yesussenne sakkiyoos
19
1 lamm Yesus sapara iyaarikotenn tarpa antaalle kiyy.
2 ulla lamm shorokitt shokku sakiyoos kidamiyyu kaadayt qarats quurampayyaat kiyy.
3 nam settenno yesusett aynu koddaayy akka fadin;
hekoddu male oot iyyat nam hummax koddenne siipanno leken minann amm iyy akka hefottemu.
4 oot Yesus ullin tarpiyyu maalla,
sakkiyoos iyy akka fad siip tureeshsh feell illo daishallep fayyad.
5 helpaan Yesus por se ila paiyye,
ereel tooyy illo sakkiyoosess,
"sakiyoose!
aww manaayte nakaya an fadusinnine,
shakar kid lekkadu" ikkid.
6 sakkiyoosenno shakar kid lekkad illo masmasuntin yesusin manayyep aan.
7 orr sed akk dahenn,
"nam hin man juppampaytatep damoti aan!"
kiden Yesus qari kumuliyaden.
8 sakkiyoos lamm errass elli illo Yesus poldi kide,
"polda!
toare kodashshet se antu qapu qara pak hiyayyaassin daannina;
it antu malmatilan nam qara qeedad et kinnaatto hark afurin qari padawina daannina."
9 Yesus illo,
"nam hin oot iyyat hotta aprihaam kodd maalla,
aww orr man sed hedinaden;
10 meet nam dey,
se tawwad fadan dinisaass kida."
ikkid.
paahnat erkamampayya hundat
(mati. 25,14-30)
11 helpaan orr hin sed dakayya qara kiyyane Yesus paahnat shakk iyyaa lel.
sedenno,
oot iyyat yerusaalemep dehaadenne orrat afa ammanneeh daamum Mooha akkaatta dehaadep iyyaa kinnaadd maalla kida.
12 semmaalla Yesus asset kid,
"nam shokku iyy serka qapu hayyotum daamum qeeddatta illo qalleeshsh mitaata huss sekap aan kiyy.
13 nam hin antaayy tureeshsh erkamampayya ila nam hund hemb illo shokku shokkotaddu minaaneta shokkushokko day illo,
'hak antu qaraash mitaatinu kodashshet sedin nakataa' iyyaa kid.
14 orr huss sett lamm oot iyyaa iyy qar hitinniyyan maalla,
'nam hin ikkim innu qari daamuminu amm fadinkinnamu' kiden nam kanni hiten,
15 "helpaan nam hin Daam kodd mitaatekuless,
aylammaan iyyat kodashshet iddayy ikkim innakaten shohot akkaden ufunaattaass hembusiyy.
16 erkamampayt shokku deyy illo,
'polda!
minaanet shakkaah ani daat,
toare minaanet hundin shohot akkad' ikkid.
17 poldaayyenno,
'att erkamampayt dikk,
iyaan dikk erkatt;
iyaan qojenn heamaanamte,
antu lamm sapara hund qarassin hayyotum hedi day' ikkid.
18 erkamampayt lakkiyyaanno hedey illo,
'polda!
minaanet shakkaah ani daatt,
toare it minaanet hen dalt' heikkid.
19 poldaayyenno,
'hedessenno lamm sapara hen qarassin hayyotum dayy' heikkid.
20 "erkamampayt shokku lamm hedey illo,
'polda!
kodashshet att ani daatt toare,
kajarraannin mar ulli all haay.
21 antu maalla sedep kod,
oot att nam nayq,
iyaan att haayatta diitt qeeddannishshonne,
por att seyisatta diitt ila oyhannishshu,
koddit,
antu upu illo huur maalla kida' ikkid.
22 poldanno,
'yem aylet nayq!
ishaamaattannin hed qari horat quurina;
antu nam nayq,
iyy iyaan antu haayatta diiy qeeddanniyyonne iyaan antu seyisatta diiy oyhanniyyu koddaawu et att ufunaatte;
23 maanaass kodashsheshawu por se antu ulla shohot akkannino man pasat ani haaya diitt?
antu mitaatiyyo dal olle qeeddannaanemu.
' heikkid.
24 sekannakuless pold hin orr se ulli elless kide,
'minaanet se nam sed qara allqeeddaa illo erkamampayt se minaanet hund qapu dayyaa'.
25 iyyaa lamm,
'polda,
iyyat ukkul minaanet hund qap!
' he ikkiden.
26 pold hinnett illo,
'se qaposs qarass padawamint daassamint,
se dap lamm se iyyat qapu nafenno qara qeeddamint hen inni kidin.
27 olishshadaawu hin ikkim antu iyyaa qarass indaamumin fadiyy lamm are an turop indeyaa illo an ilaashsh all rawiyaa!
' " iyyaa kid.
28 helpaan Yesus paahnat sed ishaam kannakuless yerusaalemep soolleshayy turi qatt antaalle kiyy.
Yesus yerusaalemep serka kaanin kal
(mati. 21,1-11; mar. 11,1-11; yewa. 12,12-19)
29 helpaan Yesus paattaan utet se tarr ekertada kidamishshu kapa kiyya petefaakenne pitaanniyya paisa dehaade,
sedep kid soolleshayy ila nam lakk hit,
30 "paat se inn tureesh kiyyop aanaa;
helpa ulla paittane,
esseteeh ookka harret iyaan namat apure qari laisa diiy,
iyaan ulli hiddam akkintane furiyyaa illo arep indeyaa.
31 et namat 'maanaass furinnin?
' kidu inn kaassanniyyo,
'poldass fadusinnin' kidaa."
32 orr se hitamenno heaanen akkan heikk qum se Yesus lelep kodden iyyaa akken.
33 helpaan iyyaa ookka harret sett furinniyyane,
appa harret sett,
"maanaas furin?"
he iyyaa kid.
34 iyyaa illo,
"poldass fadusinnin" kiden.
35 ookka harret settetennenno yesusi deyen;
uuwawoddonno ookkaan pati haayen illo ikkim Yesus qari llainninu koden.
36 helpaan iyyat anniyyo,
siipat uuwawooddu paanalli iyy turi afin.
37 helpaan Yesus utet ekertadaateett lekkanniyyu yerusaaleme paisa dehaade,
orr hin Yesus olle anniyyu dahenn oot hin nam shamusinniyy iyyaa akkenetess,
masmasuntann innaakoden illo nassaddu erri qeedden Mooha aypila dehasa hiren.
38 sedepanno kidin,
"Daam mahh poldatin deyiyyu iqoram!
moontalless andot,
serkaanno moohaass ele erri koddenii!"
39 faraset otant siip ila kiyy ila shakkanaddu lamm,
"kollisampayt!
soolleshayt rui kidusiyyii!"
he iyyi kiden.
40 Yesus lamm,
"et iyyaa rui kidan kid,
dakalla naf ullupina hen inni kidin" he kid iyyaa mitaattiy.
Yesus sapara yerusaalemet pooy
41 helpaan Yesus sapara yerusaalemetep dehaade,
saparaanett tooy illo saparaan pooy.
42 assetenno kid,
"et iyaan andotin hedi deyina aww naf ufunaatt kid maana kiyy!
ammann lamm hin indaatt tura hedekamen.
43 lashsh olishshadaatt ohint hed pat onkanninan,
hed pat mantarinan,
por heikketeeshsh hed rakkusinninan deyina.
44 hedenne meddaatt hin hed qalle kiyyanno hussalli kashinan allipatinninan.
daka daka qar dawam tiiqama male amm ulli lainamu.
hin koddinan,
oot att helpaan Moohot hed dinisa uqqalli dey ufunaatta diitt maalla kida."
Yesus orr kapiyyaat man miilot talla ariyy
(mati. 21,12-17; mar. 11,15-19; yewa. 2,13-22)
45 Yesus man miilot altop aan illo orr se ulla kapiyya kashiyyonne heranniyyu kann arisa hir;
46 assetenno iyyaa kid,
" 'manaawu man dinkamat koddina' hekidant tsaafant;
inn lamm pohot ponqampayyaatess koditen."