kaassiy se oot hayyotumat yesusi dehaadd
(mati. 21,23-27; mar. 11,27-33)
20
1 lashsh shakka Yesus man miilot alta siip kollisan lel masmasunt lela qara kiyyo,
kaadayya suukammatenne kollisampayya halitt muusetenne qimaayyaanno iyy kapop deyen
2 illo,
"intu innu lele;
att hin erkannishshu hayyotum hekannenne?
hayyotum sed aynu hedi day?"
kiden kaassaden.
3 Yesus lamm,
"ananno kaassiy shokkoohin inn kaassannina,
intu innanno ani lelaa;
4 ahalila yewannis Mooha kapaamu kat nam kapa?"
he iyyaa kid.
5 iyyaanno sedep kiden ollin mariyaden,
"etin 'mooha kapa' kidino,
'illo maanaass iyy amaana diitten?
' he innu kidina;
6 etin 'nam kapa' kidino lamm,
oot siipat dahenn yewannis himampayt koddaayy amaaniyyu maalla dakann innu reepinan."
7 semmaalla,
"aynu kapa ikkim it kodditess amm henxufnamu" hekiden iyyi mitaattiyyen.
8 Yesus illo,
"ananno ikkimin hayyotum hekannenn hin erkanniyyu amm inni lelinhinamu" iyyaa kid.
paahnat peehampayya ul woynetat
(mati. 21,33-46; mar. 12,1-12)
9 ukannas Yesus paahnat sed siipi lela hir,
"nam shokku dihot woynet dih;
illo ikkim dihot woynet sett kel sooruminani peehampayya day illo huss pilap aan.
helpaan lek olad.
10 helpaan woynet hin palhite,
ikkim daloot woynet settetin ideynaness,
peehampayyaan kapop ayleshayy hit.
peehampayyaan lamm aylet set hetolen harka patt hayyaden.
11 settep lamm aylet shokkonno hit.
iyyaa illo iyyanno tolen deesayyen illo harka patt hayyaden;
12 halpattiyaassenno aylet shokku hit,
iyyaa tolen peesayyen illo qeedden allkashen.
13 sekkannakul appa ul dihot woynet sett,
'semmaalla maanan kodina?
meetaawu se antu hoxsaanniyun hitina;
amm iyy huura diinninanemu!
' hekid.
14 hekoddu male helpaan peehampayyaan iyy akkene lamm,
'hin taymampaytaaypa,
hooyaa innu all ikannu!
ulayyenno innoss koddina!
' he olli kikkiden.
15 meet set ul woynet qalle allqeedden ikayyen.
semmaalla appa ul woynet sett peehampayyaan afa ashshann kodaayep inni kinnaan?
16 appa ul woynet sett mashshayyess deyina;
peehampayyaanettenno allrawinnina;
ul woynet settetenno peehampayya pili alldaannina."
helpaan orr settenno sed dakayene,
"apure hinep kiyy kodda diiyenii!"
hekiden.
17 Yesus lamm poraddoosh tooy illo kide,
se,
"daka se man dihampayya alltuffaden,
kaysila man kodd."
kidant tsaafant maana akkinnin?
18 nam daka se qari sunkiyyu dahenn allqeqqepina;
nam daka hin iyy qar sunkiyyu lamm allbarjajawna."
oot tiiqot daataatt kaassiyy dehaad
(mati. 22,15-22; mar. 12,13-17)
19 kollisampayya halitt muusetenne kaadayya suukamma paahnat se Yesus lel,
it iyyaa akkinnishshu koddaadd oot iyyaa ishshaaken maalla,
iyy qapa faden makess;
hekoddu male siip huuren.
20 semmaalla iyy qapaass helpa lushannin;
peashisampaytanne hayyot turop iyy dehasa aysampayyaan tsillampayaap kinnaannina iyy kap qeeddina iyy kapop hiten.
21 orr settenno Yesus kapop deyen illo,
"kollisampayt!
iyaan att ishaamishshonne kollinnishshu iyaan pah koddaaddu henxufn;
paana Mooha shaakketass kollinnin male,
amm qariqatta erkannikkishshamu.
22 intu innu lele!
halittaaynu qara Daam roomati tiiqot daattot fadusinniyyamu shoke addifadusinniyyu?"
kiden iyy kaassaden.
23 Yesus lamm ururumaaddu ufnaad illo,
24 "intu tinaaret se ani akkiyyaa;
tinaaret sed qara paahnat hin kishshonne mahh hin tsaafam hekop aayno?"
ikkid.
iyyaa illo,
"heka Daam roomaat" kiden.
25 Yesus illo,
"semmaalla heka Daam daamass,
heka Mooha Mooha dayyaa" iyyaa kid.
26 iyyaa lamm siip ilaashsh ishaamaayyin iyy qapa amm hefottenemu;
semmaalla mitaattilaayyann heshammaden illo all rui kiden.
oot toxt ila sohattaat kaassiyy dehaad
(mati. 22,23-33; mar. 12,18-27)
27 orr satuqet hin,
"toxt ila sohattot amm hekiyyamu."
kidiyy ila karatiddu Yesus kapop deyen illo,
28 "kollisampayt!
muuset,
'et nam shokku haypaat qeeddu illo medda haaya male qarin toyo,
insharaayy it dahalu illo ankasaayy kanna mahh hembusiyyu."
hekid innu tsaaf
29 ammann kolkolla tapp iyyaan ollin dalad kiyy.
ankasaaddu hin qart kodd haypaat qeedd illo medda haaya male qarin toy;
30 inshar iyy kanna kiyyu iskattet se dahal;
inshar lakkiyyaanno it dahal;
31 sedep koddan immadaan tapp it dahalen illo medda qara haaya male raawen;
32 iyyaa kanna lamm iskattet hin toxt.
33 tappaddon it qeeddene,
kat helpa toxt ila sohattaate iskattet hin hekanness aat koddinta?"
kiden iyy kaassaden.
34 Yesus illo sedep kid iyyaa mitaattiy,
"orr husslah orqeeddin kalaan;
35 orr toxt ila sohatta illo kiyyat se deyishshu qeeddattan kallaattot iyyaa daassam lamm,
amm orqeeddinan kallaanninanemu.
36 oot iyyaa qum hitaymiyya moohaatep koddinan maalla,
amm sekanna toyinanemu;
oot iyyaa toxt ila sohaden maalla iyyaa medda Moohaat kida.
37 ikkim orrat toxt ila sohanninu akkisaass lamm,
torroot se oot apitt huushsha ilat,
tsaafant qarass muuset poldass,
'mooha aprihaamenne Mooha isaaqenne Mooha yayqoop' hekid hemb.
38 semmaalla Moohot Mooha orr kiyyat qapot male amm Mooha orr raawetemu;
dahenn iyyass kiyyatin kallaanninan."
39 kollisampayya halitt ilanno orr shokku,
"kollisampayt!
iyaan dikk ishaant!"
he kiden.
40 sekanneeshsh nam iyy kaassatta qim shokkooh naf amm hekiyyamu.
kaassiy se kristoos aynu koddaayyi dehaad
(mati. 22,41-46; mar. 12,35-37)
41 sekannakuless Yesus asset iyyaa kid,
"orrat ashshannass 'kristoos meet taawitpa' kidin?
42-43 taawit mashshayyess matsaafa laalet qalless:
"poldat poldaawoss:
hak antu olishshadaatt lukkaatt keli hedi kodinu,
miskittaawu qari laii" heikkid.
44 et taawit mashshayy pold kidu iyy hembo,
ashshannass kristoos meet taawit kodda fottina?"
Yesus, "kollisampayya tampet qara illushadaa" hekid
(mati. 23,1-36; mar. 12,38-40)
45 helpaan siipat dahenn ishaamaayy dakaya qara kiyyane,
Yesus soolleshayyess sedep kid,
46 "kollisampayya halitt hin uuwaat dedder uuwanniyy,
errall mimmitaatiyy;
kapiyaalle ikkim namat paanussa serka idehanninu fadiyy,
man dinkam tallanno sheedda serka,
por hembantaatenno por serka hoxsaanniyy qara illushadaa.
47 iyyaa akkaatta maalla dinkamaaddu derannin illo man iskatt irishadaaddu qarin raawen tall damin;
semmaalla iyyaa qarass horat kaant quuramina.