass ellen illo qiminnin iyy kasasin.
11 herootisenne wotaataradda hin iyy olle kiyyanno tuffinann Yesus qari beejjiyaden;
iyyat illo uuwaat sira uuwashshiyy,
bilaatsoos kapop qalleeshsh mitaatiyy hit.
12 lashsh sette bilaatsoosenne herootis moyishada olli kodden kida;
se tureeshsh iyyaa jiiayta ollin qapan.
Yesus qarass horat toxtat quuram
(mati. 27,15-26; mar. 15,6-15; yewa. 18,39-40; 19,1-16)
13 bilaatsoos kaadayya suukammaatenne,
sinkiyya siipatenne siipanno orqall hemb;
14 illo,
" 'jiiaytaas siip sossohashinnin' hekiditen nam sed an turop dehaatten;
toare ananno inn ilaash iyy henkaassad,
iyaan inn nam sedin kasasishshan dahenn ila nayqunt shakkaah naf amm henxakkemu.
15 settep lamm oot herootisenno nayqunt iyy qari akka diiyy maalla,
innu mitaatiyy hit;
nam hin amm iyaan toxt qarin iyy pausinnina he erkayyemu.
16 semmaalla antu liitsotannin kaaypina illo all hayyina."
17 [par kapa helpa serkila faasika ayhutaate bilaatsooset orr nayqunt kod hidam ila nam shokku furinnin siipi all hayyin]a
18 semmaalla siipat dahenn,
"nam sed allpatiyyii!
illo parpaan innu furiyyii!"
kidaann orkapi ullupen.
19 parpaan nam jiiayta saparalli sohashshisaanne nam ikasa minin man hidanat hidam kida.
20 bilaatsoos Yesus furisa all hayya fad illo qaroor siip leli.
21 siipat lamm,
"alrahii!
alrahii!"
kiden ullupen.
22 bilaatsoos illo halpattiyaass sedep iyyaa kid,
"kat nayqunt nam hin erkayy maanniyya?
antu iyaan iyy ikusinnina amm qari henxakkemu;
semmaalla liitsotannin kaypina allhayyina."
23 iyyaa lamm nassaddu erri qeedden illo,
"allrahii!
allrahii!"
kiden ullupen;
ullupitt siipatenne heka kaadayya suukammaatenno iyy push.
24 sed minann hin iyyaa kaassaden ikkim iyyaa kaysanninaness bilaatsoos horat iyy qari quur.
25 se jiiayta sohashshisaanne nam ikasa minin hidanalle kiyyu kaassiyaaddu kanni iyyaa furiy;
lamm Yesus hinashoddu mitt iyyaa tarpiyy dayy.
rahhama Yesus
(mati. 27,32-44; mar. 15,21-32; yewa. 19,17-27)
26 helpaan iyyaa Yesus rahha anniyyane,
simoon qereenishshb paattaalleeshsh saparallep kaliyyo akken illo qapen,
ikkim masqalet hainninu Yesus kanneeshsh inxanninu koden.
27 orr lekenno Yesus olle annin;
iyyaa ila iskatt tomposaddu shoomatan iyy qara poyiyyu kiyy.
28 Yesus lamm poraddoosh mijir kid illo,
"meeddu iskatt yerusaalem,
ootaynenne oot meddonati pooyaa male an qara pooya diiyyaa!
29 lashsh op,
'iskatt qofoliyya kodd,
haaya diiyyenne ambaan luukisa diiyy maanaddu kiden!
' kidinan deyina.
30 helpaanette orrat utawwass 'innu qari sunkaa!
' utunnawwassenno,
'innu dekaa' kida hirinan.
31 hin sedep et qoyr se jap qari kodamishshu koddo,
qoyr se kok qarass ashshann qimint kodamint?"c
32 settep lamm nayqunt kodampayya lakkenn Yesus olle ikasa inxaanen.
33 helpaan iyyaa por se kolkota shoke hilayyat mashsh kidamiyyo paene,
Yesus otant nayqunt kodampayya lakk talli rahhen;
shokku pihitot qarass shokku miskitt qari Yesus kapi rahhen.
34 sekanna Yesus,
"appollo!
iyaan iyyaa erkanniyyan amm heupanemo all iyyaa diyyii!"
hekid.
wottattar settenno hitsa kashaden uuwaat Yesus olliqooten.
35 siipat lamm ullass ellen tooyannin;
sinkiyya ayhutaatenno,
"orr pil hediniyy,
et iyyat kristoos se moohan pahisam koddo,
mashshayy iddiniyu!"
kidaann qari beejjiyannin.
36 wottaattaranno settep qari beejjiyaden;
kapopanno dehaaden illo jarayt woynet ukkiyen.
37 settep lamm,
"et att Daam ayhuta koddito,
intu idiniyye!"
ikkidin.
38 tsaafa,
"hin Daam ayhutaat" kidiyyonno masqalet qari mashshayy mineett daaen.
nayqunt kodampayya lakk Yesus olle rahham
(mati. 27,38-44; mar. 15,27-32)
39 nayqunt kodampayyaan iyy olle rahham ila iyy shokku,
yesusess,
"att kristoosin hinemu?
intu issenno diniyy innonno diniyii!"
hekidin iyy otin.
40 nayqunt kodampayt shokku lamm,
"att lamm horat orpahtu ila kinnaattete Mooha huura diinnimu?
41 innu nayqunt innu kodin minannin horat innu fadusinnishshu akkannine nam hin nayqunt iyyat erkayy amm hekishshamu."
hekid tush.
42 ukkannass yesusess kide,
"poldaawo!
helpaan att daamumaytin deyishsho an qaapadu!"
43 Yesus illo "shaakketin hed kidin;
aww att por andotate kenete an olle kinnaanninta!"
ikkid.
toxt Yesus
(mati. 27,45-56; mar. 15,33-41; yewa. 19,28-30)
44 hin kodden,
lashsh kallap saatet leh koddishsho kida;
esseteeshsh hiran haka saatet tsinqotatess husslah qara dahenn poorinnat koddit;
45 attumat lashshatenno heteekit.
karrata man miilotatenno erraat haka lahati lakki qall kaaxam.
46 lamm Yesus nass kaanenn ullup illo,
"appollo!
toare!
nafseshawu harkayt qallessin alldaannin!"
kid;
iyyat sedep kid kanna nafseshiyy qalle sohatt.
47 helpaan sinikitt tseet hin ulla kiyyu,
hin kodd akkekuless,
"nam hin shaakketass tsillampayt!"
hekid Mooha serkiyy.
48 hin kodam tooya orr ulla orqudiqapam dahenn hin koddiy akkene,
dappisaann tompossaddu shoomattan maanoddop mitaaten.
49 orr Yesus uponne iskatt huss kelilaate hir iyy olle anniy dahenn por sekaashsh ellen illo hin koddiy tooyin kida.
mookama Yesus
(mati. 27,47-61; mar. 15,42-47; yewa. 19,38-42)
50 sekkanna nam shokku sapara ayhuta hin armaatiyaas kidamiyyalli dalad yoosef kidamiyyu kiyy;
iyyat tsillampaytanne nam dikk,
arfayta ilanno nam shokku kida.
51 hekoddu male iyyat sulat orr ayhutaatenne erkamaaddu olle amm hesenemu.
iyyat lamm nam dexema daamum Mooha irraatetin luushanniyyu kida.
52 nam sedenno bilaatsoos kapop aan illo ikkim dakint Yesus iddaassamintu kaassad;
53 illo dakint Yesus lekkiyy waalt qahnatin dikkiyyy illo poosaan turin namat ulli mookama diiy shilk ila qosham qalli haay;
54 sedenno iyyat kod arpe uldat helpa dikkisatta sampata ayhutaate kida.
55 iskatt kelilaashsh Yesus kanni deyenno yoosef olle aanen posaan akken;
dakint Yesus ikkim ashshann mookant tooyen.
56 manaddopanno kalen illo shittotanne iyaan dakintin roopa koddiyy dinnahunt somm qap dikkisaden;
paana tampeshaddotin lashsh sampataate hayisaden nakayen.