daayy se hiyaytet daatt
(mar. 12,41-44)
21
1 Yesus por saatsinet dayy man miilotateesh toyy illo shoroht dayyaaddu saatsinet se qalli kashiyyane akk.
2 settep lamm hiyyaytet shakk it irishaadd qarin toy,
saantimet taamunet tinnax lakk saatsinet daayy qalli kashishsho akk.
3 sedepanno kid,
"shaakketin inni lelin,
hiyyaytet hin nam heikk qara tawnitt daatt.
4 maana maalla,
orr hin dahenn shorokumaddu qareellaah dayyen;
it lamm hiyyaytet kodditete qara hattisatta male iyyaan it qaftu dahin daatt."
Yesus oot paqisama man miilotat him
(mati. 24,1-2; mar. 13,1-2)
5 orr karatiyy,
"man miilot hin ashshann sommumin?
daka sommanne dayyadaan Mooha daassamenn siram" kidaan ollin ishaamannin.
6 Yesus lamm,
"dakalla hin inn akkishshan dahenn helpaan iyaa uqqalli tiiqaminan deyina;
daka daka qari dawam tiiqama male amm ulli lainamu."
hekid iyyaa mitaattiy.
7 iyyaa illo,
"kollisampayt!
hin kat etanne koddinan?
lamm hin dahenn kodda dehaattaaddu maanaann ishaakinan?
intu innu lele."
hekiden iyy kaassaden.
dexema Yesus turann rakkotanne kann arisama deyinu
(mati. 24,3-14; mar. 13,3-13)
8 Yesus sedep kid iyyaa mitaattiy,
"namat patann inn indapusinnin illuushadaa!
orr lek,
'antu kristoos!
helpaan hedehaaden!
' kidinan mahhaawun deyinane;
iyyaa kanaass inxaanan.
9 helpaan inn oot adantatenne oot orriqari sohatta dakayishshane naha diiyyaa;
hin turaqatta koddaaddu amm hatinamu."
10 ukkannass lamm asset ikkid,
"siipat siip qarass,
daamumat daamum qarass sohannina;
11 por heikk ilassenno shilda huss iyaa kaanenne laaotanne uuf nayq koddint;
iyyaan nam huurinniyyanne ishaakada kakkaannenno moontalle akkaanninan.
12 hekkoddu male hin dahenn kodda tureeshsh orrat inn qapinan;
inn kann arinninan;
man dinkam ayhutaatepanne man hidanatep inn tarpinninan daanninan;
oot mahhaawu maallanno daamadaanne peashisampayya siip turop inn dehanninan.
13 hin lamm oot mahhaawu maalla maanyet koddaass helpa dikk inni koddint.
14 semmaalla kaassiy se inn qari dehaanniyoss,
maana mitaatisa ikkim inn fadusinniyyu turaqatta baaqura diiyyaa.
15 maana maalla,
arrapanne ufunat olishshadaann mini ellaanne shiitta fotta diinninannin inni daannina.
16 lemmoonnanne insharaddaanne ankasadda,
kafaaynenne kataannanno inn tarpinninan daanninan;
inn ila orr shakkan ikanninan.
17 mahhaawu minann namat dahenn inn qar hittinnina.
18 hekoddu male rifant mashshayn ila shakkaah naf amm all patintamu.
19 duupattaaynenn nafseshayn dininnintan" hekid.
Yesus patet yerusaalem lel
(mati. 24,15-21; mar. 13,14-19)
20 helpanette Yesus asset kid,
"helpaan yerusaalemet orr adantatin patmantarantu inn akkitane,
allpataadd dehataayy ufunaadaa;
21 helpaanette orr huss yihuta qalle kiyy utawa qarop allfeeladenii;
iyyaan sapara hin qalle kiyy uqqalle allfeeladenii;
orr sapara hin patin kiyyu sapara hin qallep kala diiyenii.
22 him hin oot patet sedeti tsaafam ikkim kaysanninoss hin helpa haarot oorsattaat kida.
23 essete iskatt medda kardalle qapanne luukissotass,
pelawu!
huss sed qarass rakkot kaant koddint;
siip sed qarassenno jiiayta Moohaat deyina.
24 iyyaa ila orr lek toranna raawinan;
orr shakkan lamm poojaminan huss pilap anninan.
sapan orr ayhuta kodda diiy hak kaysanninoss yerusaalem it orr ayhuta kodda diiyin iqawusant koddint.
dexema Yesus
(mati. 24,29-31; mar. 13,24-27)
25 ukkanna Yesus asset kid,
"lashshanne lehaanne iska qarassenno ishshaak nam shamusinniyyu akkaannina;
siip husslah qara kiyyonno dahenn nass nahila kaahatta pakatet settetin sohattaann baaqurinan.
26 hin husslah qari deyina lushattaann orrat huuran jaraharahinan;
helpaanette irrampayya moontatenno shildinan;
27 essete meet nam irrot kaantenne serkan urrashshetin deyiyyo orrat iyy akkinan.
28 helpaan hin dahenn kodda hiriyane,
dinaann hedehade,
paha erra moontallel lak toyaa."
dexema Yesus paahnat pelesetatenn lelamen
(mati. 24,32-35; mar. 13,28-31)
29 ukkannassenno Yesus paahnat sed iyyaa lel,
"kinnat qoyr pelesetatenne qoyr pil dikkiyya tooyaa;
30 helpaan lappaaddu soliyan inn akkishshane helpa pon dehaataaddu ufunaannin.
31 settep lamm helpaan hin dahenn koddiyyan inn akkishshane,
daamum Mooha deya dehaattaayy ufunaadaa.
32 "shaakketin inni lelin,
hak hin dahenn koddinaness dalashot hin amm tarpintamu.
33 moontanne huss tarpinan;
lelaawu lamm amm tarpinamu."
qiman lushatta
34 sekanna Yesus sedep kid,
"damotanne ukot lekisan taarotan qishshawaanne oot kallat husslahat baaquran mutsuraann tashsha tura illushadaa!
lashsh hin qum urukupaatep inn qapnt.
35 lashsh hin orr huss qara kiyyu dahenn kenda painnint qapint.
36 semmaalla,
nayqunt se deyishshu kela passatta illo meet nam turi ella ikkim fottintaness lashsh min dinkamin kokkaadaa."