sulat Yesus qari sulant
(mati. 26,1-5; mar. 14,1-2; yewa. 11,45-53)
22
1 lashsh serkila laaqqot,
se faasika kidamishshu serkisama dehaatte;
2 kaadayya sukammaatenne kollisampayya halitt muus oot iyyaa siip tura huuren maalla,
paana iyyaa yesusin qapinan ikanninaness mala dawattaalle kiyyan.
yihutot Yesus tarpisa daattaass sen
(mati. 26,14-16; mar. 14,10-11)
3 helpaanette soolleshayy hundann lakk ila iyy shokku yihuta asqorootishsh kidamiyyu qallep seetsanat kal;
4 illo iyyat kaadayya sukammaatenne kaadayya wartiyya man miilot kapop aan illo ikkim iyyat ashshann qar Yesus tarpinninu iyyaa daanninu iyyaa olle mariyad.
5 iyyaanno ishaamaayyann hemasmasen illo kodashshet iyy daatta olli senen.
6 iyyat illo siipat ufunaatta male Yesus tarpisa iyyaa daattaass helpa dikk fadattaalle kiyy.
Yesus eetot muutaytaat soolleshayy olle damm
(mati. 26,17-25; mar. 14,12-21; yewa. 13,21-30)
7 essete lashsh se op laah faasika qaliyyan,
lashsh serkila laaqqotat paiyy.
8 Yesus illo,
"eetot faasika ikkimin daminu aanaa innu dikiyaa" kid betsiroosenne yewannis hit.
9 iyyaanno,
"eetot faasika ikkimin ahayl dikkinninnoss fadin?"
hekiden kaassaden.
10 iyyat illo,
"et saparaallep kalishshane,
toayte,
nam harsan haq haiyy akkintane;
iyy kanni ooraa illo man se iyyat ullop kaliyop aanaa" ikkid.
11 illo appa man settetess,
'kollisampayt,
por antu soolleshawu olle eetot faasika ulli daminu,
por keessumot ulli haysanniyyu ahayla?
hedi kidin' ikkidaa.
12 iyyat faattalle lak pald ulli afam dikkisam inni akkinnina;
ulli dikkiyyaa."
iyyaa kid.
13 soollet lakka settenno heaanen illo heikk qum se Yesus iyyaa lel qar kodden iyyaa akken illo eetot faasika sett ulli dikkiyen.
eetot pold
(mati. 26,26-30; mar. 14,22-26; 1 qoro. 11,23-25)
14 helpa eetot dehaadene Yesus orr hitaym olle eetot dama lai.
15 sedepanno iyyaa kid,
"rakkot qeeddatta turann inn olle eetot faasika sed damaassin ikkaan hadan makess;
16 hak hin,
daamum Mooha qall pata pahinan kaysanninaness,
sedeeshsh eetot sed hekata faasika amm daminhinamu;
hen inn kidin."
17 sekannakuless Yesus waallet qeedd dinkam aypila dehayy kanna ass kid,
"hinda sed ollin qootadaa;
18 innassin lelin,
sed kanneeshsh hiran hak daamum Mooha deyinoss woynet sed amm lakkiyya ukinhinamu."
19 ukkanna lamm Yesus laaqqot qeedd Mooha aypisad,
qall mooss illo soolleshayyess,
"hindaa hin sohaawu,
iyaan ootaayn daassamina;
sed anin qaqqaapadaa."
kid illo iyyaa day.
20 settep lamm eetot kanna waallet sett qeedd iyyaa dayy illo,
"waallet hin kaka awshiyya hin diikaawu se ootaayn maalla alltiiqaminotin koddina.
21 "hekoddu male hark nam se an tarpinniyyu daanniyyu toare an olle dama qara kiyy.
22 meet nam qum it turqatta ootaayy ulli quurant qarass toyina;
hekoddu male,
nam se meet nam tarpinniyyu daanniyyoss pelawu!
hekid.
23 iyyaa illo,
"innu ila nam hin sed erkanninu kat hekanne?"
kidan orrkakkaassaden.
kat innu ila aynu tawa?
24 lamm iyyaa "innu ila aynu dahetaynu qara taw?"
kidaann orrshiitta hiren.
25 Yesus lamm sedep iyyaa kid,
"daamada husslah siip qarass hayyotum qapan;
hin siip peashinniyanno siipass iyyaan dikkuma erkanniya kidamin;
26 inn lamm iyyaap kinnaatta amm inn fadusinniyyamu;
sekapeeshsh nam inn ila ikkaan kodd iyy tinnaxap koddu;
kaadayt erhaytap koddu.
27 nam se dama dama laxenne se ell dama dehanniyyu ila hekann iyy kaan?
hin iyy kaan kidamiyyu se dama dama laiyin hinemu?
antu lamm otanshayn qalle qum erhaytat kida.
28 helpa rakkoshawotenno dahenn inn an olle qinten elliten.
29 semmaalla qum appaawu an maakumusiyepin ananno inn maakumusinnina.
30 inn illo daamumaawu qalle damintan,
ukintan;
sheedda qar laintan,
mayt israaelet hundann lakk peashinnintan."
Yesus ikkim betsiroos iyy marmanninu turiqatta lel
(mati. 26,31-35; mar. 14,27-31; yewa. 13,36-38)
31 ukkannass Yesus,
"simoone!
simoone!
toare seetsanat qum op kaappa siqiyyaanep inn ekkasa fad.
32 antu lamm amaanteshitt allpata turan ootaayt Mooha dinkam;
helpaan att mitaatto kafaayt kokkiyyii."
hekid.
33 iyyat illo,
"polda!
hidamaanno toxtanno et koddito hed olle antaass antu henkutad" ikkid.
34 Yesus lamm,
"betsiroose hedesin lelin!
aww lukkalot iia turann 'amm iyy henxupamu' hekidint halpattin an marmannint" ikkid.
35 sekannakuless soolleshayyess,
"helpaan okolet kodashshetatenne karatsitetanne,
hopaanno qeeddatta male antu inn hite,
akkan inn qara kellaw hekiyyanemu?"
ikkid.
iyyaa lamm,
"iyaan innu qara kellaw amm hekiyyanemu" kiden immitaattiyyen.
36 Yesus illo,
"ammann lamm nam okolet kodashshetatenno karatsitetanno qapu heqqeeddadu;
nam pillaw dapenno uuwaatayy kashu illo pillaw piddadu.
37 lel matsaafa miilot hin 'orr nannayq olle diham' kidiyyu an qari kaysaatta iyy fadusinnin hen inni kidin."
iyyaa kid.
38 soolleshiyy lamm,
"polda!
toare pillaw lakk kiyy!"
he ikkiden.
iyyat illo,
"kaynan!"
iyyaa kid.
Yesus utet ekertada qarass dinkamad
(mati. 26,36-46; mar. 14,32-42)
39 Yesus saparaalle sohad illo qum iyyat kollep utet ekertada qarop aan;
soolleshayyenno olle aanen.
40 helpaan iyyaa por sette paene Yesus "ekkawsamaallep kala tura qimaa dinkamadaa" iyyaa kid.
41 sekkannakul happanta daka pahoss iyyaa kapa sekaad illo kilpan qullad sedep kid dinkamad,
42 "aappo,
et hasaayt koddito,
waallet rakkot sed an qara allsekayyii;
sekkapa qum hasaayt qari koddu male hasaawu kodda diyyu."
43 helpaanette hitaymishsh Moohaat iyy akkaad illo iyy kokkinnin kida.
44 mutsurooyy qalletanno ikkaan baaquran qiminnin dinkamannin;
unfadittayyenno qum diikat dandanan urqiyyop qara lahop deddekin.
45 helpaan iyyat dinkamaayy ila sohade,
soolleshayy kapop deyy;
iyyaa lamm oot iyyaa ikkaani dappiyyen maalla hepeaden,
iyyat qari pai illo,
46 "maanaa maalla peannin?
ekkawsamaallep kala tura hayaa dinkamadaa."
iyyaa kid.
tarpisama daassama Yesus
(mati. 26,47-56; mar. 14,43-50; yewa. 18,3-11)
47 helpaan Yesus sedep kida ishaama qara kiyyo orr lek dey;
soollet hundan lakk ila iyy shokku yihuta kidamiyyonno iyyaa tur qeedd;
Yesus dinkassenno kapop dehaad.
48 Yesus lamm,
"yihuta!
dinkishshann meet nam tarpin daannimu?"
ikkid.
49 helpaan soollet Yesus olle kishshu hin koddiyy akkenekuless,
"polda!
pillawin dawinu?"
he ikkiden.
50 iyyaa ila ishshokku erhayt suuka suukammaat daw,
lapitt miskittishshet qara quur.
51 Yesus lamm,
"hinepa kiyy qari oorr erkasa diiyii" hekid;
illo lapitt nam sett qappad diniyy.
52 essete Yesuset kaadayya sukammatenne kaadayya waartiyya man miilotatenne qimaayya siip hin iyy qapa deyess kide,
"afa ewwa qapa deyishshanep an qapa pillawanne holholt qapatten deetenemu?
53 lashshmin antu man miilot talla inn olle kiyyo amm an heqqaftenemu;
hekoddu male ammann helpaannanne helpa hayyotum poorinnatat kida."
betsiroos Yesus marmad
(mati. 26,57-58; 26,69-75; mar. 14,53-54; 14,66-72; yewa. 18,25-27)
54 sekanna orr hin Yesus heqapen inxaanen illo man suuka suukammaatep indeyen;
betsiroosenno por sekaashsh iyy kanni annin kida.
55 orr hin man se altass apitt qassiyyen,
ollin kapi qaaen.
betsiroosenno hedeyy illo iyyaa olle ulli laiyy.
56 helpaan betsiroos apitt se kapi lae,
erhaytet shakk attumat mina akkitt;
illisatt tooyt illo,
"sedenno iyy olle kiyypa!"
kidit.
57 betsiroos lamm,
"yenta,
amm antu iyy henxupamu."
hekid marmad.
58 helpaan qoji kanna nam pil betsiroos akk illo,
"hedenno iyyaa ila nam shokkupa!"
ikkid.
betsiroos lamm,
"yema!
amm anamu!"
hekid.
59 saatet shakkaah kanna lamm nam pil,
"oot nam hin kelilishsh kodd maalla,
shaakketass iyy olle kiyy!"
hekid qimiyy ishaam.
60 betsiroos illo,
"yem namayt!
iyaan att kidishshu amm antu henxupamu!"
ikkid.
helpaan iyyat sed leliyyo esseteeh lukkalot iixi.
61 helpaanette Yesuset ipateesh mitaat illo betsiroos il tooy;
betsiroosenno lel se Yesus poldat,
"aw lukkalot iia male halpattann an marmannint" kid iyyi immashshioor.
62 iyyat illo altaash sohad qaydid pooy.
63 helpaanette orr hin Yesus qap qara beejjiyannin tolin;
64 minanno marin illo,
"aynu hed daw?
intu him innu himii!"
ikkidin.
65 akkan lekenno qari lelannin otin.
Yesus arfayta turop dehaad
(mati. 26,59-66; mar. 14,55-64; yewa. 18,19-24)
66 helpaan lashsh parite qimaayya siipatenne kaadayya suukammaatenne kollisampayya halitt orqudassiqapamen illo arfaytaa turop Yesus dehayyen.
67 sedepanno ikkiden,
"intu innu lele!
shaakketass att kristoosemu?"
iyyat lamm aset iyyaa kidd,
"etin inni lelonno amm an amaanihintanemu;
68 etin kaassiy inni dehayyonno,
amm ani mitaatinhintanemu.
69 hekoddu male meet nam ammanneeshsh hirina miskitt irrampayt heka Mooha qari lainnina."
70 essetekul iyyaa dahenn orkapi kidene,
"att illo meet moohaatemu?"
kiden kaassaden.
iyyat lamm,
"qum se inn kiditenepa" he iyyaa kid.
71 iyyaa illo "sedeeshsh maanaassin maanyet pil fadin?
toare hin kapaayy qalle sohad innu dahennin dakaynep!"
kiden.